---
title: "തനിക്കൊരിക്കലും ഒരു നടിയാകാന്‍ സാധിക്കില്ലെന്ന് പറഞ്ഞു , ഞാനന്ന് ഒരുപാട് കരഞ്ഞു:  തുറന്നു പറഞ്ഞ് കത്രീന കൈഫ്  "
english_title: "I cried a lot when I was told I could never become an actress: Katrina Kaif  "
publisher: "moviemax.in"
canonical_url: "https://moviemax.in/news/75984/i-cried-a-lot-when-i-was-told-i-could-never-become-an-actress-katrina-kaif"
published_at: "2022-10-22T21:22:00+05:30"
category: "Bollywood"
language: "ml"
image: "https://cf.zdn.im/img/truevisionnews.com/0/image-uploads/635412dc0f980_katrina.jpg"
keywords: []
---

# തനിക്കൊരിക്കലും ഒരു നടിയാകാന്‍ സാധിക്കില്ലെന്ന് പറഞ്ഞു , ഞാനന്ന് ഒരുപാട് കരഞ്ഞു:  തുറന്നു പറഞ്ഞ് കത്രീന കൈഫ്  

> **Lead Summary:** ഇന്ത്യന്‍ സിനിമയിലെ തന്നെ ഏറ്റവും കൂടുതല്‍ ആരാധകരുള്ള താരമാണ് കത്രീന കൈഫ് . ലണ്ടന്‍ സ്വദേശിയായ കത്രീന മോഡലിംഗിലൂടെയാണ് സിനിമയിലെത്തുന്നത്. ഒട്ടും സുഖകരമായിരുന്നില്ല കത്രീനയ്ക്ക് തുടക്കകാലം.

## Article Content

ഇന്ത്യന്‍ സിനിമയിലെ തന്നെ ഏറ്റവും കൂടുതല്‍ ആരാധകരുള്ള താരമാണ് കത്രീന കൈഫ് . ലണ്ടന്‍ സ്വദേശിയായ കത്രീന മോഡലിംഗിലൂടെയാണ് സിനിമയിലെത്തുന്നത്. ഒട്ടും സുഖകരമായിരുന്നില്ല കത്രീനയ്ക്ക് തുടക്കകാലം.

ആദ്യ സിനിമ വന്‍ പരാജയമായിരുന്നു. കരിയര്‍ തുടങ്ങും മുമ്പ് തന്നെ അവസാനിക്കുമെന്ന് പലരും വിധിയെഴുതിയിരുന്നു. എന്നാല്‍ പിന്നീട് തന്റെ അധ്വാനത്തിലൂടെ മുന്നോട് വരികയായിരുന്നു കത്രീന. ഇന്ന് ബോളിവുഡിലെ ഏറ്റവും തിരക്കേറിയ നായികമാരില്‍ ഒരാളാണ് കത്രീന കൈഫ്. ലോകമെമ്പാടും താരകത്തിന് ആരാധകരുണ്ട്. ഇപ്പോഴിതാ തന്റെ കരിയറിന്റെ തുടക്കകാലത്ത് നേരിട്ട അവഗണനകളെക്കുറിച്ച് മനസ് തുറക്കുകയാണ് കത്രീന കൈഫ്.

അഭിനയിച്ചു തുടങ്ങിയതിന് ശേഷം തന്നെ സിനിമയില്‍ നിന്നും പുറത്താക്കിയ സംഭവമാണ് കത്രീന കൈഫ് വെളിപ്പെടുത്തുന്നത്. ബോളിവുഡ് ബബിളിന് നല്‍കിയ അഭിമുഖത്തിലാണ് കത്രീന കൈഫ് മനസ് തുറക്കുന്നത്. സായ എന്ന ചിത്രത്തില്‍ അഭിനയിച്ച അനുഭവമാണ് കത്രീന പങ്കുവെക്കുന്നത്. ജോണ്‍ എബ്രഹാമായിരുന്നു ചിത്രത്തിലെ നായകന്‍.

കത്രീനയ്ക്ക് പകരം പിന്നീട് താര ശര്‍മ ചിത്രത്തിലെ നായികയായി എത്തുകയായിരുന്നു. അനുരാഗ് ബസുവായിരുന്നു സിനിമയുടെ സംവിധാനം. ഒരു ഷോട്ട് മാത്രം ചിത്രീകരിച്ച ശേഷമാണ് തന്നെ സിനിമയില്‍ നിന്നും പുറത്താക്കുന്നതെന്നും ഇതോടെ തന്റെ ജീവിതം തന്നെ അവസാനിച്ചതായി തോന്നിയെന്നുമാണ് കത്രീന പറയുന്നത്.

തന്റെ പുതിയ സിനിമയായ ഫോണ്‍ ഭൂതിന്റെ പ്രൊമോഷന്റെ ഭാഗമായി സംസാരിക്കുകയായിരുന്നു കത്രീന. അഭിനേതാവ് എന്ന നിലയില്‍ പലപ്പോഴും അവഗണനയും വിമര്‍ശനങ്ങളും നേരിടേണ്ടി വരും. എന്നാല്‍ അതിലൊന്നും തളരാതിരിക്കാനുള്ള കരുത്ത് നേടിയെടുക്കണമെന്നുമാണ് കത്രീന പറഞ്ഞത്. തനിക്കൊരിക്കലും ഒരു നടിയാകാന്‍ സാധിക്കില്ലെന്നായിരുന്നു അന്ന് പറഞ്ഞതെന്നും കത്രീന ഓര്‍ക്കുന്നുണ്ട്. ''ഞാന്‍ തുടങ്ങിയ സമയത്ത് എന്റെ മുഖത്ത് നോക്കി നീ നടിയാകില്ലെന്ന് പറഞ്ഞിട്ടുണ്ട്.

നിനക്ക് നല്ലതൊന്നുമില്ലെന്ന് നേരെ പറഞ്ഞു. ഞാനന്ന് ഒരുപാട് കരഞ്ഞു. കരയുന്നത് സഹായിക്കും. പക്ഷെ പിന്നീട് നമ്മള്‍ക്കുള്ള ആഗ്രഹത്തില്‍ ഉറച്ചു നില്‍ക്കണം. കഠിനാധ്വാനം ചെയ്യണം, കരുത്തയാകണം'' എന്നാണ് കത്രീന പറയുന്നത്. ആ സിനിമ നഷ്ടമായെങ്കിലും കത്രീന പിന്നീട് ശക്തമായി തന്നെ ബോളിവുഡിലെ മുന്‍നിരയിലേക്ക് എത്തുകയായിരുന്നു.

### Related Links & Sources
- [Original Story Source](https://moviemax.in/news/75984/i-cried-a-lot-when-i-was-told-i-could-never-become-an-actress-katrina-kaif)