(moviemax.in) നടൻ ദുൽഖർ സൽമാനും 'ലോക' സിനിമയുടെ അണിയറപ്രവർത്തകരും ചേർന്ന് തന്നെ ഒതുക്കാൻ ശ്രമിക്കുന്നു എന്ന തരത്തിൽ പ്രചരിക്കുന്ന വാർത്തകൾക്ക് തക്കതായ മറുപടി നൽകി നടൻ ടൊവിനോ തോമസ്.
തന്റെ പുതിയ ചിത്രമായ 'പള്ളിച്ചട്ടമ്പി'യുടെ പ്രചാരണ പരിപാടിക്കിടെ ഒരു തമിഴ് മാധ്യമപ്രവർത്തകന്റെ ചോദ്യത്തോടാണ് താരം പ്രതികരിച്ചത്. ഇത്തരം ചോദ്യങ്ങൾ കേൾക്കുമ്പോൾ തമാശയാണ് തോന്നുന്നതെന്നും ദുൽഖർ തന്നോട് എന്നും ഏറ്റവും മാന്യമായും സ്നേഹത്തോടെയുമാണ് പെരുമാറിയിട്ടുള്ളതെന്നും ടൊവിനോ വ്യക്തമാക്കി.
താൻ സിനിമയിൽ അസിസ്റ്റന്റ് ഡയറക്ടറായി തുടങ്ങിയത് ദുൽഖർ നായകനായ 'തീവ്രം' എന്ന സിനിമയിലൂടെയാണെന്നും പിന്നീട് 'എബിസിഡി'യിൽ അദ്ദേഹത്തിന്റെ വില്ലനായി അഭിനയിച്ചതു മുതലുള്ള ആത്മബന്ധം ഇന്നും തുടരുന്നുണ്ടെന്നും ടൊവിനോ ഓർമ്മിപ്പിച്ചു.
തങ്ങൾ തമ്മിലുള്ള വാട്സാപ്പ് ചാറ്റുകൾ പരിശോധിച്ചാൽ പോലും ആ സൗഹൃദത്തിന്റെ ആഴം മനസ്സിലാകുമെന്നും പുറത്തുനിന്നു നോക്കുന്നവർക്ക് ഗോസിപ്പുകൾ പ്രചരിപ്പിക്കാൻ എളുപ്പമാണെന്നും താരം പറഞ്ഞു.
'ലോക' സിനിമയുടെ സംവിധായകൻ അരുണും നടി കല്യാണിയും നസ്ലിനും അടങ്ങുന്ന ടീമുമായി തനിക്ക് അടുത്ത ബന്ധമാണുള്ളത്. സിനിമയുടെ റിലീസ് സമയത്ത് തന്നെ ദുബായിലേക്ക് പ്രമോഷനായി വിളിച്ചതും താമസമൊരുക്കിയതും ദുൽഖർ തന്നെയാണെന്നും ടൊവിനോ വെളിപ്പെടുത്തി.
ഇല്ലാത്ത പിണക്കത്തിന്റെ പേരിൽ ഇത്തരം ഊഹാപോഹങ്ങൾ എന്തിനാണ് പ്രചരിപ്പിക്കുന്നതെന്ന് തനിക്ക് അറിയില്ലെന്നും ടൊവിനോ കൂട്ടിച്ചേർത്തു. ഡിജോ ജോസ് ആന്റണി സംവിധാനം ചെയ്യുന്ന ടൊവിനോയുടെ ബിഗ് ബജറ്റ് ചിത്രം 'പള്ളിച്ചട്ടമ്പി' ഏപ്രിൽ 10-ന് അഞ്ച് ഭാഷകളിലായി തീയേറ്ററുകളിലെത്തുകയാണ്.
1950-60 കാലഘട്ടത്തിലെ കഥ പറയുന്ന ഈ ചിത്രത്തിന്റെ പ്രമോഷൻ തിരക്കുകളിലാണ് താരം ഇപ്പോൾ. കയാദു ലോഹറാണ് ചിത്രത്തിലെ നായിക. ഏപ്രിൽ പത്തിന് ലോകമെമ്പാടും ചിത്രം റിലീസ് ചെയ്യും.
Content Highlight: Actor Tovino Thomas gave a befitting reply to the circulating news.
