---
title: "‘വണ്ടി പോണേൽ പോട്ടെ...ജീവനോടെ ഉണ്ടല്ലോ, അത് മതി...’: ജീവിതത്തിലെ ഏറ്റവും കഠിനമായ വർഷമെന്ന് ആന്റണി വർഗീസ്"
english_title: "antony varghese pepe accident survival "
publisher: "moviemax.in"
canonical_url: "https://moviemax.in/news/334220/antony-varghese-pepe-accident-survival"
published_at: "2026-01-01T14:58:00+05:30"
category: "Malayalam"
language: "ml"
image: "https://cf.zdn.im/img/truevisionnews.com/0/image-uploads/69563e5edec0b_anthony_pepe.jpg"
keywords: []
---

# ‘വണ്ടി പോണേൽ പോട്ടെ...ജീവനോടെ ഉണ്ടല്ലോ, അത് മതി...’: ജീവിതത്തിലെ ഏറ്റവും കഠിനമായ വർഷമെന്ന് ആന്റണി വർഗീസ്

> **Lead Summary:** **ക**ഴിഞ്ഞ വർഷം താൻ കടന്നുപോയ പ്രതിസന്ധികളെ ഓർത്തെടുത്ത് നടൻ ആന്റണി വർഗീസ് പെപ്പെ. വർഷത്തിന്റെ മുക്കാൽ ഭാഗവും ആശുപത്രിയിലും വേദനകൾക്കുമിടയിലായിരുന്നുവെന്ന് താരം സാമൂഹികമാധ്യമത്തിൽ കുറിച്ചു. നവംബറിൽ വാഗമണിൽ നടന്ന ആക്‌സിഡന്റിൽ ഗുരുതര പരിക്കേറ്റ അനുഭവവും താരം പങ്കുവെച്ചു.

## Article Content

**ക**ഴിഞ്ഞ വർഷം താൻ കടന്നുപോയ പ്രതിസന്ധികളെ ഓർത്തെടുത്ത് നടൻ ആന്റണി വർഗീസ് പെപ്പെ. വർഷത്തിന്റെ മുക്കാൽ ഭാഗവും ആശുപത്രിയിലും വേദനകൾക്കുമിടയിലായിരുന്നുവെന്ന് താരം സാമൂഹികമാധ്യമത്തിൽ കുറിച്ചു. നവംബറിൽ വാഗമണിൽ നടന്ന ആക്‌സിഡന്റിൽ ഗുരുതര പരിക്കേറ്റ അനുഭവവും താരം പങ്കുവെച്ചു.

**ആന്റണി വർഗീസിന്റെ കുറിപ്പിന്റെ പൂർണരൂപം:**

***ചില കാര്യങ്ങൾ നമ്മളെ കൊല്ലുന്നില്ലെങ്കിൽ കൂടുതൽ ശക്തരാക്കുമെന്ന് പറയാറുണ്ട്. പക്ഷേ, 2025 അതിനെ അക്ഷരാർഥത്തിൽ എടുത്തുവെന്ന് തോന്നുന്നു. ജിമ്മിലെ പരിക്ക്, ഷൂട്ടിനിടയിലെ അപകടം... അങ്ങനെ വർഷത്തിന്റെ മുക്കാൽ ഭാഗവും ആശുപത്രികൾക്കും വേദനകൾക്കും ഇടയിലായിരുന്നു.***

***അങ്ങനെ പോകുമ്പോൾ ആണ് നവംബർ 15-ന്, വാഗമൺ വെച്ച് ഒരു ആക്‌സിഡന്റ് കൂടെ ബോണസ് ആയി അടിച്ചു കിട്ടി. അത്യാവശ്യം തരക്കേടില്ലാത്ത പരിക്കോടു കൂടി വണ്ടിയിൽ ഉണ്ടായിരുന്ന ഞങ്ങൾ 3 പേരും രക്ഷപെട്ടു.***

***എന്റെ പ്രിയപ്പെട്ട ആദ്യത്തെ വണ്ടി 'ടോട്ടൽ ലോസ്' ആയി മാറി. പക്ഷെ തകർന്നുപോയ ആ വണ്ടി ഞങ്ങളുടെ മൂന്ന് പേരുടെയും ജീവൻ കാത്തു. വണ്ടിയുടെ നമ്പർ 1818 എന്നായിരുന്നു. ആ നമ്പറിലും മാലാഖമാരുടെ സാന്നിധ്യത്തിലും ഞാൻ എപ്പോഴും വിശ്വസിച്ചിരുന്നു. എന്റെ ആ വിശ്വാസം തെറ്റിയില്ലെന്ന് എനിക്ക് ബോധ്യമായി.***

***വണ്ടി പോണേൽ പോട്ടെ...ജീവനോടെ ഉണ്ടല്ലോ, അത് മതി.***

***ഒരുവശത്ത്, ജീവിതത്തിലെ ഏറ്റവും കഠിനമായ വർഷമായിരുന്നു ഇത്. എന്നാൽ, എല്ലാ ബഹളങ്ങൾക്കിടയിലും ഒരു മാജിക് ഉണ്ടായിരുന്നു. ചില നല്ല കാര്യങ്ങളിലും പ്രവർത്തിക്കാൻ എനിക്ക് 2025-ൽ അവസരം ലഭിച്ചു. മുറിവുണങ്ങാത്ത നിമിഷങ്ങളിൽ ഞാൻ പുതിയവ സൃഷ്ടിക്കുകയും, ചിത്രീകരിക്കുകയും, ഞാൻ എക്കാലവും സ്വപ്‌നം കണ്ട ഭാവിയിലേക്ക് കാലെടുത്തുവയ്ക്കുകയുമായിരുന്നു.***

***അപ്പൊ എല്ലാം പറഞ്ഞപോലെ... പുതിയ പരിപാടികളുടെ ആവേശവുമായി 2026-ലേക്ക് കടക്കുന്നു. മുറിപ്പാടുകളുണ്ട്, പക്ഷെ മനസ്സ് തകർന്നിട്ടില്ല. പുതിയൊരു തുടക്കത്തിനായി...***

### Related Links & Sources
- [Original Story Source](https://moviemax.in/news/334220/antony-varghese-pepe-accident-survival)