ചെറിയൊരാശ്വാസം....! റബറിൻ്റെ താങ്ങുവില 250 രൂപയാക്കി; ജൂലൈ മൂന്ന് മുതലുള്ള ബില്ലുകള്‍ക്ക് ബാധകം

തിരുവനന്തപുരം: ( www.truevisionnews.com ) കടുത്ത വിലയിടിവിൽ വലയുന്ന റബ്ബർ കർഷകർക്ക് ആശ്വാസം. റബ്ബറിന്റെ താങ്ങുവില കിലോയ്ക്ക് 200 രൂപയിൽ നിന്ന് 250 രൂപയായി കേരള സർക്കാർ വർധിപ്പിച്ചു. ബജറ്റിൽ പ്രഖ്യാപിച്ച തീരുമാനം ഉത്തരവായി പുറത്തിറങ്ങി.

ഉത്പാദന ചെലവ് ദിവസേന വർധിക്കുന്ന സാഹചര്യത്തിലും വിപണിയിൽ റബ്ബറിന് വില കുറഞ്ഞു നിൽക്കുന്നതിലും പ്രതിഷേധിച്ച് കർഷകരും വിവിധ റബ്ബർ ഉത്പാദക സംഘങ്ങളും നിരന്തരമായി താങ്ങുവില വർധിപ്പിക്കണമെന്ന് ആവശ്യപ്പെട്ടിരുന്നു. ഈ ആവശ്യം പരിഗണിച്ചാണ് സർക്കാർ നിർണായക തീരുമാനം എടുത്തത്.

വിലയിടിവിൽ നിന്ന് റബ്ബർ കർഷകരെ സംരക്ഷിക്കുന്നതിനായി സർക്കാർ നടപ്പിലാക്കുന്ന റബ്ബർ പ്രൊഡക്ഷൻ ഇൻസെന്റീവ് സ്കീം പ്രകാരമാണ് പുതിയ താങ്ങുവില നൽകുന്നത്. വിപണി വില 250 രൂപയിൽ താഴെ പോകുന്ന സമയത്ത്, 250 രൂപയും വിപണി വിലയും തമ്മിലുള്ള വ്യത്യാസം കർഷകന്റെ ബാങ്ക് അക്കൗണ്ടിൽ നേരിട്ട് സർക്കാർ നൽകും.

നാല് ലക്ഷത്തോളം കുടുംബങ്ങൾക്ക് ഉപജീവന മാർഗമായ റബ്ബർ കൃഷിയെ സംരക്ഷിക്കുകയാണ് ഈ തീരുമാനത്തിന്റെ ലക്ഷ്യമെന്ന് സർക്കാർ വ്യക്തമാക്കി. കഴിഞ്ഞ കുറച്ച് മാസങ്ങളായി കിലോയ്ക്ക് 170-180 രൂപയ്ക്കാണ് റബ്ബർ വിപണിയിൽ വിറ്റഴിഞ്ഞിരുന്നത്. ഇത് കൃഷി ചെലവ് പോലും കിട്ടാത്ത അവസ്ഥയിലേക്ക് കർഷകരെ തള്ളിവിട്ടിരുന്നു.

Also read: 'കോടികൾ നൽകി എന്ന ആരോപണത്തിന്റെ ലോജിക് എന്താണ്? ഞാൻ ഉള്ളിടത്തോളം അവർ അമ്മയുടെ തലപ്പത്ത് വരില്ല'; ശ്വേതാ മേനോൻ

താങ്ങുവില 50 രൂപ വർധിപ്പിച്ചതോടെ കേരളത്തിലെ റബ്ബർ കർഷകർക്ക് വലിയ ആശ്വാസമാകും. കോട്ടയം, ഇടുക്കി, പത്തനംതിട്ട ജില്ലകളിലെ ലക്ഷക്കണക്കിന് കർഷക കുടുംബങ്ങൾക്ക് ഈ തീരുമാനം നേരിട്ട് ഗുണം ചെയ്യും.കാലതാമസമില്ലാതെ തന്നെ ഇൻസെന്റീവ് തുക കർഷകരുടെ അക്കൗണ്ടിൽ എത്തിക്കാൻ വേണ്ട നടപടികൾ സ്വീകരിക്കുമെന്നും സർക്കാർ അറിയിച്ചു.

Content Highlight: Kerala Govt Increases Rubber Support Price to Rs 250 per Kg

#Kerala Rubber #Rubber Support Price #Rubber Farmers #Kerala Budget #Kerala Government #Rubber Price Hike