(moviemax.in) ജീവിതത്തിന്റെ ഓരോ ഘട്ടത്തിലും ശരീരമാണ് സ്ത്രീയുടെ ഏറ്റവും വലിയ ശക്തി, എന്നാൽ ചിലപ്പോൾ ഏറ്റവും കഠിനമായ പ്രതിസന്ധിയാകുന്നതും അതുതന്നെ. രക്തസ്രാവം മുതൽ ഗർഭധാരണം, പ്രസവം, അങ്ങനെ ഓരോഘട്ടവും സ്ത്രീയുടെ ശരീരത്തെയും മനസ്സിനെയും അനവധി പരീക്ഷണങ്ങൾക്കു വിധേയമാക്കുന്നു.
സമൂഹം പലപ്പോഴും ഈ വെല്ലുവിളികളെ അവഗണിക്കുമ്പോഴും, സ്ത്രീ അതിനെ സഹനശക്തിയുടെയും ആത്മവിശ്വാസത്തിന്റെയും പ്രതീകമായി നേരിടുന്നു. ഇന്നത്തെ സമൂഹത്തിൽ സ്ത്രീകൾ നേരിടുന്ന ഏറ്റവും വലിയ അതിക്രമങ്ങളിലൊന്നാണ് ശരീരപരിഹാസം.
ചിരിയെന്ന പേരിൽ തുടങ്ങുന്ന വാക്കുകൾ, ആത്മവിശ്വാസം തകർക്കുന്ന മുറിവുകളായി മാറുന്നു. ശരീരത്തിന്‍റെ രൂപരേഖകളെക്കാൾ വലുതാണ് ഈ പ്രശ്നം. ഇതേ പ്രശ്നം തന്നെയാണ് കഴിഞ്ഞ ദിവസം നടി ഗൗരി കിഷൻ നേരിട്ടത്. സോഷ്യൽ മീഡിയയിലൂടെ നമ്മൾ എല്ലാം അറിഞ്ഞ വാർത്തയാണ് അത്.ഗൗരിയെ പോലെയുള്ള പബ്ലിക് ഫിഗറുകൾക്കും ഇതിൽ നിന്നൊഴിവില്ല, പിന്നെ സാധാരണക്കാരുടെ കാര്യം പറയണോ?
അഭിനേത്രി ഗൗരി സിനിമയുടെ പ്രമോഷൻ പത്രസമ്മേളനത്തിൽ പങ്കെടുക്കുന്നതിനിടെ നേരിട്ട ഒരു അനുഭവം സോഷ്യൽ മീഡിയയിലൂടെയും വാർത്തകളിലൂടെയും വലിയ ചർച്ചയായി. അവരുടെ വസ്ത്രധാരണം, ശരീരഘടന തുടങ്ങിയ വിഷയങ്ങളെ കുറിച്ചുള്ള മാധ്യമപ്രവർത്തകരുടെ അസഭ്യമായ ചോദ്യങ്ങൾ അവളെ മാത്രമല്ല, സ്ത്രീകളുടെ ശരീരത്തെ കുറിച്ചുള്ള സമൂഹത്തിന്റെ നിലപാടിനെയും ആ വേദിയിൽ കാണിച്ചുതന്നു.
പത്രസമ്മേളനങ്ങൾ പോലുള്ള ഔദ്യോഗിക വേദികളിലും സ്ത്രീകൾക്ക് ഇത്തരം 'ബോഡി ഷെയിമിംഗ്' നേരിടേണ്ടി വരുന്നുവെന്നത് സ്ത്രീകളുടെ ശരീരത്തെ ഇപ്പോഴും ഒരു കൂട്ടം ആളുകൾ വിലയിരുത്തുന്നു എന്നതിൻ്റെ തെളിവാണ്. സ്ത്രീയുടെ ശരീരം എങ്ങനെയായിരിക്കണം, എത്ര മാത്രം വണ്ണം കൂടിയതും കുറഞ്ഞതുമാവണം, എന്ത് വസ്ത്രം ധരിക്കണം തുടങ്ങിയ കാര്യങ്ങളിൽ സമൂഹം തന്നെ വിധികർത്താവാകാൻ ശ്രമിക്കുന്നു.
ക്യാമറയ്ക്കു മുന്നിൽ ഉള്ളവരാകുമ്പോൾ, അവരുടെ ശരീരം ഒരു പൊതു ചർച്ചാവിഷയമാവുന്നു. ശരീര അപമാനവും മാനസിക ആഘാതവും ഇത്തരം അഭിപ്രായങ്ങളും വിമർശനങ്ങളും സ്ത്രീകളുടെ മനസ്സിൽ വലിയ മാനസിക സമ്മർദ്ദം സൃഷ്ടിക്കുന്നു. ശരീരത്തെ കുറിച്ചുള്ള വിലയിരുത്തലുകൾ സ്വയംവിശ്വാസം തകർക്കുകയും പലപ്പോഴും വിഷാദത്തിലേക്ക് നയിക്കുകയുമാണ്.
നടി ഗൗരി പത്രസമ്മേളനത്തിന് ശേഷം പ്രതികരിച്ചപ്പോൾ പറഞ്ഞത് പോലെ, “എന്റെ ശരീരം എന്റെതാണ്, അത് സംബന്ധിച്ച് അഭിപ്രായം പറയാനുള്ള അവകാശം മറ്റൊരാൾക്കില്ല” എന്നത് എല്ലാ സ്ത്രീകളുടെയും വാക്കായിത്തീർന്നു. സ്ത്രീകൾ നേരിടുന്ന ശരീരിക വെല്ലുവിളികൾ സമൂഹത്തിന്റെ കാഴ്ചപ്പാടിൽ മാത്രമല്ല, ജീവിതത്തിന്റെ പല ഘട്ടങ്ങളിലും കാണാം.
ബാല്യത്തിൽ നിന്നും മാതൃത്വത്തിലേക്കും പ്രായാധിക്യത്തിലേക്കും പോകുമ്പോൾ ശരീരത്തിൽ ഉണ്ടാകുന്ന മാറ്റങ്ങൾ പലപ്പോഴും അവരെ തന്നെ ആത്മവിശ്വാസരഹിതരാക്കുന്നു. തൊഴിൽസ്ഥലങ്ങളിൽ, മാധ്യമങ്ങളിൽ, വ്യക്തിജീവിതത്തിൽ അങ്ങനെ നിരവധി ഇടങ്ങളിൽ സ്ത്രീയുടെ ശരീരത്തെക്കുറിച്ചുള്ള ചോദ്യങ്ങൾ അവരെ നിരന്തരം പിന്തുടരുന്നു.
നടി ഗൗരിയുടെ സംഭവത്തിൽ നിന്ന് സമൂഹം പഠിക്കേണ്ടത്, സ്ത്രീയുടെ ശരീരം അവളുടെ തീരുമാനമാണ് എന്നതാണ്. രൂപത്തേക്കാൾ അവളുടെ വ്യക്തിത്വത്തെയും കഴിവിനെയും വിലമതിക്കാനുള്ള മാറ്റം സമൂഹത്തിൽ വരണം. വിദ്യാഭ്യാസവും മീഡിയയും ഈ ബോധവൽക്കരണത്തിനായി മുന്നോട്ട് വരേണ്ടതുണ്ട്. "സ്ത്രീയുടെ ശരീരമല്ല,അവളുടെ മനസ്സും കഴിവുമാണ് അവളെ നിർവ്വചിക്കുന്നത്".
Gauri Kishan, body shaming, Gauri Kishan controversy
