#Kochi Crime News #KAAPA #Manu Mani #Ernakulam Rural Police #Viyyur Jail #Kerala Police
കൊച്ചി: ( www.truevisionnews.com) നിരവധി കൊലപാതക, കവർച്ച കേസുകളിൽ പ്രതിയായ നെടുമ്പാശ്ശേരി സ്വദേശി മനു മണി (27)യെ കരിനിയമമായ കാപ്പ ചുമത്തി വിയ്യൂർ സെൻട്രൽ ജയിലിൽ അടച്ചു. എറണാകുളം റൂറൽ ജില്ലാ പോലീസ് മേധാവി കെ.എസ്. സുദർശന്റെ റിപ്പോർട്ടിന്റെ അടിസ്ഥാനത്തിൽ ജില്ലാ കളക്ടർ പ്രിയങ്ക ജി.ഐ.എ.എസ് ആണ് ഉത്തരവിറക്കിയത്.
നെടുമ്പാശ്ശേരി ചെറിയ വാപ്പാലശ്ശേരി സ്വദേശിയാണ് മനു മണി. നെടുമ്പാശ്ശേരി, കാലടി, ആലുവ ഈസ്റ്റ് പൊലീസ് സ്റ്റേഷൻ പരിധികളിലും ഇടുക്കി ജില്ലയിലെ കാഞ്ഞാർ സ്റ്റേഷൻ പരിധിയിലും കൊലപാതകം, കൊലപാതക ശ്രമം, മോഷണം, കവർച്ച എന്നിവയുൾപ്പെടെ നിരവധി കേസുകളിൽ ഇയാൾ പ്രതിയാണ്.
2020-ൽ നെടുമ്പാശ്ശേരി കയ്യാലപ്പടി പഴംചിറ ഭാഗത്ത് വെച്ച് അങ്കമാലി തുറവൂർ സ്വദേശി ജിസ്മോനെ കൊലപ്പെടുത്തിയ കേസിലെ മൂന്നാം പ്രതിയാണ് മനു മണി. ഈ കേസിന് പുറമെ മറ്റ് ക്രിമിനൽ കേസുകളിലും ഇയാൾക്ക് പങ്കുണ്ടെന്ന് പൊലീസ് കണ്ടെത്തിയിരുന്നു.ഏറ്റവും ഒടുവിൽ കഴിഞ്ഞ ഏപ്രിൽ 10-ന് പുലർച്ചെ ആലുവ പുളിഞ്ചോട് മെട്രോ സ്റ്റേഷന് സമീപത്തെ ഒരു കടയിൽ വെച്ച് ഉണ്ടായ സംഭവമാണ് കാപ്പ നടപടിക്ക് കാരണമായത്.
കടയിൽ ബഹളം വെക്കുന്നത് ഒരു യുവാവ് മൊബൈൽ ഫോണിൽ പകർത്തിയതിൽ വിരോധം തോന്നിയാണ് മനുവും കൂട്ടാളികളും യുവാവിനെ മർദിച്ച് കൊലപ്പെടുത്താൻ ശ്രമിച്ചത്. തടയാൻ ശ്രമിച്ച യുവാവിന്റെ ഭാര്യയെ അസഭ്യം പറയുകയും സ്ത്രീത്വത്തെ അപമാനിക്കുകയും ഭീഷണിപ്പെടുത്തുകയും ചെയ്തു.ഈ സംഭവത്തിൽ ആലുവ ഈസ്റ്റ് പൊലീസ് രജിസ്റ്റർ ചെയ്ത കേസിൽ മനു മണി ഒന്നാം പ്രതിയാണ്.
സാമൂഹിക വിരുദ്ധ പ്രവർത്തനങ്ങൾ തുടർച്ചയായി നടത്തുന്നതിനാലും നാട്ടിൽ ഭീതി പരത്തുന്നതിനാലുമാണ് കാപ്പ ചുമത്തിയതെന്ന് ജില്ലാ കളക്ടറുടെ ഉത്തരവിൽ പറയുന്നു.നെടുമ്പാശ്ശേരി പൊലീസ് ഇൻസ്പെക്ടർ ബി.കെ. അരുൺ, എസ്.ഐ പി.ജി. സാബു, എ.എസ്.ഐ എം.എസ്. അജിത് കുമാർ, സി.പി.ഒമാരായ എം.എ. ഷക്കീർ, എം.ടി. പ്രജിത്ത്, എസ്. സുബ്രഹ്മണ്യൻ എന്നിവരടങ്ങിയ സംഘമാണ് മനുവിനെ അറസ്റ്റ് ചെയ്തത്.
Content Highlight: Kochi: Habitual Offender Manu Mani Arrested Under KAAPA, Jailed In Viyyur Central Jail
#Kochi Crime News #KAAPA #Manu Mani #Ernakulam Rural Police #Viyyur Jail #Kerala Police
