പ്രശസ്ത ഛായാഗ്രാഹകൻ കെ.യു. മോഹനന്റെ മകളാണെങ്കിലും താനൊരു 'സ്റ്റാർ കിഡ്' ആയിട്ടല്ല വളർന്നതെന്ന് വെളിപ്പെടുത്തുകയാണ് നടി മാളവിക മോഹനൻ. തന്റെ വളർച്ചാഘട്ടത്തിൽ സിനിമാ ലോകവുമായി യാതൊരു ബന്ധവുമില്ലായിരുന്നുവെന്നും, അച്ഛന്റെ ജോലി എന്നതിനപ്പുറം സിനിമ തന്റെ ജീവിതത്തിന്റെ ഭാഗമായിരുന്നില്ലെന്നും താരം പറയുന്നു. അച്ഛൻ ഉപജീവനത്തിനായി സിനിമയിൽ പ്രവർത്തിക്കുമ്പോഴും തങ്ങൾ ആ മേഖലയിൽ നിന്ന് മാറി തികച്ചും സാധാരണമായ ഒരു ജീവിതമാണ് നയിച്ചിരുന്നത്.
തന്റെ കരിയറിൽ അച്ഛന്റെ സിനിമാബന്ധങ്ങൾ യാതൊരു സ്വാധീനവും ചെലുത്തിയിട്ടില്ലെന്ന് മാളവിക ഉറപ്പിച്ചു പറയുന്നു. വെറും മൂന്നോ നാലോ തവണ മാത്രമാണ് താൻ അച്ഛന്റെ ഷൂട്ടിംഗ് സെറ്റുകൾ സന്ദർശിച്ചിട്ടുള്ളത്. സിനിമയുമായി ബന്ധപ്പെട്ട ആളുകളുമായി ഇടപഴകാനോ ആ ലോകത്തിന്റെ ഭാഗമാകാനോ തനിക്ക് അന്ന് അവസരങ്ങളുണ്ടായിരുന്നില്ല. അതുകൊണ്ടുതന്നെ ഇന്ന് താൻ നേടിയെടുത്ത സ്ഥാനത്തിന് പിന്നിൽ സ്വന്തം പ്രയത്നമാണെന്നും താരം കൂട്ടിച്ചേർത്തു.
അഭിനയത്തിലേക്ക് എത്തുന്നതിന് മുൻപ് ഒരു ഡോക്യുമെന്ററി ഫിലിം മേക്കർ ആകാനായിരുന്നു തനിക്ക് താല്പര്യമെന്ന് മാളവിക വെളിപ്പെടുത്തി. ഫിലിം ഫെയറിന് നൽകിയ അഭിമുഖത്തിലാണ് താരം തന്റെ മനസ്സ് തുറന്നത്. ദുൽഖർ സൽമാന്റെ നായികയായി 'പട്ടം പോലെ' എന്ന ചിത്രത്തിലൂടെ അരങ്ങേറിയ മാളവിക, ഇന്ന് മലയാളത്തിന് പുറമെ തമിഴിലും തെലുങ്കിലും മുൻനിര നായികമാരിൽ ഒരാളായി മാറിയിരിക്കുകയാണ്.
'I have not been associated with cinema since childhood, I am not a star kid'; Malavika Mohanan reveals
