( www.truevisionnews.com ) വാഹനം സ്വന്തമായുള്ളവർക്ക് ഇൻഷുറൻസ് പ്രീമിയത്തിൽ വലിയൊരു തുക ലാഭിക്കാൻ സഹായിക്കുന്ന ഒന്നാണ് 'നോ ക്ലെയിം ബോണസ്' അഥവാ എൻസിബി. ഇൻഷുറൻസ് എടുത്ത കാലയളവിൽ അപകടങ്ങളോ മറ്റ് കേടുപാടുകളോ വന്ന് ക്ലെയിമുകൾ ഒന്നും നടത്തിയിട്ടില്ലെങ്കിൽ കമ്പനികൾ പോളിസി ഉടമയ്ക്ക് നൽകുന്ന പ്രതിഫലമാണിത്. ഇത് കൃത്യമായി ഉപയോഗപ്പെടുത്തിയാൽ ഇൻഷുറൻസ് പ്രീമിയം പകുതിയോളം (50%) കുറയ്ക്കാൻ സാധിക്കും.
എന്താണ് നോ ക്ലെയിം ബോണസ്?
ഇൻഷുറൻസ് പുതുക്കുമ്പോൾ 'ഓൺ ഡാമേജ്' (സ്വന്തം വാഹനത്തിനുണ്ടാകുന്ന കേടുപാടുകൾ) പ്രീമിയത്തിൽ ലഭിക്കുന്ന കിഴിവാണിത്.
ആദ്യ വർഷം: ക്ലെയിം ഒന്നും ചെയ്തിട്ടില്ലെങ്കിൽ പ്രീമിയത്തിൽ 20% ഇളവ് ലഭിക്കും.
തുടർച്ചയായ 5 വർഷം: ക്ലെയിം ഇല്ലാതെ പോളിസി കൊണ്ടുപോയാൽ ഈ ഇളവ് 50% വരെ വർദ്ധിക്കും.
നിങ്ങളുടെ വാഹനത്തിന്റെ പ്രീമിയം 35,000 രൂപയാണെങ്കിൽ, ആദ്യത്തെ ക്ലെയിം രഹിത വർഷത്തിന് ശേഷം 7,000 രൂപ കുറയും. അഞ്ച് വർഷം തുടർച്ചയായി ക്ലെയിം ചെയ്തില്ലെങ്കിൽ 17,500 രൂപ വരെ ലാഭിക്കാം.
ബോണസ് വണ്ടിക്കല്ല, ഉടമയ്ക്കാണ്!
പഴയ കാർ വിൽക്കുമ്പോഴോ പുതിയ കാർ വാങ്ങുമ്പോഴോ നിങ്ങളുടെ ബോണസ് പുതിയ കാറിലേക്ക് മാറ്റാം. ഇൻഷുറൻസ് കമ്പനി മാറിയാലും ഈ ബോണസ് ആനുകൂല്യം നഷ്ടപ്പെടില്ല. വണ്ടി വാങ്ങുന്ന പുതിയ ആൾക്ക് നിങ്ങളുടെ ബോണസ് ലഭിക്കില്ല.
ശ്രദ്ധിക്കേണ്ട പ്രധാന കാര്യങ്ങൾ:
ചെറിയ ക്ലെയിമുകൾ ഒഴിവാക്കുക: ചെറിയ തുകയുടെ റിപ്പയറുകൾക്ക് വേണ്ടി ഇൻഷുറൻസ് ക്ലെയിം ചെയ്യുന്നത് ദീർഘകാലാടിസ്ഥാനത്തിൽ നഷ്ടമുണ്ടാക്കും. കാരണം ഒരു തവണ ക്ലെയിം ചെയ്താൽ നിങ്ങളുടെ എൻസിബി പൂജ്യമാകും. ഐഡിവിയും എൻസിബിയും ഒന്നല്ല: വാഹനത്തിന്റെ അന്നത്തെ മാർക്കറ്റ് വിലയാണ് IDV. എൻസിബി ലഭിക്കുന്നത് കൊണ്ട് വണ്ടിയുടെ വില കുറയുന്നില്ല, പ്രീമിയം തുക മാത്രമാണ് കുറയുന്നത്. 90 ദിവസത്തെ നിയമം: ഇൻഷുറൻസ് കാലാവധി കഴിഞ്ഞ് 90 ദിവസത്തിനുള്ളിൽ അത് പുതുക്കിയില്ലെങ്കിൽ നിങ്ങളുടെ ബോണസ് ആനുകൂല്യം പൂർണ്ണമായും നഷ്ടപ്പെടും. മോഷണം പോയാൽ: വണ്ടി മോഷണം പോവുകയും പോളിസി തുക ക്ലെയിം ചെയ്യുകയും ചെയ്താൽ എൻസിബി പൂജ്യമാകും.
ബോണസ് എങ്ങനെ പുതിയ വണ്ടിയിലേക്ക് മാറ്റാം?
പഴയ വണ്ടി വിൽക്കുമ്പോൾ ആ വിവരം ഇൻഷുറൻസ് കമ്പനിയെ അറിയിച്ച് 'എൻസിബി റിട്ടെൻഷൻ സർട്ടിഫിക്കറ്റ്' (NCB Retention Certificate) കൈപ്പറ്റണം. പുതിയ വണ്ടി വാങ്ങുമ്പോൾ ഈ സർട്ടിഫിക്കറ്റ് ഹാജരാക്കിയാൽ ഇൻഷുറൻസ് തുകയിൽ ഇളവ് ലഭിക്കും.
ബോണസ് നിലനിർത്താൻ 'ആഡ് ഓൺ'
ഇപ്പോൾ പല കമ്പനികളും 'എൻസിബി പ്രൊട്ടക്ട്'എന്ന അധിക പരിരക്ഷ നൽകുന്നുണ്ട്. ഈ പ്ലാൻ എടുത്താൽ, ഒരു വർഷം ഒരു തവണ ക്ലെയിം ചെയ്താലും നിങ്ങളുടെ ബോണസ് പൂർണ്ണമായും നഷ്ടപ്പെടില്ല. ചില പ്ലാനുകളിൽ ബോണസ് തുക പൂജ്യമാകുന്നതിന് പകരം ഒരു പടി താഴേക്ക് മാത്രമാണ് കുറയുക. വരും വർഷങ്ങളിലെ വലിയ ലാഭം സംരക്ഷിക്കാൻ ഇത് സഹായിക്കും.
Bonus is not for the car, it's for you! Even if you sell your old car, you can transfer the insurance discount to a new car; Secrets you need to know
