( www.truevisionnews.com )ഇറാനെതിരെയുള്ള യുദ്ധത്തിനെതിരെ സംഘടിപ്പിക്കുന്ന പ്രതിഷേധങ്ങളെ ചോദ്യം ചെയ്യുന്നവർ സമൂഹത്തിന് അപമാനമാണെന്നും ലോകത്തിന്റെ ഏത് കോണിലുള്ളവന്റെയും വേദന സ്വന്തം വേദനയായി തിരിച്ചറിയുന്നതാണ് മനുഷ്യത്വമെന്നും എം. സ്വരാജ് അഭിപ്രായപ്പെട്ടു. യുദ്ധം എന്നത് മലയാളിക്ക് കേവലം ഒരു വാക്കു മാത്രമായിരിക്കാം, കാരണം അതിന്റെ യഥാർത്ഥ കെടുതികൾ നാം അനുഭവിച്ചിട്ടില്ല.
എന്നാൽ അമേരിക്കയും ഇസ്രായേലും ചേർന്ന് നടത്തുന്ന ആക്രമണങ്ങളിൽ പിടഞ്ഞുവീഴുന്ന കുഞ്ഞുങ്ങളുടെ ദൃശ്യങ്ങൾ അത്യന്തം ഹൃദയഭേദകമാണ്. യുദ്ധം പടരുമ്പോൾ മൃതദേഹങ്ങൾ സംസ്കരിക്കാൻ പോലും ആരുമില്ലാത്ത അവസ്ഥയുണ്ടാകുമെന്നും തെരുവുകളിൽ മനുഷ്യൻ മാലിന്യമായി മാറുന്ന ഭീകരതയാണ് വരാനിരിക്കുന്നതെന്നും അദ്ദേഹം ഓർമ്മിപ്പിച്ചു.
ലോകസമാധാനത്തിന് ഏറ്റവും വലിയ ഭീഷണി അമേരിക്കൻ ഭരണകൂടത്തിന്റെ സാമ്രാജ്യത്വ നയങ്ങളാണെന്ന് സ്വരാജ് കുറ്റപ്പെടുത്തി. ആണവായുധ നിർമ്മാണം ആരോപിച്ച് ഇറാനെ ആക്രമിക്കുന്ന അമേരിക്കയാണ് ലോകത്ത് ഏറ്റവും കൂടുതൽ ആണവശേഖരം കൈവശം വെച്ചിരിക്കുന്നത്.
മറ്റൊരു രാജ്യത്തിന് മേൽ ആദ്യമായി ആയുധം പ്രയോഗിച്ച ചരിത്രവും അവർക്ക് തന്നെയാണ്. ഇത്തരത്തിൽ ലോകമെമ്പാടുമുള്ള ജനജീവിതത്തെ തകർക്കുന്ന നീക്കങ്ങൾക്കെതിരെ ആഗോളതലത്തിൽ യുദ്ധവിരുദ്ധ പ്രസ്ഥാനങ്ങൾ ശക്തിപ്പെടുന്നത് വലിയ പ്രതീക്ഷ നൽകുന്നുണ്ടെന്നും അദ്ദേഹം കൂട്ടിച്ചേർത്തു.
'We must understand that someone else's pain is our own pain' - M Swaraj
