മുംബൈ ഇന്ത്യൻസ് നായകൻ കൊൽക്കത്തയിലേക്കോ? ഹാർദിക് പാണ്ഡ്യക്ക് ക്യാപ്റ്റൻസി ഓഫറുമായി കൊൽക്കത്ത

മുംബൈ: (truevisionnews.com) ഐപിഎൽ 2027 സീസണിന് മുന്നോടിയായി മുംബൈ ഇന്ത്യൻസ് നായകൻ ഹാർദിക് പാണ്ഡ്യയെ ടീമിലെത്തിക്കാൻ കൊൽക്കത്ത നൈറ്റ് റൈഡേഴ്‌സ് (കെകെആർ) സജീവ ചർച്ചകൾ നടത്തുന്നതായാണ് ഏറ്റവും പുതിയ റിപ്പോർട്ടുകൾ വ്യക്തമാക്കുന്നത്. മുംബൈ ഇന്ത്യൻസിൽ തുടരുന്നതിനെക്കുറിച്ചുള്ള അനിശ്ചിതത്വങ്ങൾക്കിടെയാണ് കൊൽക്കത്തയുടെ ഈ നീക്കം.

കഴിഞ്ഞ സീസണിൽ പോയിന്റ് പട്ടികയിൽ ഒൻപതാം സ്ഥാനത്ത് ഫിനിഷ് ചെയ്ത മുംബൈയുടെ പ്രകടനവും, ഹാർദിക്കിന്റെ സോഷ്യൽ മീഡിയയിലെ ഇടപെടലുകളും താരം ടീം വിടുമെന്ന അഭ്യൂഹങ്ങൾക്ക് കൂടുതൽ ബലം നൽകിയിട്ടുണ്ട്. ഹാർദിക്കിനെ ടീമിലെത്തിക്കുന്നതിനൊപ്പം ക്യാപ്റ്റൻ സ്ഥാനം കൂടി വാഗ്ദാനം ചെയ്താണ് കൊൽക്കത്തയുടെ നീക്കങ്ങൾ പുരോഗമിക്കുന്നത്.

കഴിഞ്ഞ സീസണിൽ താൽക്കാലിക നായകനായിരുന്ന അജിങ്ക്യ രഹാനെയ്ക്ക് പകരക്കാരനെ തേടുന്ന കെകെആർ, ഹാർദിക്കിന്റെ അനുഭവസമ്പത്ത് ടീമിന് മുതൽക്കൂട്ടാകുമെന്ന് കരുതുന്നു. ആഭ്യന്തരമായ ചർച്ചകൾക്ക് ശേഷം മുംബൈ ഇന്ത്യൻസ് മാനേജ്‌മെന്റുമായി കെകെആർ നേതൃത്വം ഇതിനകം പലതവണ കൂടിക്കാഴ്ചകൾ നടത്തിക്കഴിഞ്ഞു. ട്രേഡിംഗിനായി വൻ തുക നൽകാനോ അല്ലെങ്കിൽ പകരം കളിക്കാരെ നൽകാനോ കൊൽക്കത്ത സന്നദ്ധമാണെന്നാണ് വിവരം.

നേരത്തെ രാജസ്ഥാൻ റോയൽസും ഹാർദിക്കിനായി മുംബൈയെ സമീപിച്ചിരുന്നെങ്കിലും ആ ചർച്ചകൾ പിന്നീട് വഴിമുട്ടുകയായിരുന്നു. യുവതാരം റിയാൻ പരാഗിനെ ഭാവി നായകനായി വളർത്തുന്ന രാജസ്ഥാന്റെ നിലപാട് ഹാർദിക്കിന് അവിടെ നായകസ്ഥാനം ലഭിക്കുന്നതിന് തടസ്സമായി. അതിനാൽ തന്നെ, ക്യാപ്റ്റൻ സ്ഥാനം ഉറപ്പുനൽകുന്ന കൊൽക്കത്തയുമായുള്ള കരാറിനാണ് നിലവിൽ മുൻഗണന ലഭിക്കുന്നത്.

Also read: ലിസ്റ്റിൻ സ്റ്റീഫൻ അവതരിപ്പിക്കുന്ന ബിജുമേനോൻ ചിത്രം 'അവറാച്ചൻ ആൻഡ് സൺസ്' : സെക്കൻഡ് ലുക്ക് പോസ്റ്റർ റിലീസായി

ഐപിഎൽ നിയമപ്രകാരം ഫ്രാഞ്ചൈസികൾ തമ്മിൽ ധാരണയിലെത്തിയ ശേഷം കളിക്കാരന്റെ കൂടി സമ്മതത്തോടെ മാത്രമേ ട്രേഡിംഗ് പൂർത്തിയാക്കാൻ സാധിക്കൂ എന്നതിനാൽ, വരും ദിവസങ്ങളിൽ ഇക്കാര്യത്തിൽ കൂടുതൽ വ്യക്തതയുണ്ടാകുമെന്നാണ് കരുതപ്പെടുന്നത്.

Content Highlight: Kolkata offer Pandya captaincy

#Latest News #Sports News #Hardik Pandya #Kolata Offers Captancy