കോഴിക്കോട് പതങ്കയം വെള്ളച്ചാട്ടത്തിൽ മലവെള്ളപ്പാച്ചിൽ; സഞ്ചാരികളെ രക്ഷിക്കാനിറങ്ങിയ ഗൈഡിനെ കണ്ടെത്താനായില്ല, ഇന്നത്തെ തിരച്ചിൽ നിർത്തി

കോഴിക്കോട് : ( www.truevisionnews.com ) കോടഞ്ചേരി പതങ്കയം വെള്ളച്ചാട്ടത്തിൽ ഒഴുക്കിൽപ്പെട്ട് കാണാതായ മലപ്പുറം സ്വദേശിയായ യുവാവിനായുള്ള ഇന്നത്തെ തിരച്ചിൽ നിർത്തി. ഞാറാഴ്ച പുലർച്ചെ വീണ്ടും തിരച്ചിൽ തുടരുമെന്ന് അധികൃതർ അറിയിച്ചു.

ബെംഗളൂരുവിൽ നിന്നും എത്തിയ 12 അംഗ വിനോദസഞ്ചാര സംഘത്തിലെ നാലു പേരാണ് വൈകിട്ട് പുഴയിൽ ഒഴുക്കിൽപ്പെട്ടത്. ഇതിൽ മൂന്നു ബെംഗളൂരു സ്വദേശികളെ രക്ഷപ്പെടുത്തി. ഇവരുടെ ഗൈഡായിരുന്ന മലപ്പുറം കീഴ്ശേരി വട്ടോളി കണ്ണംകുത്ത് ഷിബ്‌ലി റഹ്മാനെ(25) ആണ് പുഴയിൽ കാണാതായത്. ആനക്കാംപൊയിൽ കണ്ടപ്പൻചാൽ തൂക്കുപാലത്തിനടിയാണ് സ്ഥലം.

കുളിക്കാനായി ഇറങ്ങിയത്. പുഴയിലും പരിസരത്തും തെളിഞ്ഞ കാലാവസ്ഥയും വെയിലും ആയിരുന്നെങ്കിലും മലയോര മേഖലയിൽ മഴപെയ്തതോടെയാണ് ഇരുപഞ്ഞിപ്പുഴയിൽ അപ്രതീക്ഷിതമായി മലവെള്ളപ്പാച്ചിൽ ഉണ്ടായത്.

ഒഴുക്കിൽപ്പെട്ട ബെംഗളൂരു സ്വദേശികളായ നിവിൻ(24), പ്രവീൺ(22), കിഷോർ(22) എന്നിവരെ പ്രദേശവാസികളും മുൻകൂട്ടി വിവരമറിഞ്ഞ ഫയർഫോഴ്സ് ഉദ്യോഗസ്ഥരും നടത്തിയ അടിയന്തര രക്ഷാപ്രവർത്തനത്തിൽ സുരക്ഷിത സ്ഥാനത്തേക്ക് എത്തിച്ചു.

Also read: 'കണ്ണീരാണ് വേണ്ടതെങ്കിൽ അഭിനയിച്ച് കാണിച്ചുതരാം, അല്പം സ്വകാര്യത തന്നുകൂടേ...'; ഭാഗ്യരാജിന്റെ മൃതദേഹത്തിന്റെ ചിത്രമെടുക്കാൻ ശ്രമിച്ചവരോട് രാധിക

ഇവർ ഒഴുക്കിൽപ്പെടുന്നത് കണ്ടാണ് ഗൈഡ് ആയിരുന്ന ഷിബ്ലി പുഴയിൽ ചാടിയത്. കാണാതായ ഷിബ്ലിക്ക് വേണ്ടി തിരച്ചിൽ നടത്തിയെങ്കിലും പ്രദേശത്തെ മഴയും ഇരുട്ടും കാരണം രാത്രിയോടെ തിരച്ചിൽ അവസാനിപ്പിച്ചു. ഞായറാഴ്ച രാവിലെ തിരച്ചിൽ പുനരാരംഭിക്കുമെന്ന് ഫയർ ഫോഴ്സ് സംഘം അറിയിച്ചു.

Content Highlight: Kodancherry Patankayam waterfall, youth missing after being swept away by the current, search underway

#Latest News #Missing Case #Kodanchery Pathankayam Waterdalls #Kozhikode