(moviemax.in) വി.ഡി. സതീശൻ കേരളത്തിന്റെ മുഖ്യമന്ത്രി പദവിയിലേക്ക് എത്തുന്നതിൽ വ്യക്തിപരമായ വലിയ സന്തോഷമുണ്ടെന്ന് പ്രശസ്ത സംവിധായകൻ സത്യൻ അന്തിക്കാട്. സതീശൻ ഒരു നല്ല രാഷ്ട്രീയക്കാരനാണെന്നും വായനയിലൂടെ ആർജ്ജിച്ചെടുത്ത അറിവ് അദ്ദേഹത്തിന്റെ വാക്കുകളിലും പ്രവൃത്തിയിലും പ്രകടമാണെന്നും സത്യൻ അന്തിക്കാട് സാമൂഹിക മാധ്യമത്തിൽ പങ്കുവെച്ച കുറിപ്പിൽ വ്യക്തമാക്കി.
തന്റെ 'സന്ദേശം' എന്ന സിനിമ ജീവിതത്തിൽ വലിയ സ്വാധീനം ചെലുത്തിയതായി സതീശൻ തന്നെ ഒരിക്കൽ വെളിപ്പെടുത്തിയത് സംവിധായകൻ ഓർത്തെടുത്തു. സിനിമയിലെ കോട്ടപ്പള്ളി പ്രഭാകരൻ എന്ന കഥാപാത്രം ക്ലൈമാക്സിൽ കോടതിയിലേക്ക് പ്രാക്ടീസിനായി പോകുന്ന രംഗം കണ്ട്, പിറ്റേദിവസം തന്നെ താൻ ഒരു പ്രശസ്ത അഭിഭാഷകന്റെ ജൂനിയറായി ചേർന്ന കാര്യം സതീശൻ പറഞ്ഞിരുന്നു.
രാഷ്ട്രീയം നല്ല ആളുകൾ കൈകാര്യം ചെയ്യുമ്പോൾ അത് ഗുണകരമാകുമെന്ന് തിലകൻ അവതരിപ്പിച്ച കഥാപാത്രം സിനിമയിൽ പറയുന്നുണ്ട്. അത്തരത്തിൽ രാഷ്ട്രീയത്തിന് അനുയോജ്യനായ വ്യക്തിയാണ് സതീശനെന്ന് സത്യൻ അന്തിക്കാട് സാക്ഷ്യപ്പെടുത്തുന്നു.
സന്ദേശത്തിന്റെ സന്ദേശം പൂർണ്ണമായും ഉൾക്കൊണ്ട ഒരാൾ മുഖ്യമന്ത്രിയാകുമ്പോൾ അത് കാണാൻ അന്തരിച്ച നടൻ ശ്രീനിവാസൻ ഒപ്പമില്ലെന്നത് സങ്കടകരമാണെന്നും അദ്ദേഹം കുറിച്ചു. സിനിമയും സമൂഹവും മാറിയതുപോലെ രാഷ്ട്രീയം മാറിയത് തിരിച്ചറിഞ്ഞ നേതാവാണ് സതീശൻ.
വിട്ടുവീഴ്ചയില്ലാത്ത നിലപാടുകളും വർഗ്ഗീയതക്കെതിരെ സംസാരിക്കാനുള്ള ആർജ്ജവവുമാണ് അദ്ദേഹത്തെ വ്യത്യസ്തനാക്കുന്നത്. രമേശ് ചെന്നിത്തലയോട് വ്യക്തിപരമായി ഇഷ്ടമുണ്ടെങ്കിലും ഇന്നത്തെ കേരളത്തിന് സതീശന്റെ നേതൃത്വമാണ് ആവശ്യമെന്ന് സത്യൻ അന്തിക്കാട് തുറന്നുപറഞ്ഞു.
വിദ്യാർത്ഥികളും യുവാക്കളും ഏറെ ആഗ്രഹിച്ച ഒരു മാറ്റമാണിതെന്നും പുതിയ തലമുറയുടെ നേതാവായി സതീശൻ തിളങ്ങുമെന്നും അദ്ദേഹം പ്രത്യാശ പ്രകടിപ്പിച്ചു.
Content Highlight: Sathyan Anthikad's interesting revelation about V.D. Satheesan
