( moviemax.in ) അന്തരിച്ച സംവിധായകന് ഷാഫിക്ക് അന്ത്യാഞ്ജലി അര്പ്പിക്കാനെത്തി നാടും സഹപ്രവര്ത്തകരും. കൊച്ചി സഹകരണബാങ്ക് ഓഡിറ്റോറിയത്തില് രാവിലെ മുതല് ആരംഭിച്ച പൊതുദര്ശനത്തില് ഷാഫിയെ അവസാനമായി കാണാന് സിനിമാരംഗത്തെ നിരവധി പേരാണ് എത്തിയത്.
ഉച്ചയ്ക്ക് ഒരുമണിവരെയാണ് പൊതുദര്ശനം. വൈകീട്ട് നാലിന് കറുകപ്പിള്ളി ജുമാമസ്ജിദ് കബര്സ്താനില് ആണ് കബറടക്കം.
ആന്തരിക രക്തസ്രാവത്തെത്തുടര്ന്ന് ഈ മാസം 16-നാണ് ഷാഫിയെ ആശുപത്രിയില് പ്രവേശിപ്പിച്ചത്. ദിവസങ്ങളോളം കഠിനമായ തലവേദനയും ഉറക്കമില്ലായ്മയും അനുഭവപ്പെട്ടതിനെത്തുടർന്നാണ് ഷാഫി ചികിത്സതേടിയത്.
വിദഗ്ധ പരിശോധനയിൽ തലച്ചോറിലെ രക്തസ്രാവം കണ്ടെത്തി. ശസ്ത്രക്രിയ നടത്തിയെങ്കിലും ആരോഗ്യനില വഷളായതിനെത്തുടർന്ന് വെന്റിലേറ്റർ സഹായത്തോടെയാണ് ജീവൻ നിലനിർത്തിയിരുന്നത്.
എളമക്കര മൂത്തോട്ടത്ത് എം.പി. ഹംസയുടെയും നബീസയുടെയും മകനായി ജനിച്ച ഷാഫിയുടെ യഥാർഥ പേര് എം.എച്ച്. റഷീദ് എന്നാണ്. ഭാര്യ: ഷാമില. മക്കൾ: അലീമ, സൽമ. സംവിധായകനും തിരക്കഥാകൃത്തുമായ റാഫി സഹോദരനാണ്.
ബന്ധുവായ സംവിധായകൻ സിദ്ദീഖിന്റെയും സഹോദരൻ റാഫിയുടെയും പാതയിലൂടെയാണ് സിനിമയിലേക്ക് കടന്നുവന്നത്. സംവിധാനം ചെയ്ത 17 സിനിമകളിൽ ഏറെയും വമ്പൻ ഹിറ്റുകളായിരുന്നു.
രാജസേനന്റെയും റാഫി-മെക്കാര്ട്ടിന് സംവിധായകരുടേയും സഹായിയാണ് സിനിമാരംഗത്തേക്കുള്ള പ്രവേശനം. 2001-ല് പുറത്തിറങ്ങിയ വണ്മാന്ഷോ എന്ന ചിത്രത്തിലൂടെ ഷാഫി സ്വതന്ത്ര സംവിധായകനായി. തുടര്ന്ന് നിരവധി സൂപ്പര്ഹിറ്റ് ചിത്രങ്ങളൊരുക്കി.
കല്യാണരാമന്, പുലിവാല് കല്യാണം, തൊമ്മനും മക്കളും, മായാവി, ചട്ടമ്പിനാട്, ചോക്ലേറ്റ്, മേരിക്കുണ്ടൊരു കുഞ്ഞാട്, മേക്കപ്പ്മാന്, ടു കണ്ട്രീസ്, ഷെര്ലക്ക് ടോംസ് തുടങ്ങി 18 ചിത്രങ്ങള് സംവിധാനം ചെയ്തു.
ഇതില് മജ എന്ന തമിഴ് ചിത്രവും ഉള്പ്പെടുന്നു. തൊമ്മനും മക്കളും എന്ന ചിത്രത്തിന്റെ റീമേക്ക് ആയിരുന്നു ഇത്.2022-ല് പുറത്തിറങ്ങിയ ആനന്ദം പരമാനന്ദം ആയിരുന്നു അവസാനമൊരുക്കിയ ചിത്രം.
Content Highlight: #director #shafi #colleagues #came #pay #their #last #respects
