---
title: "മൈക്കൽ ജാക്‌സണെതിരെ വീണ്ടും പീഡനാരോപണം; നിയമപോരാട്ടവുമായി നാല് സഹോദരങ്ങൾ കോടതിയിൽ"
english_title: "Michael Jackson accused of rape again"
publisher: "moviemax.in"
canonical_url: "https://moviemax.in/news/355546/michael-jackson-accused-of-rape-again"
published_at: "2026-04-26T14:45:00+05:30"
category: "Bollywood"
language: "ml"
image: "https://cf.zdn.im/img/truevisionnews.com/0/image-uploads/69edd7d40a8f5_16.jpg"
keywords: []
---

# മൈക്കൽ ജാക്‌സണെതിരെ വീണ്ടും പീഡനാരോപണം; നിയമപോരാട്ടവുമായി നാല് സഹോദരങ്ങൾ കോടതിയിൽ

> **Lead Summary:** **[**അന്തരിച്ച ലോകപ്രശസ്ത പോപ് താരം മൈക്കൽ ജാക്‌സണെതിരെ വീണ്ടും ഗുരുതരമായ ലൈംഗികാരോപണങ്ങൾ ഉയരുന്നത് ആഗോളതലത്തിൽ വലിയ ചർച്ചയായിരിക്കുകയാണ്.

## Article Content

**[**അന്തരിച്ച ലോകപ്രശസ്ത പോപ് താരം മൈക്കൽ ജാക്‌സണെതിരെ വീണ്ടും ഗുരുതരമായ ലൈംഗികാരോപണങ്ങൾ ഉയരുന്നത് ആഗോളതലത്തിൽ വലിയ ചർച്ചയായിരിക്കുകയാണ്.

നാല് സഹോദരങ്ങളാണ് ജാക്‌സന്റെ എസ്റ്റേറ്റിനെതിരെ സിവിൽ നിയമനടപടികളുമായി കോടതിയെ സമീപിച്ചിരിക്കുന്നത്. 2000-ന്റെ തുടക്കത്തിൽ കൺസർട്ട് ടൂറുകൾക്കിടയിലും സ്വന്തം വീട്ടിൽ വെച്ചും തങ്ങൾ പീഡനത്തിന് ഇരയായെന്നാണ് ന്യൂജേഴ്‌സി സ്വദേശികളായ മൂന്ന് സഹോദരന്മാരും ഒരു സഹോദരിയും വെളിപ്പെടുത്തിയത്.

തങ്ങളുടെ പിതാവ് ജോലി ചെയ്തിരുന്ന ഹോട്ടലിൽ വെച്ചാണ് ഇവർ ജാക്‌സണുമായി പരിചയപ്പെടുന്നത്. പീഡനം നടക്കുമ്പോൾ ഇരകളിൽ ചിലർക്ക് ഏഴോ എട്ടോ വയസ്സ് മാത്രമായിരുന്നു പ്രായമെന്നും, മയക്കുമരുന്ന് നൽകിയും മസ്തിഷ്കപ്രക്ഷാളനം നടത്തിയുമാണ് ജാക്‌സൺ പീഡനം തുടർന്നതെന്നും ഹർജിയിൽ ആരോപിക്കുന്നു.

തങ്ങളുടെ മാതാപിതാക്കൾ പോലും അറിയാത്ത രീതിയിൽ ദശാബ്ദത്തിലേറെക്കാലം ഈ ചൂഷണം നീണ്ടുനിന്നുവെന്നാണ് പരാതിക്കാരുടെ വാദം. ന്യൂയോർക്ക് ടൈംസിന് നൽകിയ അഭിമുഖത്തിലൂടെയാണ് ഇവർ ഈ നടുക്കുന്ന വിവരങ്ങൾ പുറത്തുവിട്ടത്.

എന്നാൽ, ഈ ആരോപണങ്ങളെല്ലാം അടിസ്ഥാനരഹിതമാണെന്നും പണം തട്ടാനുള്ള നീക്കത്തിന്റെ ഭാഗമാണിതെന്നുമാണ് മൈക്കൽ ജാക്‌സന്റെ എസ്റ്റേറ്റ് പ്രതികരിക്കുന്നത്. താരം മരിച്ച് 15 വർഷങ്ങൾക്ക് ശേഷം ഇത്തരം പരാതികളുമായി വരുന്നത് ദുരൂഹമാണെന്നും, ജാക്‌സന്റെ പ്രശസ്തിയെ തകർക്കാനുള്ള ബോധപൂർവ്വമായ ശ്രമമാണിതെന്നും അദ്ദേഹത്തിന്റെ അറ്റോർണി മാർട്ടിൻ സിംഗർ വ്യക്തമാക്കി.

കോടതിയിൽ എത്തിയ ഈ കേസ് വരും ദിവസങ്ങളിൽ വലിയ നിയമപോരാട്ടങ്ങൾക്ക് വഴിവെക്കുമെന്നുറപ്പാണ്.

### Related Links & Sources
- [Original Story Source](https://moviemax.in/news/355546/michael-jackson-accused-of-rape-again)