കോഴിക്കോട്: (truevisionnews.com) കോഴിക്കോട് നഗരത്തിൽ ഉദ്ഘാടനത്തോടനുബന്ധിച്ച് ഒരു രൂപയ്ക്ക് ഷൂ നൽകുമെന്ന വാഗ്ദാനം വിശ്വസിച്ചെത്തിയ ജനക്കൂട്ടം വലിയ സംഘർഷത്തിന് കാരണമായി. സോഷ്യൽ മീഡിയ വഴി നൽകിയ ആകർഷകമായ ഈ പരസ്യം കണ്ടു പുലർച്ചെ മുതൽ തന്നെ നൂറുകണക്കിന് ആളുകളാണ് കടയ്ക്ക് മുന്നിൽ തടിച്ചുകൂടിയത്.
സമയം വൈകുംതോറും തിരക്ക് നിയന്ത്രണാതീതമാവുകയും തിക്കും തിരക്കും വർദ്ധിക്കുകയും ചെയ്തതോടെ പോലീസിന് ഇടപെടേണ്ടി വന്നു. സ്ഥിതിഗതികൾ ശാന്തമാക്കാൻ പോലീസ് ലാത്തി വീശിയതോടെ പ്രദേശം സംഘർഷഭരിതമായി. മതിയായ സുരക്ഷാ ക്രമീകരണങ്ങളില്ലാതെ ഇത്തരം ഓഫറുകൾ നൽകി ജനങ്ങളെ അപകടത്തിലാക്കിയതിനെ തുടർന്ന് കടയുടമകളെ പോലീസ് കസ്റ്റഡിയിലെടുത്തിട്ടുണ്ട്.
ഒരു രൂപയ്ക്ക് ഷൂ കിട്ടുമെന്ന പ്രതീക്ഷയിൽ ദൂരെ സ്ഥലങ്ങളിൽ നിന്നുപോലും എത്തിയവർ ഒടുവിൽ നിരാശയോടെയും പോലീസിന്റെ നടപടിയെത്തുടർന്നുള്ള പരിഭ്രാന്തിയിലുമാണ് മടങ്ങിയത്.
The inauguration of a shoe store in Kozhikode resulted in a clash!
