കടലായി ജനാവലി...! മയ്യിത്ത് നമസ്കാരം നടത്തിയത് 70 തവണ; ആലിക്കുട്ടി മുസ്‍ലിയാർക്ക് പതിനായിരങ്ങളുടെ യാത്രാമൊഴി

തിരൂർക്കാട് (മലപ്പുറം): സമസ്ത കേരള ജംഇയ്യതുൽ ഉലമ ജനറൽ സെക്രട്ടറിയും പ്രമുഖ പണ്ഡിതനുമായ പ്രഫ. കെ. ആലിക്കുട്ടി മുസ്‌ലിയാർക്ക് പതിനായിരക്കണക്കിന് ആളുകളുടെ പ്രാർഥനാ നിർഭരമായ യാത്രാമൊഴി.

തിരൂർക്കാട് മഹല്ല് ജുമാ മസ്ജിദ് ഖബർസ്ഥാനിൽ  രാവിലെ 10 മണിയോടെ മയ്യിത്ത് ഖബറടക്കി. ജനബാഹുല്യം കാരണം മയ്യിത്ത് നമസ്കാരം 70 തവണയായി നടത്തി. ആദ്യ നമസ്കാരത്തിന് സാദിഖലി ശിഹാബ് തങ്ങൾ നേതൃത്വം നൽകി. തുടർന്നുള്ള നമസ്കാരങ്ങൾക്ക് സമസ്ത കേരള ജംഇയ്യതുൽ ഉലമ അധ്യക്ഷൻ ജിഫ്‌രി മുത്തുക്കോയ തങ്ങൾ ഉൾപ്പെടെയുള്ള പണ്ഡിത പ്രമുഖർ നേതൃത്വം നൽകി.

പ്രിയ ഗുരുനാഥനെ അവസാനമായി ഒരുനോക്ക് കാണാൻ സംസ്ഥാനത്തിന്റെ വിവിധ ഭാഗങ്ങളിൽ നിന്ന് പതിനായിരങ്ങളാണ് തിരൂർക്കാട്ടേക്ക് ഒഴുകിയെത്തിയത്. വിവിധ മത സംഘടനാ നേതാക്കളും രാഷ്ട്രീയ നേതാക്കളും ശിഷ്യഗണങ്ങളും അനുയായികളും അന്ത്യോപചാരം അർപ്പിച്ചു.

മന്ത്രിമാരായ പി.കെ.കുഞ്ഞാലിക്കുട്ടി, എ.പി.അനിൽകുമാർ, പി.കെ.ബഷീർ, കെ.എം.ഷാജി, വി.ഇ.അബ്ദുൽ ഗഫൂർ, അഖിലേന്ത്യാ സുന്നി ജംഇയ്യത്തുൽ ഉലമ ജനറൽ സെക്രട്ടറി കാന്തപുരം എ.പി.അബൂബക്കർ മുസ്‌ലിയാർ, ജമാഅത്തെ ഇസ്‌ലാമി അമീർ പി.മുജീബുറഹ്മാൻ, മുൻ അമീർ എം.ഐ.അബ്ദുൽ അസീസ്, ശൈഖ് മുഹമ്മദ് കാരക്കുന്ന്, ശിഹാബ് പൂക്കോട്ടൂർ, സമസ്ത പ്രസിഡന്റ് ഇ.സുലൈമാൻ മുസ്‌ലിയാർ, കോഴിക്കോട് വലിയ ഖാസി മുഹമ്മദ് കോയ ജമലുല്ലൈലി തങ്ങൾ തുടങ്ങിയവർ സംബന്ധിച്ചു.

Also read: 'എന്റെ സ്വപ്നമാണ് പൊലിഞ്ഞത്'; വിജയ് ചിത്രത്തിൽ നിന്ന് രംഗങ്ങൾ വെട്ടിമാറ്റിയതിനെ കുറിച്ച് വികാരാധീനയായി നടി ആനന്ദി

പട്ടിക്കാട് ജാമിഅ നൂരിയ്യ അറബിക് കോളജ് പ്രിൻസിപ്പലായിരുന്ന പ്രഫ. കെ. ആലിക്കുട്ടി മുസ്‌ലിയാർ (81) വാർധക്യസഹജമായ അസുഖത്തെ തുടർന്ന് വ്യാഴ്ച ഉച്ചക്ക് ശേഷം പെരിന്തൽമണ്ണയിലെ സ്വകാര്യ ആശുപത്രിയിലാണ് അന്തരിച്ചത്.16-ാം വയസ്സിൽ തിരൂർക്കാട് മഹല്ല് പള്ളി ഖത്തീബായും 20-ാം വയസ്സിൽ മഹല്ല് ഖാദിയായും നിയമിതനായ അദ്ദേഹം ചെറുപ്പത്തിലേ നേതൃപാടവം തെളിയിച്ചു.

1968-ൽ ജാമിഅ നൂരിയ്യയിൽ നിന്ന് ഫൈസി ബിരുദം നേടിയ ശേഷം മീനാർകുഴി ദർസിൽ സേവനം ആരംഭിച്ചു.ഇന്ത്യക്കകത്തും പുറത്തും നിരവധി വിഷയങ്ങളിൽ പ്രബന്ധങ്ങൾ അവതരിപ്പിക്കുകയും അന്താരാഷ്ട്ര സമ്മേളനങ്ങളിൽ പങ്കെടുക്കുകയും ചെയ്തിട്ടുണ്ട്.

മുസ്‌ലിം വേൾഡ് ലീഗിന്റെ കീഴിലുള്ള ‘ഇസ്‌ലാമിക ഫിഖ്ഹ് കൗൺസിൽ’ അംഗമെന്ന അപൂർവ പദവിയും അലങ്കരിച്ചു. 2003 മുതൽ 2006 വരെ കേരള ഹജ്ജ് കമ്മിറ്റി ചെയർമാനും 2006 മുതൽ 2009 വരെ ദേശീയ ഹജ്ജ് കമ്മിറ്റി വൈസ് ചെയർമാനുമായിരുന്നു.1945 ജനുവരി ഒന്നിന് കുന്നത്ത് മൂസ ഹാജിയുടെയും ഇയ്യാത്തുട്ടി ഹജ്ജുമ്മയുടെയും മകനായി പെരിന്തൽമണ്ണക്കടുത്ത് തിരൂർക്കാട്ടാണ് ജനനം.

ഭാര്യമാർ: ഫാത്തിമ, നഫീസ. മക്കൾ: മൂസ ഫൈസി, അബൂബക്കർ ഫൈസി, ഖദീജ, സൈനബ, മൈമൂന, മറിയം, ഹഫ്സ.

Content Highlight: Prof K Alikutty Musliyar Funeral: Thousands Attend Burial in Tirurkkad, Malappuram

#Latest News #K Alikutty Musliyar #Samastha #Malappuram #Islamic Scholar #Funeral