രാത്രി 6 മുതൽ 11 വരെ സൂക്ഷിക്കുക, പണി വരുന്നുണ്ട്....! സംസ്ഥാനത്ത് ഇന്നും വൈദ്യുതി നിയന്ത്രണം; പീക്ക് സമയങ്ങളിൽ ഭാഗിക കട്ട്

തിരുവനന്തപുരം: ( www.truevisionnews.com) സംസ്ഥാനത്ത് ഇന്നും വൈദ്യുതി നിയന്ത്രണത്തിന് സാധ്യതയുണ്ടെന്ന് കെ.എസ്.ഇ.ബി അറിയിച്ചു. പീക്ക് സമയങ്ങളിൽ ഭാഗികമായി വൈദ്യുതി നിയന്ത്രണം ഏർപ്പെടുത്തേണ്ടി വന്നേക്കാമെന്നാണ് വൈദ്യുതി ബോർഡിന്റെ മുന്നറിയിപ്പ്.തുടർച്ചയായി അഞ്ചാം ദിനമാണ് സംസ്ഥാനത്ത് വൈദ്യുതി നിയന്ത്രണം നേരിടുന്നത്.

സംസ്ഥാനത്തെ വൈദ്യുതി ഉപഭോഗം ഉയർന്നതും സംസ്ഥാനത്തിന് പുറത്ത് നിന്നുള്ള വൈദ്യുതി ലഭ്യത കുറഞ്ഞതുമാണ് നിയന്ത്രണത്തിന് കാരണമായി കെ.എസ്.ഇ.ബി ചൂണ്ടിക്കാട്ടുന്നത്.വൈകുന്നേരം 6 മണി മുതൽ രാത്രി 11 മണി വരെയുള്ള പീക്ക് സമയങ്ങളിലാണ് പ്രധാനമായും നിയന്ത്രണം ഉണ്ടാകാൻ സാധ്യത.

വാണിജ്യ സ്ഥാപനങ്ങൾ, വലിയ ഉപഭോക്താക്കൾ എന്നിവരോട് ഈ സമയങ്ങളിൽ വൈദ്യുതി ഉപയോഗം പരമാവധി കുറയ്ക്കാൻ കെ.എസ്.ഇ.ബി ആവശ്യപ്പെട്ടിട്ടുണ്ട്.കഴിഞ്ഞ ദിവസങ്ങളിലും സംസ്ഥാനത്തിന്റെ വിവിധ ഭാഗങ്ങളിൽ നിർബന്ധിത ലോഡ് ഷെഡിംഗ് നടത്തിയിരുന്നു.

ജലവൈദ്യുത പദ്ധതികളിലെ സംഭരണം കുറയുന്നതും കൽക്കരി ക്ഷാമം മൂലം പുറത്ത് നിന്നുള്ള വൈദ്യുതി വാങ്ങുന്നതിൽ ബുദ്ധിമുട്ടും നിയന്ത്രണത്തിന് കാരണമായിട്ടുണ്ട്.ഉപഭോക്താക്കൾ അനാവശ്യ ലൈറ്റുകളും ഫാനുകളും എയർ കണ്ടീഷണറുകളും ഓഫ് ചെയ്യണമെന്നും വൈദ്യുതി ലാഭിക്കാൻ എല്ലാവരും സഹകരിക്കണമെന്നും കെ.എസ്.ഇ.ബി അഭ്യർത്ഥിച്ചു.

Also read: സുധിയുടെ മരണ ശേഷം രേണുവിന്റെ ഓട്ടം കണ്ട ചിലരുടെ കണ്ണ് തട്ടിയോ? ഇനി നാല് കീമോയും ഓപ്പറേഷനും, ലക്ഷങ്ങൾ വേണം; രേണു സുധി

വരും ദിവസങ്ങളിലും സാഹചര്യം ഇതുപോലെ തുടർന്നാൽ കൂടുതൽ കർശനമായ നിയന്ത്രണങ്ങൾ ഏർപ്പെടുത്തേണ്ടി വരുമെന്നും ബോർഡ് വ്യക്തമാക്കി.അതേസമയം നിലവിലെ പ്രതിസന്ധി മറികടക്കാൻ അധിക വൈദ്യുതി സംഭരിക്കുന്നതിനുള്ള ശ്രമങ്ങൾ നടക്കുന്നുണ്ടെന്നും ഉടൻ സ്ഥിതി മെച്ചപ്പെടുമെന്ന പ്രതീക്ഷയുണ്ടെന്നും കെ.എസ്.ഇ.ബി അധികൃതർ അറിയിച്ചു.

Content Highlight: Power Cuts Likely In Kerala Today, KSEB Announces Partial Restrictions

#KSEB #Power Cut #Kerala Electricity #Load Shedding #Power Restriction