സുഹൃത്തിന്റെ റസ്റ്റോറന്റ് ഉദ്ഘാടനത്തിനായി 2015 ല് ആണ് ടൊവിനോ തോമസ് ആദ്യമായി ദുബായില് എത്തിയത് .ആറു വര്ഷങ്ങള്ക്ക് ശേഷം ഇപ്പോള് താരം ദുബായില് എത്തിയിരിയ്ക്കുന്നത്, യുഎഇ നല്കുന്ന ഗോള്ഡന് വിസ സ്വീകരിക്കുന്നതിനായിട്ടാണ്.ദുബായി എനിക്ക് രണ്ടാമത്തെ വീട് ആണെന്നും, അടിക്കടി വരാറുണ്ട് എന്നും ഗോള്ഡന് വിസ സ്വീകരിച്ച് നല്കിയ അഭിമുഖത്തില് സംസാരിക്കവെ ടൊവിനോ പറഞ്ഞു. സിനിമാ വിശേഷങ്ങളെ കുറിച്ചും മറ്റും സിറ്റി ടൈംസിന് നല്കിയ അഭിമുഖത്തില് ടൊവിനോ സംസാരിച്ച കാര്യങ്ങള് തുടര്ന്ന് വായിക്കാം.............
കള എന്ന ചിത്രത്തെ കുറിച്ച് ചോദിച്ചപ്പോള്, ഒരു അഭിനേതാവ് എല്ലാ തരം സിനിമകളും ചെയ്യണം എന്നതാണ് എന്റെ കാഴ്ചപാട് എന്നായിരുന്നു ടൊവിനോയുടെ പ്രതികരണം. അങ്ങനെ മാത്രമേ എനിക്ക് എന്റെ കഴിവ് എത്രമാത്രമാണെന്ന് തിരിച്ചറിയാനും പുറത്തെടുക്കാന് സാധിക്കുകയുള്ളൂ. ഒരേ തരം കഥാപാത്രങ്ങള് മാത്രം ചെയ്തുകൊണ്ടിരിയ്ക്കുകയാണെങ്കില് ഒരിക്കലും എനിക്ക് എന്റെ മുഴുവന് കഴിവും പുറത്തെടുക്കാന് കഴിയില്ല.
അതേ സമയം വ്യത്യസ്തമായ കഥാപാത്രങ്ങള് ചെയ്യാനും ഞാന് ശ്രമിക്കാറുണ്ട്. ഒരു സഹ നടന് ആയിട്ടാണ് ഞാന് കരിയര് ആരംഭിച്ചത്. പിന്നീട് വില്ലന് വേഷങ്ങള് ചെയ്തു. തുടര്ന്ന് കോമഡി റോളുകളും നായക വേഷങ്ങളും ചെയ്തു.ഒരേ തരം വേഷങ്ങള് ചെയ്യുന്നത് ഞാന് നിയന്ത്രിക്കാറുണ്ട്. കാരണം എപ്പോഴും ഒരേ തരത്തിലുള്ള സിനിമകളും കഥാപാത്രങ്ങളും ചെയ്യുമ്പോള് എനിക്ക് തന്നെ ബോര് അടിക്കും. അപ്പോള് പിന്നെ പ്രേക്ഷകരുടെ കാര്യം പറയാനുണ്ടോ.
ഒരു സിനിമ തിരഞ്ഞെടുക്കുമ്പോള് ഏറ്റവും ആദ്യം നോക്കുന്നത് തിരക്കഥയാണ്. അതിന് ശേഷം സംവിധായകന് ആരാണെന്നും നിര്മാതാവ ആരാണെന്നും നോക്കുന്നു. പിന്നെ ഛായാഗ്രഹകന്, ചിത്രസംയോജകന് അങ്ങനെ ഓരോ കാര്യവും നോക്കും. സിനിമ ഒരിക്കലും വണ് മാന് ഷോ അല്ല. ടീം വര്ക്ക് ആണ്. അതുകൊണ്ട് തന്നെ ടീം എങ്ങിനെയാണ് എന്ന് നോക്കിയാണ് സിനിമകള് ചെയ്യുന്നത്. എല്ലാം നല്ല രീതിയില് വന്ന മനോഹരമായ സിനിമ സംഭവിയ്ക്കുന്നു.
മിന്നല് മുരളി എന്ന ചിത്രമാണ് അടുത്ത റിലീസ്. ചിത്രം ഒടിടിയില് ആണ് റിലീസ് ചെയ്യുന്നത്. വളരെ എന്റര്ടൈന്മെന്റ് ആയിട്ടുള്ള സിനിമയാണ് മിന്നല് മുരളി. ഒരു സൂപ്പര് ഹീറോ ചിത്രം എന്നതിനപ്പുറം നല്ലൊരു സ്റ്റോറി ലൈന് ആണ് ചിത്രത്തിന്റേത്. ഇതുവരെ ചെയ്യാത്ത തരം വ്യത്യസ്തമായ കഥയും കഥാപാത്രവുമാണ് ചിത്രത്തിന്റേത്.
സിനിമ തിയേറ്ററില് റിലീസ് ചെയ്യുന്നത് തന്നെയാണ് എനിക്ക് സന്തോഷം നല്കുന്ന കാര്യം. ഒരുപാട് ആളുകള്ക്കൊപ്പം ഇരുന്ന് നമ്മുടെ സിനിമ കാണുമ്പേള് അപ്പോള് തന്നെ പ്രതികരണം ലഭിയ്ക്കുന്നു. തിയേറ്ററില് ഇരുന്ന് സിനിമ കാണുന്നതിന്റെ വികാരം ഒന്ന് വേറെ തന്നെയാണ്. എന്നാല് ഇപ്പോഴുള്ള സാഹചര്യത്തില് ഒ ടി ടി റിലീസ് വലിയൊരു സാധ്യത തന്നെയാണ്. റിലീസിങ് ദിവസം തന്നെ സിനിമ എല്ലായിടത്തും എത്തുന്നു. മലയാള സിനിമയ്ക്ക് മറ്റ് ഇന്റസ്ട്രികളിലും വലിയ സ്വീകരണം ലഭിയ്ക്കുന്നു എന്നത് വലിയ കാര്യമാണ്.
ഈ കൊവിഡ് കാലത്തെ കുറിച്ച് ചോദിച്ചാല് നിര്ഭാഗ്യം എന്ന് അല്ലാതെ എന്ത് പറയാനാണ്. പുറത്ത് പോകാനും മറ്റും ഒരുപാട് ഇഷ്ടമുള്ള ആളാണ് ഞാന്. ആ ഞാന് മാസ്ക് ധരിക്കണമല്ലോ എന്ന ഒറ്റ കാരണത്താല് ഇപ്പോള് പുറത്തേക്ക് പോകാന് മടിയ്ക്കുന്നു. എത്രയും വേഗം ഈ പാന്റമിക് അവസാനിച്ചാല് മതിയായിരുന്നു- ടൊവിനോ തോമസ്
Content Highlight: It was enough to end this pantomime as soon as possible- Tovino Thomas
