(moviemax.in) രജനികാന്ത് നായകനായ ലോകേഷ് കനകരാജ് ചിത്രം 'കൂലി'ക്ക് ലഭിച്ച 'എ' സർട്ടിഫിക്കറ്റ് റദ്ദാക്കണമെന്ന് ആവശ്യപ്പെട്ട് നിർമ്മാതാക്കളായ സൺ പിക്ചേഴ്സ് മദ്രാസ് ഹൈക്കോടതിയിൽ ഹർജി നൽകി. സമീപകാലത്ത് ഇറങ്ങിയ മറ്റ് തമിഴ് സിനിമകളെ അപേക്ഷിച്ച് 'കൂലി'യിൽ വയലൻസ് രംഗങ്ങൾ കുറവാണെന്നും അതിനാൽ 'യു/എ' സർട്ടിഫിക്കറ്റ് നൽകണമെന്നുമാണ് നിർമ്മാതാക്കളുടെ പ്രധാന ആവശ്യം.
'എ' സർട്ടിഫിക്കറ്റ് കാരണം കുട്ടികളായ പ്രേക്ഷകർക്ക് സിനിമ കാണാൻ സാധിക്കാതെ വരുന്നു എന്നതാണ് ഹർജിയിൽ സൺ പിക്ചേഴ്സ് ചൂണ്ടിക്കാണിക്കുന്നത്. രജനികാന്തിന്റെ വലിയൊരു ആരാധകവൃന്ദം കുട്ടികളാണ്. 'കെ.ജി.എഫ്', 'ബീസ്റ്റ്' തുടങ്ങിയ ചിത്രങ്ങൾക്ക് 'യു/എ' സർട്ടിഫിക്കറ്റ് നൽകിയിട്ടുണ്ടെന്നും ഹർജിയിൽ പറയുന്നു. ജസ്റ്റിസ് തമിഴ് സെൽവിയാണ് കേസ് പരിഗണിക്കുന്നത്.
മിശ്ര പ്രതികരണങ്ങൾക്കിടയിലും ബോക്സ് ഓഫീസിൽ 'കൂലി' മികച്ച പ്രകടനമാണ് കാഴ്ചവെക്കുന്നത്. റിലീസ് ചെയ്ത് നാല് ദിവസങ്ങൾക്കുള്ളിൽ തന്നെ ചിത്രം 400 കോടി ക്ലബ്ബിൽ ഇടം നേടി. ലോകേഷ് കനകരാജിന്റെ മുൻ ചിത്രങ്ങളായ 'വിക്രം', 'ലിയോ' എന്നിവയ്ക്ക് ശേഷം തുടർച്ചയായി മൂന്നാമത്തെ 400 കോടി ചിത്രം എന്ന നേട്ടവും ഇതോടെ 'കൂലി' സ്വന്തമാക്കി.
രജനികാന്തിനെ കൂടാതെ ആമിർ ഖാൻ, നാഗാർജുന, സൗബിൻ ഷാഹിർ, ഉപേന്ദ്ര, ശ്രുതി ഹാസൻ തുടങ്ങിയ വലിയ താരനിരയാണ് ചിത്രത്തിൽ അണിനിരന്നത്. അനിരുദ്ധ് രവിചന്ദർ സംഗീതവും, ഗിരീഷ് ഗംഗാധരൻ ഛായാഗ്രഹണവും നിർവഹിച്ചു. എൽ.സി.യുവിന്റെ ഭാഗമല്ലാത്തതിനാൽ 'കൂലി'ക്ക് ലോകേഷിന്റെ മറ്റ് ചിത്രങ്ങളുടെ നിലവാരത്തിലേക്ക് എത്താനായില്ലെന്ന് വിമർശനങ്ങളും ഉയർന്നിരുന്നു.
Content Highlight: Will Rajinikanths Kuli get an A certificate Sun Pictures approaches the High Court
