ദക്ഷിണേന്ത്യയിൽ, പ്രത്യേകിച്ച് ആന്ധ്രാ, തെലങ്കാന സംസ്ഥാനങ്ങളിൽ ഏറെ ആരാധകരുള്ള താരമാണ് നാഗാർജുന അക്കിനേനി. തന്റെ സുരക്ഷാ ഉദ്യോഗസ്ഥർ കാണിച്ച ഒരു മോശം പ്രവൃത്തി കാരണം സോഷ്യൽ മീഡിയയിലൂടെ മാപ്പുപറഞ്ഞിരിക്കുകയാണ് താരം. നാഗാർജുനയെ സമീപിച്ച ഒരു ആരാധകനെ സുരക്ഷാ ഉദ്യോഗസ്ഥൻ തള്ളി താഴെയിട്ടതാണ് എല്ലാത്തിനും കാരണമായത്.
ഹൈദരാബാദ് വിമാനത്താവളത്തിൽനിന്നുള്ള ഒരു ദൃശ്യം കഴിഞ്ഞദിവസം സോഷ്യൽ മീഡിയയിലൂടെ പ്രചരിച്ചു. സുരക്ഷാ ഉദ്യോഗസ്ഥരുടെ അകമ്പടിയോടെ നടന്നുവരുന്ന നടന്മാരായ നാഗാർജുനയേയും ധനുഷിനേയും കണ്ട് സമീപത്തെ ഒരു കടയിലെ ജീവനക്കാരൻ നാഗാർജുനയ്ക്കടുത്തേക്ക് ചെന്നു.
https://x.com/iamnagarjuna/status/1804919359099605097
എന്നാൽ, ഇയാളെ സുരക്ഷാ ഭടൻ ശക്തിയായി തള്ളി മാറ്റുകയായിരുന്നു. വലിയ വീഴ്ചയിൽനിന്ന് കഷ്ടിച്ചാണ് ഇയാൾ രക്ഷപ്പെട്ടത്. ഈ സംഭവങ്ങളൊന്നും നാഗാർജുന ശ്രദ്ധിക്കുന്നുണ്ടായിരുന്നില്ല. എന്നാൽ, ആരാധകന് എന്തെങ്കിലും പറ്റിയോ എന്ന് ധനുഷ് തിരിഞ്ഞുനോക്കുന്നുണ്ടായിരുന്നു.
എന്നാൽ, ഈ സംഭവത്തിന്റെ ദൃശ്യങ്ങൾ ഇന്റർനെറ്റിൽ പ്രചരിച്ചു. പ്രതികരണങ്ങളെല്ലാം സൂപ്പർതാരത്തെ കുറ്റപ്പെടുത്തിക്കൊണ്ടുള്ളതായിരുന്നു. തൊട്ടുപിന്നാലെ വീഡിയോ പങ്കുവെച്ചുകൊണ്ട് നാഗാർജുനയുടെ പ്രതികരണവുമെത്തി. “ഇപ്പോഴാണ് ഈ വീഡിയോ ശ്രദ്ധയിൽപ്പെട്ടത്. ഇതൊരിക്കലും നടക്കരുതായിരുന്നു. ആ മാന്യവ്യക്തിയോട് ഞാൻ മാപ്പുചോദിക്കുന്നു. ഭാവിയിൽ ഇങ്ങനെ സംഭവിക്കാതിരിക്കാൻവേണ്ട മുൻകരുതലുകളെടുക്കും”, നാഗാർജുനയുടെ വാക്കുകൾ ഇങ്ങനെ.
വിജയ് ബിന്നി സംവിധാനം ചെയ്ത നാ സാമി രംഗാ ആണ് നാഗാർജുനയുടേതായി ഒടുവിൽ പുറത്തിറങ്ങിയ ചിത്രം. ശേഖർ കമ്മൂല സംവിധാനം ചെയ്യുന്ന കുബേര എന്ന ചിത്രമാണ് താരത്തിന്റേതായി ചിത്രീകരണം നടന്നുവരുന്നത്. ധനുഷ് ആണ് ചിത്രത്തിൽ പ്രധാനവേഷത്തിലെത്തുന്നത്.
Content Highlight: #nagarjuna #apologises #as #video #bodyguards #mistreating #fan #goes #viral
