ഇത് ആരുടെ പണി? കോഴിക്കോട് കൊയിലാണ്ടിയിൽ ഹരിത കർമസേനയുടെ ചാക്കിൽ കെട്ടി ഉപേക്ഷിച്ച നിലയിൽ പെരുമ്പാമ്പ്

കൊയിലാണ്ടി: ( https://truevisionnews.com/)  കൊയിലാണ്ടി നഗരസഭയിൽ ഹരിത കർമസേന ശേഖരിച്ച പ്ലാസ്റ്റിക് മാലിന്യങ്ങൾക്കിടയിൽ ചാക്കിൽ കെട്ടി ഉപേക്ഷിച്ച നിലയിൽ പെരുമ്പാമ്പിനെ കണ്ടെത്തി. മുത്താമ്പി എംസിഎഫിൽ സൂക്ഷിച്ചിരുന്ന പാഴ് വസ്തുക്കൾ തരംതിരിക്കുന്നതിനിടയിലാണ് സംഭവം. കഴിഞ്ഞദിവസം രാവിലെയോടെയായിരുന്നു സംഭവം.

ചാക്കിൽ കുറേക്കൂടി പ്ലാസ്റ്റിക് വസ്തുക്കൾ നിറയ്ക്കാൻ ശ്രമിക്കുന്നതിനിടയിൽ ചാക്കിനുള്ളിൽ കെട്ടിവെച്ചിരുന്ന പെരുമ്പാമ്പ് പുറത്തേക്ക് ചാടുകയായിരുന്നു. തലനാരിഴയ്ക്കാണ് സേനാംഗങ്ങൾ കടിയേൽക്കാതെ രക്ഷപ്പെട്ടത്. സാധാരണയായി പ്ലാസ്റ്റിക് വസ്തുക്കൾക്കിടയിൽ പാമ്പുകളെ കാണാറുണ്ടെങ്കിലും, ഇത്തരത്തിൽ ബോധപൂർവ്വം ചാക്കിൽ കെട്ടി ഉപേക്ഷിക്കുന്നത് ആദ്യമായാണെന്ന് ഹരിതകർമ സേനാംഗങ്ങൾ വ്യക്തമാക്കി. അറിഞ്ഞുകൊണ്ട് തന്നെയാണ് പാമ്പിനെ ചാക്കിലാക്കി വെച്ചതെന്നും ഇത്തരത്തിലുള്ള ക്രൂരത ആരും ചെയ്യരുതെന്നും അവർ പ്രതികരിച്ചു.

കേരളത്തിൽ പാമ്പ് ശല്യവും പാമ്പുകടിയേൽക്കുന്നവരുടെ എണ്ണവും വർധിച്ചുവരുന്നത് വലിയ ആശങ്കയാണ് സൃഷ്ടിക്കുന്നത്. കാലാവസ്ഥാ വ്യതിയാനവും കടുത്ത ചൂടും കാരണം കാടുകളിൽ നിന്നും പുറത്തിറങ്ങുന്ന പാമ്പുകൾ ജനവാസ മേഖലകളിലേക്കും കിടപ്പുമുറികളിലേക്കും വരെ എത്തുന്നു.

പ്രധാന കാരണങ്ങളും സാഹചര്യങ്ങളും:

Also read: 'ജനനായകൻ' ഫസ്റ്റ് ഷോ കാണാൻ തൃഷയും അമ്മയും തിയേറ്ററിൽ; വിജയ്‌യെ മിസ് ചെയ്യുമെന്ന് തൃഷയുടെ അമ്മ

കടുത്ത ചൂടും ഈർപ്പവും: വേനൽക്കാലത്ത് അനുഭവപ്പെടുന്ന അസഹനീയമായ ചൂടും കൂടിയ ഈർപ്പവുമൂലം പാമ്പുകൾ തണുപ്പുള്ള സ്ഥലങ്ങളും മാളങ്ങളും തേടി വീടുകളിലേക്കും മനുഷ്യവാസ മേഖലകളിലേക്കും ഇഴഞ്ഞെത്തുന്നു.

വീടുകളിലെ സാന്നിധ്യം: കിടപ്പുമുറികളിൽ കട്ടിലുകൾക്കടിയിലും, കുട്ടികളുടെ തലയിണയ്ക്ക് അടിയിലും, ശുചിമുറികളിലും വരെ വിഷപ്പാമ്പുകൾ കണ്ടെത്തിയ സംഭവങ്ങൾ കേരളത്തിന്റെ വിവിധ ഭാഗങ്ങളിൽ റിപ്പോർട്ട് ചെയ്യപ്പെട്ടിട്ടുണ്ട്. കോഴിക്കോട് കുറ്റ്യാടിയിൽ ഒരു വീട്ടിലെ കുട്ടികൾ ഉറങ്ങുന്ന കിടപ്പുമുറിയിലെ തലയിണയ്ക്കടിയിൽ ഉൾപ്പെടെ അഞ്ച് വെള്ളിക്കെട്ടൻ  പാമ്പുകളെ കണ്ടെത്തിയത് വലിയ പരിഭ്രാന്തി സൃഷ്ടിച്ചിരുന്നു.

പ്രധാന വിഷപ്പാമ്പുകൾ: മൂർഖൻ , വെള്ളിക്കെട്ടൻ , അണലി തുടങ്ങിയ അതിമാരക വിഷമുള്ള പാമ്പുകളാണ് കൂടുതലായും ജനവാസ കേന്ദ്രങ്ങളിൽ കാണപ്പെടുന്നത്.

Content Highlight: Python Found Tied Inside Plastic Sack At Koyilandy MCF, Haritha Karma Sena Alarmed

#Koyilandy #Haritha Karma Sena #Python #MCF #Plastic Waste #Kozhikode News