(moviemax.in)ബോളിവുഡിലെ മുഖ്യധാരയില്‍ നിന്നും ഒടിടിയിലേക്ക് ചുവടുമാറ്റിയവരില്‍ മുന്നിലാണ് രാധിക ആപ്‌തെ. ബോളിവുഡില്‍ തനിക്ക് എത്താന്‍ സാധിക്കാതിരുന്ന താരപരിവേഷം ഒടിടി ലോകത്ത് നേടിയെടുക്കാന്‍ രാധിക ആപ്‌തെയ്ക്ക് സാധിച്ചിട്ടുണ്ട്.
ലസ്റ്റ് സ്റ്റോറീസ്, സേക്രഡ് ഗെയിംസ്, ഗൗള്‍, ഒകെ കംപ്യൂട്ടര്‍, രാത് അകേലി ഹേ, ഫോറന്‍സിക്, മോണിക ഓ മൈ ഡാര്‍ലിംഗ്, മെയ്ഡ് ഇന്‍ ഹെവന്‍ തുടങ്ങി ഒടിടി ലോകത്ത് രാധിക തിളങ്ങിയ ഷോകള്‍ നിരവധിയാണ്.
നെറ്റ്ഫ്‌ളിക്‌സ് ഷോകളിലെ സ്ഥിരം സാന്നിധ്യം ആയതോടെ സോഷ്യല്‍ മീഡിയ രാധികയ്ക്ക് ഇട്ട പേര് നെറ്റ്ഫ്‌ളിക്‌സിന്റെ കാമുകി എന്നായിരുന്നു.
നല്ല അഭിനേത്രിയെന്ന് തെളിയിച്ചിട്ടും ബോളിവുഡിലെ മുന്‍നിര നായികയായി മാറാന്‍ രാധികയ്ക്ക് സാധിച്ചിരുന്നില്ല. എന്നാല്‍ ഒടിടി ലോകം രാധികയെ ഇരുകയ്യും നീട്ടി സ്വീകരിച്ചു.
ഹോളിവുഡില്‍ നിന്നു വരേയും രാധികയെ തേടി ഓഫറുകള്‍ എത്തി. 19 വര്‍ഷം നീണ്ടു നില്‍ക്കുന്ന കരിയറില്‍ രാധിക അഭിനയിച്ചത് 46 സിനിമകളിലാണ്.
ഹിന്ദിയ്ക്ക് പുറമെ മറാത്തിയിലും ഇംഗ്ലീഷിലും തെലുങ്കിലും മലയാളത്തിലും തമിഴിലും അഭിനയിച്ചിട്ടുണ്ട് രാധിക ആപ്‌തെ. ബാംഗാളി സിനിമയിലൂടെയായിരുന്നു തുടക്കം.
പിന്നീട് വാഹ് ലൈഫ് ഹോ തോ ഐസിയിലൂടെയാണ് ബോളിവുഡിലെത്തിയത്. ഹരം എന്ന ചിത്രത്തില്‍ ഫഹദിന്റെ നായികയായാണ് മലയാളത്തിലെത്തുന്നത്.
എന്നാല്‍ കഴിഞ്ഞ കുറേ നാളുകളായി രാധിക ആപ്‌തെയെ എവിടേയും കാണാറില്ല. സിനിമകള്‍ തുടര്‍ച്ചയായി ചെയ്യുന്ന ശീലമില്ലാത്ത രാധിക പക്ഷെ ഒടിടിയില്‍ നിരന്തരം ഷോകള്‍ ചെയ്തിരുന്നു. എന്നാല്‍ ഇപ്പോള്‍ ഒടിടിയിലും രാധികയെ കാണാനില്ല.
അഭിനയത്തില്‍ നിന്നും ഇടയ്ക്കിടയ്ക്ക് ഇടവേളയെടുക്കുന്ന ശീലക്കാരിയാണ് രാധിക ആപ്‌തെ. പക്ഷെ ഇത്ര ദൈര്‍ഘ്യമുള്ള ഇടവേള പതിവുള്ളതല്ല.
കോവിഡിന് ശേഷമാണ് രാധിക ദൈര്‍ഘ്യമേറിയ ഇടവേളകള്‍ എടുത്തു തുടങ്ങിയത്. 2019 ല്‍ തന്റെ കരിയറിന്റെ പീക്കില്‍ നില്‍ക്കെയാണ് രാധിക ബ്രേക്ക് എടുക്കുന്നത്.
രണ്ട് വര്‍ഷത്തേക്കാണ് താരം ഇടവേളയെടുത്തത്. നിരന്തരം സിനിമകളും സീരീസുകളുമെല്ലാം അഭിനയിച്ച് താന്‍ ക്ഷീണിതയായെന്നും അല്‍പം വിശ്രമം വേണമെന്നുമായിരുന്നു ഇടവേളയെക്കുറിച്ച് രാധിക ആപ്‌തെ പറഞ്ഞത്.
തിരക്കഥ തിരഞ്ഞെടുക്കുന്നതില്‍ പുലര്‍ത്തുന്ന സെലക്ടീവ്‌നെസും രാധികയുടെ ഇടവേള നീളാന്‍ കാരണമാകുന്നു എന്നാണ് വിദഗ്ധര്‍ പറയുന്നത്.
ഇന്ത്യയിലെ ഏറ്റവും കൂടുതല്‍ പ്രതിഫലം വാങ്ങുന്ന നായികമാരില്‍ ഒരാളാണ് രാധിക ആപ്‌തെ. പ്രത്യേകിച്ചും ഒടിടി രംഗത്ത്. രാധികയുടെ സ്വത്ത് 66 കോടി വിലമതിക്കുന്നതാണെന്നാണ് റിപ്പോര്‍ട്ടുകള്‍ പറയുന്നത്.
ഒരു ഷോയ്ക്ക് രാധിക വാങ്ങുന്നത് നാല് കോടിയാണ്. സോഷ്യല്‍ മീഡിയയിലും താരമാണ് രാധിക. 3.7 മില്യണ്‍ ആണ് ഇന്‍സ്റ്റഗ്രാമിലെ രാധികയുടെ ഫോളോവേഴ്‌സിന്റെ എണ്ണം.
ലണ്ടന്‍ സ്വദേശിയായ ബെനഡിക്റ്റ് ടെയ്‌ലര്‍ ആണ് രാധികയുടെ ഭര്‍ത്താവ്. 2012 ലായിരുന്നു ഇരുവരുടേയും വിവാഹം. എന്നാല്‍ തന്റെ വ്യക്തി ജീവിതം സ്വകാര്യമാക്കി വെക്കാനാണ് രാധികയ്ക്ക് ഇഷടം.
അതുകൊണ്ട് തന്നെ തന്റെ ദാമ്പത്യ ജീവിതത്തെക്കുറിച്ച് താരം എവിടേയും സംസാരിക്കാറില്ല. രാധിക വിവാഹതിയാണെന്ന കാര്യം ഈയ്യടുത്താണ് പലരും അറിയുന്നത് പോലും.
അധികം വൈകാതെ രാധിക തിരികെ വരുമെന്ന പ്രതീക്ഷയിലാണ് സിനിമാ ലോകവും ആരാധകരും.
#Such #long #break #not #usual #what #happened #Netflixs #girlfriend #RadhikaApte
