(moviemax.in) സിനിമാ ലോകത്തെ നടുക്കുന്ന വെളിപ്പെടുത്തലുമായി നടി ജാൻവി കപൂർ. തന്റെ കൗമാരകാലത്ത് നേരിടേണ്ടി വന്ന സൈബർ അതിക്രമത്തെക്കുറിച്ചും നിലവിലെ ഡീപ് ഫേക്ക് ഭീഷണികളെക്കുറിച്ചും രാജ് ഷമാനിയുമായുള്ള പോഡ്കാസ്റ്റിലാണ് താരം മനസ്സ് തുറന്നത്. സ്കൂളിൽ പഠിക്കുന്ന കാലത്ത് തന്റെ ചിത്രം ഒരു അശ്ലീല വെബ്സൈറ്റിൽ കണ്ടത് തന്നെ മാനസികമായി തകർത്തുവെന്ന് താരം പറയുന്നു.
ഹൈസ്കൂളിൽ പഠിക്കുമ്പോഴാണ് ജാൻവി ഈ ക്രൂരതയ്ക്ക് ഇരയായത്. ഐടി ക്ലാസ്സിലെ കമ്പ്യൂട്ടറുകളിൽ സഹപാഠികൾ ഇത്തരം സൈറ്റുകൾ നോക്കുന്നതിനിടയിലാണ് ജാൻവിയുടെ ചിത്രം അതിൽ പ്രത്യക്ഷപ്പെട്ടത്. "അതൊരു അസാധാരണവും അസ്വസ്ഥപ്പെടുത്തുന്നതുമായ അനുഭവമായിരുന്നു. ജീവിതത്തിന് നമ്മൾ നൽകുന്ന വില ഇതാണോ എന്ന് പോലും ഒരു ഘട്ടത്തിൽ ചിന്തിച്ചുപോയി," ജാൻവി ആ വേദനയോടെ ഓർക്കുന്നു.
ഇപ്പോഴും സോഷ്യൽ മീഡിയയിലെ ധാർമ്മികതയില്ലാത്ത പ്രവണതകളോട് പൊരുത്തപ്പെടാൻ തനിക്ക് സാധിച്ചിട്ടില്ലെന്ന് ജാൻവി വ്യക്തമാക്കുന്നു. ആർട്ടിഫിഷ്യൽ ഇന്റലിജൻസ് (AI) ഉപയോഗിച്ച് നിർമ്മിക്കുന്ന ചിത്രങ്ങൾ തന്റെ കരിയറിനെ പോലും ബാധിക്കുമെന്ന് താരം ഭയപ്പെടുന്നു.
താൻ ഒരിക്കലും ധരിക്കാത്ത വസ്ത്രങ്ങൾ ധരിച്ച രീതിയിലുള്ള എഐ ചിത്രങ്ങൾ താരം തന്നെ പങ്കുവെച്ചതാണെന്ന തരത്തിൽ പ്രചരിക്കുന്നുണ്ട്. "നാളെ ഒരു സിനിമയിൽ ഗ്ലാമർ വേഷം ചെയ്യാൻ കഴിയില്ലെന്ന് പറഞ്ഞാൽ, ഇത്തരം വ്യാജ ചിത്രങ്ങൾ ചൂണ്ടിക്കാട്ടി സംവിധായകർ എന്നോട് തർക്കിച്ചേക്കാം. അത് ആളുകളുടെ എന്നെക്കുറിച്ചുള്ള കാഴ്ചപ്പാടിനെ തെറ്റായി സ്വാധീനിക്കുന്നു," ജാൻവി പറഞ്ഞു.
സോഷ്യൽ മീഡിയയിൽ യാതൊരു നിയന്ത്രണവുമില്ലാതെ പ്രചരിക്കുന്ന ഇത്തരം കണ്ടന്റുകൾക്കെതിരെ ശക്തമായ പ്രതികരണമാണ് ജാൻവി കപൂർ ഉയർത്തുന്നത്. വ്യാജ ചിത്രങ്ങൾ താരം തന്നെ പോസ്റ്റ് ചെയ്തതാണെന്ന് തെറ്റിദ്ധരിക്കപ്പെടുന്ന അവസ്ഥ വലിയ ആശങ്കയുണ്ടാക്കുന്നതാണെന്നും താരം കൂട്ടിച്ചേർത്തു.
'I still haven't come to terms with the fact that I was on a porn site during school': Janhvi Kapoor
