#latest news #CM Satheeshan #Malayali nurses #UAE
തിരുവനന്തപുരം: (truevisionnews.com) ദുബായിലെ പ്രമുഖ ആശുപത്രി അപ്രതീക്ഷിതമായി പൂട്ടിയതിനെ തുടർന്ന് നിരവധി മലയാളി നഴ്സുമാർ തൊഴിൽരഹിതരായ സാഹചര്യത്തിൽ, പ്രധാനമന്ത്രി നരേന്ദ്ര മോദിയുടെ അടിയന്തര ഇടപെടൽ തേടി കേരള മുഖ്യമന്ത്രി. തൊഴിൽ നഷ്ടപ്പെട്ട നഴ്സുമാർക്കും അവരുടെ കുടുംബങ്ങൾക്കും സുരക്ഷിതത്വം ഉറപ്പാക്കാൻ യു.എ.ഇ ഭരണകൂടവുമായി കേന്ദ്ര സർക്കാർ അടിയന്തരമായി നയതന്ത്ര ചർച്ച നടത്തണമെന്ന് മുഖ്യമന്ത്രി കത്തിലൂടെ ആവശ്യപ്പെട്ടു.
ആശുപത്രി പെട്ടെന്ന് അടച്ചുപൂട്ടിയതോടെ കേരളത്തിൽ നിന്നുള്ള നഴ്സുമാർ അടക്കം നൂറുകണക്കിന് ഇന്ത്യാക്കാരാണ് പ്രതിസന്ധിയിലായത്. ഇത് കേവലം ഒരു തൊഴിൽ നഷ്ടം മാത്രമല്ലെന്നും, നിരവധി പ്രവാസി കുടുംബങ്ങളെ ഇത് കടുത്ത മാനസിക-സാമ്പത്തിക പ്രതിസന്ധിയിലാക്കിയിട്ടുണ്ടെന്നും കത്തിൽ ചൂണ്ടിക്കാട്ടുന്നു.
മുഖ്യമന്ത്രിയുടെ പ്രധാന ആവശ്യങ്ങൾ:
ബദൽ തൊഴിൽ സൗകര്യം: ജോലി നഷ്ടപ്പെട്ട നഴ്സുമാർക്ക് യു.എ.ഇയിൽ തന്നെ മറ്റ് ബദൽ തൊഴിൽ സംവിധാനങ്ങൾ കണ്ടെത്താൻ കേന്ദ്രസർക്കാർ മുൻകൈ എടുക്കണം.
നിയമപരമായ സംരക്ഷണം: വിസ കാലാവധി അവസാനിക്കുന്നത് അടക്കമുള്ള സാങ്കേതിക പ്രശ്നങ്ങളിൽ നഴ്സുമാർക്ക് നിയമപരമായ സംരക്ഷണം ഉറപ്പാക്കാൻ നയതന്ത്രതലത്തിൽ ഇടപെടണം.
പ്രതിസന്ധിയിലായ നഴ്സുമാരുടെ കൃത്യമായ വിവരങ്ങൾ ശേഖരിക്കാനും അവർക്ക് ആവശ്യമായ നിയമസഹായം ലഭ്യമാക്കാനും മുഖ്യമന്ത്രി നോർക്കയോട് (NORKA) അടിയന്തരമായി ആവശ്യപ്പെട്ടിട്ടുണ്ട്. കേന്ദ്ര സർക്കാരിന്റെ വേഗത്തിലുള്ള ഇടപെടൽ ദുരിതത്തിലായ പ്രവാസികൾക്ക് വലിയ ആശ്വാസമാകുമെന്നും മുഖ്യമന്ത്രി വ്യക്തമാക്കി.
Content Highlight: Hospital closed in Dubai; CM seeks PM's intervention in job loss of Malayali nurses
