(moviemax.in) പാലക്കാട് നിയോജക മണ്ഡലത്തിലെ യുഡിഎഫ് സ്ഥാനാർത്ഥിയായി ജനവിധി തേടുന്ന രമേഷ് പിഷാരടിയെ പിന്തുണച്ചും അദ്ദേഹത്തിനെതിരെ ഉയരുന്ന വിമർശനങ്ങൾക്ക് മറുപടി നൽകിയും സംവിധായകൻ ആലപ്പി അഷ്റഫ് രംഗത്ത്.
മമ്മൂട്ടിയും പിഷാരടിയും തമ്മിലുള്ള ആഴത്തിലുള്ള സൗഹൃദത്തെ മുൻനിർത്തിയാണ് അദ്ദേഹം തന്റെ നിരീക്ഷണങ്ങൾ പങ്കുവെച്ചത്. വ്യക്തിജീവിതത്തിൽ വലിയ നിഷ്കർഷ പുലർത്തുന്ന മമ്മൂട്ടി, ക്ലീൻ ഇമേജില്ലാത്ത ഒരാളെയും തന്റെ അടുത്തേക്ക് അടുപ്പിക്കാറില്ലെന്നും പിഷാരടിയുടെ സ്വഭാവഗുണമാണ് അദ്ദേഹത്തെ മമ്മൂട്ടിയുടെ കുടുംബാംഗത്തെപ്പോലെ മാറ്റിയതെന്നും ആലപ്പി അഷ്റഫ് പറഞ്ഞു.
രമേഷ് പിഷാരടിയുടെ രാഷ്ട്രീയ പ്രവേശനം പലതരത്തിലുള്ള ആക്ഷേപങ്ങൾക്ക് വഴിവെച്ച പശ്ചാത്തലത്തിലാണ് സംവിധായകന്റെ ഈ പ്രതികരണം. ജയിച്ചാൽ മമ്മൂട്ടിയെ പാലക്കാട് എത്തിക്കുമെന്ന് പിഷാരടി പറഞ്ഞതിനെ ചിലർ പരിഹസിച്ചിരുന്നു.
എന്നാൽ ഒരു ജ്യേഷ്ഠസഹോദരനെപ്പോലെ കരുതുന്ന വ്യക്തിയെക്കുറിച്ച് സംസാരിക്കുന്നതിൽ എന്താണ് തെറ്റെന്ന് അദ്ദേഹം ചോദിക്കുന്നു. വിജ്ഞാനപ്രദമായ കാര്യങ്ങൾ സംസാരിക്കാനും ലോകകാര്യങ്ങൾ അപ്ഡേറ്റ് ചെയ്യാനും താൽപ്പര്യമുള്ള മമ്മൂട്ടി, അറിവുള്ളവരെ മാത്രമേ കൂടെക്കൂട്ടാറുള്ളൂ.
മുൻപും സിനിമയ്ക്ക് പുറത്തുള്ള പലരും മമ്മൂട്ടിക്കൊപ്പം ഇങ്ങനെ ഉണ്ടായിരുന്നെങ്കിലും പിഷാരടിയുടെ സെലിബ്രിറ്റി പദവി കാരണമാണ് ഈ ബന്ധം ഇപ്പോൾ ഇത്രയധികം ചർച്ച ചെയ്യപ്പെടുന്നത്. മമ്മൂട്ടിയുടെ അനുഗ്രഹം തേടിയതിനെ വിമർശിച്ചവർക്കും ആലപ്പി അഷ്റഫ് മറുപടി നൽകി.
കാൽനൂറ്റാണ്ടുകാലം കലാരംഗത്ത് യാതൊരുവിധ കളങ്കവുമില്ലാതെ പ്രവർത്തിച്ച വ്യക്തിയാണ് പിഷാരടിയെന്നും, ഗുരുസ്ഥാനീയനായ ഒരാളിൽ നിന്ന് അനുഗ്രഹം വാങ്ങുന്നത് സ്വാഭാവികമായ കാര്യമാണെന്നും അദ്ദേഹം വ്യക്തമാക്കി.
പിഷാരടിയുടെ വളർച്ചയിൽ അസൂയയോ കുശുമ്പോ ഇല്ലാത്ത വ്യക്തിത്വമാണ് അദ്ദേഹത്തിന്റേതെന്നും സിനിമയ്ക്കുള്ളിലെ എല്ലാവർക്കും അറിയാവുന്ന സത്യമാണിതെന്നും അദ്ദേഹം കൂട്ടിച്ചേർത്തു. വോട്ടിന് വേണ്ടിയുള്ള വെറും ബന്ധമല്ല ഇതെന്നും വ്യക്തിപരമായ ആദരവിന്റേതാണെന്നും അടിവരയിട്ടാണ് ആലപ്പി അഷ്റഫ് തന്റെ വാക്കുകൾ അവസാനിപ്പിക്കുന്നത്.
Content Highlight: The friendship between Ramesh Pisharody and Mammootty
.jpeg)