കോഴിക്കോട് പാളയം കൊലപാതകം: ബന്ധുവായ യുവാവ് അറസ്റ്റിൽ വ്യക്തിവൈരാഗ്യമെന്ന് പോലീസ്

കോഴിക്കോട്: (truevisionnews.com) കോഴിക്കോട് പാളയത്ത് ക്ഷീരകർഷകനായ യുവാവിനെ വീട്ടിൽ കഴുത്തറുത്ത് കൊലപ്പെടുത്തിയ കേസിൽ ബന്ധുവായ യുവാവ് അറസ്റ്റിൽ. കുളങ്ങര പീടിക സ്വദേശി ദീപക് (21) ആണ് പിടിയിലായത്. വ്യക്തിവൈരാഗ്യമാണ് കൊലപാതകത്തിന് കാരണമെന്ന് പോലീസ് അറിയിച്ചു.

പാളയം പുതിയ കോവിലകം പറമ്പിൽ ബി. ബിജു (38) ആണ് കൊല്ലപ്പെട്ടത്. ഞായറാഴ്ച പുലർച്ചെ മൂന്നോടെയാണ് ദാരുണമായ സംഭവം നടന്നത്. സ്വന്തം വീടിനോട് ചേർന്നുള്ള ഒറ്റമുറി വീട്ടിൽ താമസിച്ചിരുന്ന ബിജു, പശുവിനെ കറക്കാൻ പുലർച്ചെ എഴുന്നേൽക്കാത്തതിനെ തുടർന്ന് അമ്മ ബേബി ചെന്നുനോക്കിയപ്പോഴാണ് രക്തത്തിൽ കുളിച്ചുകിടക്കുന്ന നിലയിൽ കണ്ടത്. തുടർന്ന് സിസിടിവി ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിലാണ് പ്രതിയെ പോലീസ് വലയിലാക്കിയത്.

മൂർച്ചയേറിയ കത്തിയുപയോഗിച്ചാണ് കൊലപാതകം നടത്തിയത്. ബിജുവിന്റെ ശരീരത്തിൽ 45-ഓളം കുത്തുകളേറ്റിട്ടുണ്ടെന്നും ഇതിൽ 18 എണ്ണം കഴുത്തിലാണെന്നും പോലീസ് വ്യക്തമാക്കി. പ്രദേശത്തെ ലഹരി മാഫിയക്കെതിരെ 'ഓപ്പറേഷൻ തൂഫാന്റെ' ഭാഗമായി വിവരങ്ങൾ നൽകിയതിലുള്ള വൈരാഗ്യമാണ് കൊലപാതകത്തിന് കാരണമെന്ന് ബന്ധുക്കൾ ആരോപിച്ചിരുന്നെങ്കിലും പോലീസ് ഇത് തള്ളി.

ടൗൺ അസിസ്റ്റന്റ് പോലീസ് കമ്മീഷണറുടെ നേതൃത്വത്തിലുള്ള പ്രത്യേക അന്വേഷണ സംഘത്തിലെ കസബ ഇൻസ്പെക്ടർ ജിമ്മി, എസ്.ഐ നിമിൻ കെ. ദിവാകരൻ, ക്രൈംസ്ക്വാഡ് അംഗങ്ങൾ എന്നിവരാണ് പ്രതിയെ പിടികൂടിയത്.

Content Highlight: Kozhikode Palayam Murder: Relative Arrested for Killing Dairy Farmer Biju

#Latest news #Kozhikode News #Palayam Murder #Dairy Farmer Killed #Kerala Police #Crime