#Latest News #Kasargod #Winds May Gust To 50 Kmph #Alert
കാസർകോട്: (truevisionnews.com) സംസ്ഥാനത്ത് കാലവർഷം കനക്കുന്നതിനൊപ്പം അതിശക്തമായ കാറ്റിനും സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് മുന്നറിയിപ്പ് നൽകി. കാസർകോട് ഉൾപ്പെടെയുള്ള ജില്ലകളിൽ മണിക്കൂറിൽ 40 മുതൽ 50 കിലോമീറ്റർ വരെ വേഗതയിൽ കാറ്റ് വീശിയടിച്ചേക്കാമെന്നാണ് റിപ്പോർട്ടുകൾ.
ഈ സാഹചര്യത്തിൽ പൊതുജനങ്ങൾ കനത്ത ജാഗ്രത പാലിക്കണമെന്ന് ദുരന്തനിവാരണ അതോറിറ്റി നിർദ്ദേശിക്കുന്നു. ശക്തമായ കാറ്റിൽ മരങ്ങൾ കടപുഴകിയും ചില്ലകൾ ഒടിഞ്ഞുവീണും വലിയ അപകടങ്ങൾക്ക് സാധ്യതയുള്ളതിനാൽ, മഴയും കാറ്റുമുള്ളപ്പോൾ ഒരു കാരണവശാലും മരങ്ങളുടെ ചുവട്ടിൽ നിൽക്കാനോ വാഹനങ്ങൾ പാർക്ക് ചെയ്യാനോ പാടില്ല.
വീട്ടുവളപ്പിൽ അപകടഭീഷണിയുയർത്തുന്ന മരച്ചില്ലകൾ നേരത്തെ തന്നെ വെട്ടിയൊതുക്കാനും പൊതുവിടങ്ങളിൽ ഇത്തരം മരങ്ങൾ ശ്രദ്ധയിൽ പെട്ടാൽ തദ്ദേശ സ്ഥാപനങ്ങളെ അറിയിക്കാനും നിർദ്ദേശമുണ്ട്.
കാറ്റിന്റെ വേഗത ജനജീവിതത്തെ ബാധിക്കാതിരിക്കാൻ മുൻകരുതലുകൾ അനിവാര്യമാണ്. വീടുകളിലെയും സ്ഥാപനങ്ങളിലെയും ഉറപ്പില്ലാത്ത പരസ്യ ബോർഡുകൾ, ഇലക്ട്രിക് പോസ്റ്റുകൾ, കൊടിമരങ്ങൾ എന്നിവ മുൻകൂട്ടി ബലപ്പെടുത്തുകയോ അഴിച്ചുവെക്കുകയോ ചെയ്യണം.
കാറ്റിൽ വീഴാൻ സാധ്യതയുള്ള കോണി പോലുള്ള ഉപകരണങ്ങൾ സുരക്ഷിതമായി കെട്ടിവെക്കണം. കാറ്റ് വീശിത്തുടങ്ങിയാൽ ജനലുകളും വാതിലുകളും പൂർണ്ണമായി അടച്ചിടുകയും ടെറസിലോ ജനൽക്കരുകളിലോ നിൽക്കുന്നത് ഒഴിവാക്കുകയും വേണം.
ഓലമേഞ്ഞതോ ഷീറ്റ് പാകിയതോ ആയ അടച്ചുറപ്പില്ലാത്ത വീടുകളിൽ താമസിക്കുന്നവർ സുരക്ഷിത സ്ഥാനങ്ങളിലേക്ക് മാറിത്താമസിക്കാൻ തയ്യാറാകണം. ഇവരെ മാറ്റാൻ റവന്യൂ ഉദ്യോഗസ്ഥരും ജനപ്രതിനിധികളും മുൻകൈ എടുക്കും.
വൈദ്യുതി ലൈനുകളും പോസ്റ്റുകളും പൊട്ടിവീഴാൻ സാധ്യത കൂടുതലായതിനാൽ കാറ്റുള്ളപ്പോൾ അറ്റകുറ്റപ്പണികൾ ഒഴിവാക്കണം. പൊതുജനങ്ങൾ സ്വയം ഇത്തരം റിപ്പയർ വർക്കുകൾക്ക് മുതിരരുത്.
അതിരാവിലെ ജോലിക്ക് ഇറങ്ങുന്ന പത്രം, പാൽ വിതരണക്കാർ വഴികളിലെ വെള്ളക്കെട്ടുകളിൽ ലൈനുകൾ പൊട്ടിവീണിട്ടില്ലെന്ന് ഉറപ്പാക്കണം. കൃഷിയിടങ്ങളിലെ വൈദ്യുത ലൈനുകൾ സുരക്ഷിതമാണെന്ന് ഉറപ്പുവരുത്തിയ ശേഷമേ പാടത്തിറങ്ങാവൂ.
നിർമ്മാണ തൊഴിലാളികൾ കാറ്റും മഴയും ശക്തമാകുമ്പോൾ ജോലി നിർത്തിവെച്ച് സുരക്ഷിത സ്ഥാനങ്ങളിലേക്ക് മാറണമെന്നും അധികൃതർ കർശനമായി ഓർമ്മിപ്പിക്കുന്നു.
Content Highlight: The Central Meteorological Department has said that there is a possibility of very strong winds along with heavy monsoon in the state.
