നഷ്ടപരിഹാരം ചെന്താമരയുടെ ഭാര്യയുടെ പേരിലുള്ള വീടുവിറ്റ് കൊടുക്കണമെന്ന് കോടതി

പാലക്കാട്: ( www.truevisionnews.com ) നെന്മാറ ഇരട്ടക്കൊലപാതക കേസിൽ പ്രതി ചെന്താമരയ്ക്ക് പാലക്കാട് ജില്ലാ സെഷൻസ് കോടതി വധശിക്ഷ വിധിച്ചു. കേസ് അന്വേഷണം വേഗത്തിലും കൃത്യമായും പൂർത്തിയാക്കിയ കേരള പോലീസിനെ കോടതി പ്രത്യേകമായി അഭിനന്ദിച്ചു. സമൂഹത്തിന് തെറ്റായ സന്ദേശം നൽകാതിരിക്കാൻ ഇത്തരമൊരു കടുത്ത ശിക്ഷ അത്യാവശ്യമാണെന്ന് കോടതി നിരീക്ഷിച്ചു.

കൊല്ലപ്പെട്ടവരുടെ ആശ്രിതർക്ക് 20 ലക്ഷം രൂപ നഷ്ടപരിഹാരം നൽകാനും കോടതി ഉത്തരവിട്ടു. പ്രതിക്ക് ഈ തുക നൽകാൻ കഴിഞ്ഞില്ലെങ്കിൽ, ഭാര്യ വിലാസിനിയുടെ പേരിലുള്ള വീട് വിറ്റ് തുക കണ്ടെത്തണം. ഇതിനും സാധിക്കാത്ത പക്ഷം സർക്കാർ സഹായം നൽകണമെന്നും വിധിയിൽ വ്യക്തമാക്കുന്നു.

കൊല്ലപ്പെട്ട സുധാകരന്റെ മക്കളായ അഖില, അനശ്വര, അതുല്യ എന്നിവർക്കും ലക്ഷ്മിയുടെ മക്കളായ സുരേന്ദ്രൻ, സുനിത എന്നിവർക്കുമാണ് ഈ തുക വീതിച്ചു നൽകേണ്ടത്. കൂടാതെ, കൊല്ലപ്പെട്ടവരുടെ മക്കളിൽ ഒരാൾക്ക് സർക്കാർ ജോലി നൽകാനും കോടതി ഉത്തരവിട്ടിട്ടുണ്ട്.

പ്രതിക്ക് മാനസാന്തരത്തിന് യാതൊരു സാധ്യതയുമില്ലെന്ന ജയിൽ ഉദ്യോഗസ്ഥർ, മാനസികാരോഗ്യ വിദഗ്ധർ, ജില്ലാ പ്രൊബേഷൻ ഓഫീസർ എന്നിവരുടെ റിപ്പോർട്ടുകൾ പരിഗണിച്ചാണ് കോടതി വധശിക്ഷ വിധിച്ചത്. പ്രതി പുറത്തിറങ്ങുന്നത് സമൂഹത്തിന് വലിയ ഭീഷണിയാണെന്ന് റിപ്പോർട്ടുകളിൽ ചൂണ്ടിക്കാട്ടിയിരുന്നു.

Also read: മുഷ്ടിചുരുട്ടി ഭീഷണിപ്പെടുത്തി സർക്കാരിനെ മാറ്റാൻ നോക്കേണ്ട, അത്രയ്ക്ക് നിർബന്ധമാണെങ്കിൽ സ്വയം മത്സരിച്ച് ജയിക്കൂ'; പ്രതിപക്ഷത്തെ വെല്ലുവിളിച്ച് കങ്കണ റണാവത്ത്

കോടതി വിധിയിൽ നീതി ലഭിച്ചുവെന്ന് കൊല്ലപ്പെട്ട സജിതയുടെ സഹോദരിയും കുടുംബവും പ്രതികരിച്ചു. വിധിയിൽ ആശ്വാസമുണ്ടെങ്കിലും തങ്ങളുടെ സുരക്ഷയിൽ ആശങ്കയുണ്ടെന്നും, പിതാവിന്റെ ഓർമ്മകൾ നിലനിൽക്കുന്നതിനാൽ നാട്ടിലേക്ക് ഇനി മടങ്ങുന്നില്ലെന്നും കുടുംബം അറിയിച്ചു. പ്രതി അപ്പീലിന് പോയാലും നിയമപോരാട്ടം തുടരുമെന്നും അവർ വ്യക്തമാക്കി.

Content Highlight: Nemmara Double Murder Case: Court Sentences Chenthamara to Death, Orders 20 Lakh Compensation

#Latest news #Nemmara Double Murder #Palakkad Court #Death Sentence #Kerala Crime News #Chenthamara