'ദൈവമേ, ജീവനോടെ കിട്ടണേ...ഒടുവിൽ ആ മണ്ണിനടിയിൽ നിന്ന് ഒരു കൈയുടെ സ്പർശം, പക്ഷേ ജീവനോടെയല്ല... '; കള്ളാടി ദുരന്തഭൂമിയിലെ വേദന പങ്കുവെച്ച് മുക്കം ഫയർ ഓഫീസറുടെ കുറിപ്പ്

വയനാട്: ( www.truevisionnews.com) ഉരുൾപൊട്ടൽ വിഴുങ്ങിയ വയനാട് കള്ളാടിയിലെ രക്ഷാപ്രവർത്തനത്തിനിടെ താൻ അനുഭവിച്ച തീരാവേദനകൾ പങ്കുവെച്ച് മുക്കം ഫയർ സ്റ്റേഷൻ ഓഫീസർ എം.എ. ഗഫൂർ.

കള്ളാടിയിലെ മണ്ണടിഞ്ഞ ദുരന്തഭൂമിയിൽ നിന്ന് മൃതദേഹം കണ്ടെടുത്ത ആ നിമിഷം തന്റെ മനസ്സിലുണ്ടായിരുന്ന വിങ്ങലുകളെക്കുറിച്ച് ഫേസ്ബുക്ക് കുറിപ്പിലൂടെയാണ് അദ്ദേഹം വിവരിച്ചത്.

കുറിപ്പിന്റെ പൂർണ രൂപം

"എന്തൊരു വിധിയാണിത്..!! ഹൃദയാന്തരങ്ങളിലുള്ള സങ്കടം മഴയായി പെയ്യുന്നുണ്ട്.. ആ മണ്ണ് കോരിയെടുക്കുമ്പോൾ ഞങ്ങൾ തേടിയത് ഒരു മനുഷ്യനെ ആയിരുന്നു... ഓരോ മൺതരിയും മാറ്റുമ്പോഴും മനസ്സിൽ ഒരേയൊരു പ്രാർത്ഥനയായിരുന്നു — "ദൈവമേ, ജീവനോടെ കിട്ടണേ..." മണിക്കൂറുകളോളം നീണ്ട തിരച്ചിൽ... പ്രതീക്ഷയും നിരാശയും മാറിമാറി വന്ന നിമിഷങ്ങൾ... ഒടുവിൽ ആ മണ്ണിനടിയിൽ നിന്ന് ഒരു കൈയുടെ സ്പർശം അനുഭവപ്പെട്ടു. ആ നിമിഷം ഹൃദയം ഒന്ന് പിടഞ്ഞു. കണ്ടെത്തി...

Also read: തൃഷയുടെ വീട്ടിലെ സുന്ദരിക്കുട്ടി ഇസി ആരുടെ മകൾ? രഹസ്യം വെളിപ്പെടുത്തി നടൻ വിഷ്ണു വിശാൽ

പക്ഷേ ജീവനോടെയല്ല... ആ നിമിഷം ആ മണ്ണ് ഭാരമായിരുന്നില്ല, മറിച്ച് ഒരു കുടുംബത്തിന്റെ സ്വപ്നങ്ങളും പ്രതീക്ഷകളും കണ്ണീരും ഞങ്ങളുടെ കൈകളിലേക്ക് വീണതുപോലെയായിരുന്നു.

രക്ഷാപ്രവർത്തകരായ ഞങ്ങൾ പലതും കാണാറുണ്ട്. പക്ഷേ ചില കാഴ്ചകൾ യൂണിഫോം ധരിച്ച ഞങ്ങളുടെ മനസ്സുകളെയും തളർത്തും. ചില നിശബ്ദതകൾ ഞങ്ങളുടെ ഫയർ എഞ്ചിനുകളുടെ സൈറണുകളുടെ ശബ്ദത്തേക്കാൾ ഉച്ചത്തിൽ ഹൃദയത്തെ കീറിമുറിക്കും.

ആ മണ്ണിനടിയിൽ കിടന്നത് ഒരു മൃതദേഹം മാത്രമായിരുന്നില്ല... ആരുടെയോ മകൻ... ആരുടെയോ സഹോദരൻ... ആരുടെയോ ഭർത്താവ്... ആരുടെയോ ലോകം മുഴുവൻ... കരഞ്ഞുകൊണ്ട് കാത്തിരിക്കുന്ന ആ കുടുംബത്തിന്റെ മുഖങ്ങൾ ഇവിടെ ഈ മൺ കൂനകൾക്കിടയിൽ നിന്ന് ഞാൻ മനസ്സിൽ കാണുന്നുണ്ട്... ജീവൻ രക്ഷിക്കാൻ ഓടിയെത്തുന്ന ഞങ്ങൾക്ക് ചിലപ്പോൾ മരണത്തെ മാത്രം തിരിച്ചേൽപ്പിക്കേണ്ടി വരും. അതാണ് ഈ ജോലിയുടെ ഏറ്റവും വലിയ വേദന... നിസ്സഹായതയും..

വിറ കൈകളോടെയാണ് മൊബൈലിൽ ഈ ചിത്രം പകർത്തുന്നത്.. ഇന്നും ഈ ചിത്രം കാണുമ്പോൾ കൈകളിൽ മണ്ണിന്റെ തണുപ്പും ഹൃദയത്തിൽ ആ കുടുംബത്തിന്റെ കണ്ണീരും ഞാൻ അനുഭവിക്കുന്നു... ചില രക്ഷാപ്രവർത്തനങ്ങൾ ഡ്യൂട്ടി അവസാനിക്കുമ്പോൾ അവസാനിക്കും... ചിലത് ജീവിതകാലം മുഴുവൻ മനസ്സിൽ കിടക്കും.

"ആ മനുഷ്യനെ ഞങ്ങൾ കണ്ടെത്തി... പക്ഷേ അദ്ദേഹത്തെ കാത്തിരുന്നവരുടെ സന്തോഷം കണ്ടെത്താൻ കഴിഞ്ഞില്ല."

Also read: തെലുങ്കിൽ വീണ്ടും ദുൽഖർ സൽമാൻ; പൂജ ഹെഗ്ഡെയ്ക്കൊപ്പം ഒന്നിക്കുന്ന 'ശ്രീ ശ്രീ' ഫസ്റ്റ് ലുക്ക് പുറത്ത്

ഒന്ന് മിണ്ടാൻ പോലുമാവാത്ത നിസ്സഹായതയിൽ മനസ്സ് മരവിച്ചാണ് കള്ളാടിയിൽ നിന്ന് തിരിച്ചു പോരുന്നത്.. ദുരന്തമുണ്ടായ ഉടനെ ഓടിയെത്തിയതാണ് കള്ളാടി തുരങ്ക പാതക്കരികിലെ മൺ മലകൾക്കിടയിൽ..

കാണാതായവർക്കായുള്ള തിരച്ചിലിനിടെ കണ്ട രക്തക്കറ മണ്ണ് മാറ്റി മാറ്റി ചെന്നെത്തിയ ഇരുമ്പ് പൈപ്പുകൾക്കിടയിലെ ഈ വിരലുകൾ എത്രയോ പേരുടെ സ്വപ്നങ്ങളുടെ നിറങ്ങൾ നഷ്ടപ്പെട്ട അവസ്ഥയിലാണെന്നത് ഏറെ സങ്കടകരം.. ആത്മാവിന് നിത്യശാന്തി നേരുന്നു.. എല്ലാം താങ്ങാനുള്ള ക്ഷമ ദൈവം ആ കുടുംബത്തിന് നൽകട്ടെ.. നെഞ്ചുലക്കുന്ന ദുരന്തങ്ങൾ ആവർത്തിക്കാതിരിക്കട്ടെ..

Content Highlight: Kalladi landslide, Wayanad tunnel road accident, Mukkam Fire Officer, Facebook Post

#Latest News #Kalladi Landslide #Wayanad Tunnel Road Accident #Mukkam Fire Officer #Facebook Post