(moviemax.in) ബോളിവുഡ് നടൻ സണ്ണി ഡിയോൾ പാപ്പരാസികളോട് കടുത്ത അസന്തോഷം പ്രകടിപ്പിച്ചു. അച്ഛനും ഇതിഹാസ നടനുമായ ധർമേന്ദ്രയുടെ ആരോഗ്യനിലയെ കുറിച്ച് ചിത്രീകരണം നടത്താനെത്തിയ മാധ്യമപ്രവർത്തകരോട് സണ്ണി ഡിയോൾ നേരിട്ട് ചോദ്യം ഉന്നയിച്ചു.
“ഇങ്ങനെ പിന്നാലെ നടന്ന് ശല്യം ചെയ്യാൻ നിങ്ങൾക്ക് നാണമില്ലേ? നിങ്ങൾക്കും വീട്ടിൽ അച്ഛനമ്മമാരില്ലേ? കുട്ടികളില്ലേ?” — എന്ന് ചോദിച്ചുകൊണ്ട് പാപ്പരാസികളോട് കൈകൂപ്പി സംസാരിക്കുന്ന വീഡിയോയാണ് ഇപ്പോൾ സോഷ്യൽ മീഡിയയിൽ വൈറലാകുന്നത്.
ധർമേന്ദ്ര ആശുപത്രിയിൽ നിന്ന് ഡിസ്ചാർജ് ചെയ്ത് ജൂഹുവിലെ വീട്ടിൽ വിശ്രമിക്കുന്ന സമയത്താണ് സംഭവം നടന്നത്. വീടിനു മുന്നിൽ കാത്തിരുന്ന പാപ്പരാസികളോട് സണ്ണി കടുത്ത ഭാഷയിൽ പ്രതികരിച്ചു. സംഭവത്തിനുശേഷം പോലീസ് സ്ഥലത്തെത്തി മാധ്യമപ്രവർത്തകരെ മാറ്റിനിർത്തി.
സോഷ്യൽ മീഡിയയിലൂടെ നിരവധി ആരാധകരാണ് സണ്ണി ഡിയോളിനെ പിന്തുണച്ചത്. “അദ്ദേഹം പറഞ്ഞത് തെറ്റല്ല, സ്വകാര്യത കാത്തുസൂക്ഷിക്കേണ്ടത് മാധ്യമങ്ങൾക്കും ബാധ്യതയാണ്” — എന്നതാണ് ഭൂരിഭാഗം പേരുടെയും അഭിപ്രായം.
ധർമേന്ദ്രയെ ആശുപത്രിയിൽ നിന്ന് ബുധനാഴ്ച ഡിസ്ചാർജ് ചെയ്തതോടെ, പാപ്പരാസികൾ അദ്ദേഹത്തിന്റെ വസതിക്ക് മുന്നിൽ എത്തുകയും അയൽവാസികൾക്കും ബുദ്ധിമുട്ട് നേരിടേണ്ടിവരികയും ചെയ്തിരുന്നു. ഇതിന്റെ പശ്ചാത്തലത്തിലാണ് സണ്ണി ഡിയോൾ പൊട്ടിത്തെറിച്ചത്.
Filming about actor Dharmendra's health condition, Online media, Sunny Deol,
