നടി മഞ്ജു വാര്യര്ക്കെതിരായ വിവാദ പരാമര്ശങ്ങളുടെ പേരില് പൊലീസ് തന്നെ അറസ്റ്റ് ചെയ്ത നടപടിയില് പ്രതികരിച്ച് സംവിധായകന് സനല് കുമാര് ശശിധരന് രംഗത്ത്. ഒരു സ്ത്രീയെ പ്രണയിച്ചതിനും അതുവഴി അവളെ ഉപദ്രവിച്ചതിനും തന്നെ അറസ്റ്റ് ചെയ്തുവെന്ന് സനല് കുമാര് തന്റെ ഫേസ്ബുക്ക് പോസ്റ്റില് വ്യക്തമാക്കി.
സര്ക്കാരിന്റെ മുഖംമൂടി സംരക്ഷിക്കാന് പൊലീസിനെ കളിപ്പാവകളാക്കി നഗ്നമായി ഉപയോഗിക്കുകയാണെന്നും അദ്ദേഹം ആരോപിച്ചു. എന്നാല് ഒട്ടുമിക്ക എഴുത്തുകാരും ബുദ്ധിജീവികളും സാംസ്കാരിക പ്രവര്ത്തകരും മൗനം പാലിക്കുകയാണെന്നും സനല് കുമാര് കുറ്റപ്പെടുത്തി.
എന്നെ അറസ്റ്റ് ചെയ്ത് രണ്ട് മാസത്തിന് ശേഷം എനിക്ക് ഗൂഗിള്, സോഷ്യല് മീഡിയ അക്കൗണ്ടുകള് തിരികെ ലഭിച്ചു. ഒരു സ്ത്രീയെ പ്രണയിച്ചതിനും അതുവഴി അവളെ ഉപദ്രവിച്ചതിനും എന്നെ അറസ്റ്റ് ചെയ്തു. സത്യം എനിക്ക് വേണ്ടി വാദിക്കേണ്ട ഒന്നല്ല. അത് സ്വന്തമായി പുറത്തുവരണം. അത് പുറത്തുവരട്ടെ, അതുവരെ പ്രണയത്തിന്റെ മുറിവുകള് വഹിക്കാന് ഞാന് തയ്യാറാണ്.
എന്നാല്, സംസ്ഥാനത്തെ ക്രമസമാധാന പ്രശ്നത്തില് ആശങ്ക ഉയര്ത്തി എന്നെ അടച്ചാക്ഷേപിക്കാനുള്ള പൊലീസ് ഗൂഢാലോചനയാണ് എന്റെ അറസ്റ്റിന്റെ മുഴുവന് സംഭവങ്ങളില് നിന്നും വ്യക്തമാകുന്നത്. അത് നിയമത്തിന്റെ എല്ലാ തത്വങ്ങള്ക്കും എതിരായിരുന്നു. എന്നെ ശവക്കുഴിയില് കുടുക്കാനോ എന്റെ ജീവന് അപഹരിക്കാനോ ഒരു നികൃഷ്ടമായ പദ്ധതി ഉണ്ടായിരുന്നു.
പക്ഷേ, ഭാഗ്യവശാല് എന്റെ ഫേസ്ബുക്ക് ലൈവ് അവരുടെ പ്ലാന് തകര്ത്തു. അന്ന് അര്ദ്ധരാത്രി പോലീസ് സ്റ്റേഷനില് നിന്ന് തന്നെ ജാമ്യം നേടണമെന്ന് എന്നോട് ആവശ്യപ്പെട്ടു. എന്നെ കോടതിയില് ഹാജരാക്കാന് നിര്ബന്ധിച്ചപ്പോള് ഒരു പൊലീസ് ഉദ്യോഗസ്ഥന് തന്റെ സര്വീസ് റിവോള്വര് കാട്ടി ഭീഷണിപ്പെടുത്തി.
ഞാന് മരണത്തെ ഭയപ്പെട്ടില്ല, ഉറച്ചു നിന്നു. അവസാനം അവര്ക്ക് എന്നെ കോടതിയില് ഹാജരാക്കേണ്ടിവന്നു, എനിക്ക് ജാമ്യം ലഭിച്ചു. എന്റെ മൊബൈല് ഫോണുകള് കസ്റ്റഡിയിലെടുത്തു. എന്റെ ഗൂഗിള് അക്കൗണ്ട്, സോഷ്യല് മീഡിയ എന്നിവ ഹാക്ക് ചെയ്ത് സെറ്റിംഗ്സ് മാറ്റുകയും ചെയ്തു. (എന്റെ ഫോണുകള് ഇപ്പോഴും അവരുടെ കസ്റ്റഡിയിലാണ്) എന്റെ കേസിനെക്കുറിച്ചും എനിക്ക് എന്താണ് സംഭവിച്ചതെന്നും സമൂഹത്തോട് സംസാരിക്കാന് കഴിഞ്ഞില്ല.
ഞാന് ഉന്നയിച്ച ആശങ്കകളെത്തുടര്ന്ന്, ഞാന് ഒരു മനോരോഗിയാണെന്ന് പല സുഹൃത്തുക്കളും വിലയിരുത്തുന്നത് കേട്ടു. കഴിഞ്ഞ രണ്ട് വര്ഷമായി എന്റെ സോഷ്യല് മീഡിയ പോസ്റ്റുകള് പരിശോധിച്ചാല്, കേരളത്തിലെ ഒരു മാഫിയയ്ക്കെതിരെയും അത് പൊലീസിലും ഭരണത്തിലും എന്തിന്, ജുഡീഷ്യറിയിലും വരെ നുഴഞ്ഞുകയറുന്നതിനെതിരെ ഞാന് നിരന്തരം മുന്നറിയിപ്പ് നല്കിയിരുന്നുവെന്ന് നിങ്ങള്ക്ക് കാണാന് കഴിയും.
സോഷ്യല് മീഡിയയില് നിന്ന് അകറ്റി നിര്ത്തിയ രണ്ട് മാസത്തിനിടെ എന്റെ ആശങ്കകള്ക്ക് ബലമേകുന്ന ഒരുപാട് കാര്യങ്ങള് സംഭവിച്ചു. സര്ക്കാരിനെതിരെ ആരു സംസാരിച്ചാലും ഭീഷണിയാണെന്ന് ജനങ്ങള്ക്ക് അറിയാം. ശബ്ദമുയര്ത്തുന്ന പലരുടെയും പേരില് കള്ളക്കേസുകള് ചുമത്തി.
സര്ക്കാരിന്റെ മുഖംമൂടി സംരക്ഷിക്കാന് പോലീസിനെ കളിപ്പാവകളാക്കി നഗ്നമായി ഉപയോഗിക്കുകയാണ്. എന്നാല് ഒട്ടുമിക്ക എഴുത്തുകാരും ബുദ്ധിജീവികളും സാംസ്കാരിക പ്രവര്ത്തകരും മൗനം പാലിക്കുകയാണ്. എനിക്കിപ്പോള് അവരെ നന്നായി മനസ്സിലാക്കാന് കഴിയും. സാമ്പ്രദായിക നിശബ്ദതയ്ക്കെതിരെ ശബ്ദമുയര്ത്തുന്നവരെ നോക്കി ചിരിക്കാന് മാത്രം അറിയാവുന്ന ഒരു സമൂഹത്തെ സഹായിക്കാനാവില്ലെന്ന് അവര്ക്കറിയാം.
Content Highlight: The plan was to trap in the grave'; Sanal Kumar is ready to bear the wounds of love
