#FIFA World Cup #Kerala Schools Holiday #Pala Municipality #Diya Binu #Students #Kerala Education
പാലാ: ( www.truevisionnews.com ) ഫിഫ ലോകകപ്പ് ഫൈനൽ മത്സരം ഞായറാഴ്ച അർധരാത്രിയോടെ നടക്കുന്ന സാഹചര്യത്തിൽ, തിങ്കളാഴ്ച സംസ്ഥാനത്തെ എല്ലാ സ്കൂളുകൾക്കും കോളജുകൾക്കും അവധി പ്രഖ്യാപിക്കണമെന്ന് പാലാ നഗരസഭാ ചെയർപേഴ്സൺ ദിയ ബിനു പുളിക്കകണ്ടം ആവശ്യപ്പെട്ടു.
വിദ്യാർഥികളിൽ കായികവിനോദങ്ങളോടുള്ള താത്പര്യം വർധിപ്പിക്കുന്നതിന്റെ ഭാഗമായാണ് ഈ ആവശ്യം ഉന്നയിച്ചതെന്ന് ചെയർപേഴ്സൺ വ്യക്തമാക്കി. ഇത് സംബന്ധിച്ച് സംസ്ഥാന പൊതുവിദ്യാഭ്യാസ വകുപ്പ് മന്ത്രിക്കും ഉന്നത വിദ്യാഭ്യാസ വകുപ്പ് മന്ത്രിക്കും നിവേദനം നൽകിയിട്ടുണ്ടെന്നും അവർ അറിയിച്ചു.
അർധരാത്രി വരെ ലോകകപ്പ് ഫൈനൽ കാണുന്ന കുട്ടികൾക്ക് പിറ്റേദിവസം ഉറക്കക്കുറവും ക്ഷീണവും അനുഭവപ്പെടും. അത് ഒഴിവാക്കുന്നതിനൊപ്പം കായികമത്സരങ്ങളോടുള്ള കുട്ടികളുടെ പങ്കാളിത്തം വർധിപ്പിക്കാനും ഈ തീരുമാനം സഹായിക്കുമെന്ന് ദിയ ബിനു പറഞ്ഞു.
സ്കൂൾ മാനേജ്മെന്റുകൾക്കും ഇതേ മാതൃകയിൽ വിദ്യാർഥികൾക്ക് അവധി അനുവദിക്കണമെന്ന് ചെയർപേഴ്സൺ അഭ്യർഥിച്ചു. ലോകകപ്പ് പോലുള്ള ആഗോള കായികമേളകൾ കുട്ടികളിൽ കായികരംഗത്തോടുള്ള താൽപര്യം വളർത്തിയെടുക്കാൻ മികച്ച അവസരമാണെന്നും അവർ അഭിപ്രായപ്പെട്ടു.
ലഹരിക്കും മയക്കുമരുന്നിനും സോഷ്യൽ മീഡിയയുടെ ദുരുപയോഗത്തിനുമെതിരായ ബോധവത്കരണത്തിൽ കായികരംഗത്തിന് വലിയ പങ്കുണ്ട്. കുട്ടികളെ ഇത്തരം ദൂഷ്യവശങ്ങളിൽ നിന്ന് സംരക്ഷിക്കുന്നതിന് കായികപ്രവർത്തനങ്ങൾ പ്രോത്സാഹിപ്പിക്കേണ്ടത് അനിവാര്യമാണെന്ന് ചെയർപേഴ്സൺ ചൂണ്ടിക്കാട്ടി.
ശാരീരികക്ഷമത വർധിപ്പിക്കുന്നതിനൊപ്പം അച്ചടക്കം, മാനസികാരോഗ്യം, കൂട്ടായ്മ, നേതൃത്വഗുണം, പ്രതിസന്ധികളെ ആത്മവിശ്വാസത്തോടെ നേരിടാനുള്ള കഴിവ് എന്നിവ വളർത്തിയെടുക്കാനും കായികം സഹായിക്കുന്നുണ്ടെന്ന് ദിയ ബിനു പറഞ്ഞു.
ഫുട്ബോൾ ലോകകപ്പ് പോലുള്ള വലിയ ടൂർണമെന്റുകൾ കുട്ടികളിൽ ടീം വർക്കിന്റെയും കായിക മനോഭാവത്തിന്റെയും പ്രാധാന്യം എത്തിക്കുമെന്നും, അതിനാൽ സർക്കാർ അനുകൂലമായി പരിഗണിക്കണമെന്നും അവർ കൂട്ടിച്ചേർത്തു.
Content Highlight: Pala Municipal Chairperson Demands Holiday for Schools and Colleges After FIFA World Cup Final
#FIFA World Cup #Kerala Schools Holiday #Pala Municipality #Diya Binu #Students #Kerala Education
