---
title: "'സ്‌ക്രിപ്റ്റിന്റെ ഏത് ഭാഗമാണ് ഇപ്പോള്‍ നടന്നു കൊണ്ടിരിക്കുന്നത്?'; ബുര്‍ഖ ധരിച്ച് നിസ്‌കരിച്ച രാഖി സാവന്തിന് ട്രോള്‍ പൂരം"
english_title: "'Which part of the script is currently running?'; Troll Pooram for Rakhi Sawant who prayed in burqa"
publisher: "moviemax.in"
canonical_url: "https://moviemax.in/news/99294/which-part-of-the-script-is-currently-running-troll-pooram-for-rakhi-sawant-who-prayed-in-burqa"
published_at: "2023-02-24T12:41:00+05:30"
category: "Bollywood"
language: "ml"
image: "https://cf.zdn.im/img/truevisionnews.com/0/image-uploads/63f863589ac81_ragi.jpg"
keywords: []
---

# 'സ്‌ക്രിപ്റ്റിന്റെ ഏത് ഭാഗമാണ് ഇപ്പോള്‍ നടന്നു കൊണ്ടിരിക്കുന്നത്?'; ബുര്‍ഖ ധരിച്ച് നിസ്‌കരിച്ച രാഖി സാവന്തിന് ട്രോള്‍ പൂരം

> **Lead Summary:** ഭര്‍ത്താവ് ആദില്‍ ഖാന്‍ ദുറാനിയുമായുള്ള പ്രശ്‌നത്തെ തുടര്‍ന്ന് വാര്‍ത്തകളില്‍ നിറഞ്ഞ് നില്‍ക്കുകയാണ് നടി രാഖി സാവന്ത്. ഇറാനിയന്‍ യുവതിയുടെ ബലാത്സംഗ പരാതിയില്‍ കഴിഞ്ഞ ദിവസം ആദിലിനെ കര്‍ണാടക പൊലീസ് കസ്റ്റഡിയില്‍ എടുത്തിരുന്നു.

## Article Content

ഭര്‍ത്താവ് ആദില്‍ ഖാന്‍ ദുറാനിയുമായുള്ള പ്രശ്‌നത്തെ തുടര്‍ന്ന് വാര്‍ത്തകളില്‍ നിറഞ്ഞ് നില്‍ക്കുകയാണ് നടി രാഖി സാവന്ത്. ഇറാനിയന്‍ യുവതിയുടെ ബലാത്സംഗ പരാതിയില്‍ കഴിഞ്ഞ ദിവസം ആദിലിനെ കര്‍ണാടക പൊലീസ് കസ്റ്റഡിയില്‍ എടുത്തിരുന്നു.

ഫെബ്രുവരി 27 വരെയാണ് ആദിലിനെ കസ്റ്റഡിയില്‍ എടുത്തിരിക്കുന്നത്. കഴിഞ്ഞ ദിവസം രാഖിയും മൈസൂരുവില്‍ എത്തിയിരുന്നു. താന്‍ ഹിന്ദുവായതിനാല്‍ ആദിലിന്റെ കുടുംബം തന്നെ സ്വീകരിക്കാന്‍ തയാറല്ല എന്ന് അവന്റെ പിതാവ് പറഞ്ഞതായും രാഖി പറഞ്ഞിരുന്നു.

ആദിലിന്റെ വീട്ടില്‍ താന്‍ എത്തിയപ്പോള്‍ അവന്റെ കുടുംബം തന്റെ മുന്നില്‍ വാതില്‍ അടയ്ക്കുകയാണ് ചെയ്തതെന്നും രാഖി പറഞ്ഞിരുന്നു.

താന്‍ ഇസ്ലാം മതം സ്വീകരിച്ചുവെന്നും രാഖി പറഞ്ഞിരുന്നു. ഇതിനിടെ ദുബായില്‍ വച്ച് പള്ളിയില്‍ നിസ്‌കരിക്കുന്ന വീഡിയോയും പുറത്തു വന്നിരുന്നു. ഇതോടെ രാഖിയ്‌ക്കെതിരെ ട്രോളുകളാണ് സോഷ്യല്‍ മീഡിയയില്‍ നിറയുന്നത്.

മുന്‍കൂട്ടി എഴുതി തയാറാക്കിയ സ്‌ക്രിപ്റ്റിന്റെ ഏത് ഭാഗമാണ് ഇപ്പോള്‍ നടന്നു കൊണ്ടിരിക്കുന്നത് എന്നാണ് ട്രോളന്മാര്‍ ചോദിക്കുന്നത്. ഈ ഭാഗം എപ്പോള്‍ കഴിയും? ഇനി സാധാരണ ജീവിതത്തിലേക്ക് തിരിച്ചു വന്നുകൂടെ, ആദിലിനെ ജയലിലേക്ക് പറഞ്ഞ് അയക്കണം എന്ന് തന്നെ ആയിരുന്നെങ്കില്‍ എന്തിനാണ് ബുര്‍ഖ ധരിച്ചത്? എന്നൊക്കെയുള്ള ട്രോളുകളാണ് രാഖിക്ക് നേരെ ഉയരുന്നത്.

അതേസമയം, ആദില്‍ ഖാനെതിരെ ഗാര്‍ഹിക പീഡനത്തിനും വഞ്ചനയ്ക്കും രാഖി കേസ് കൊടുത്തിട്ടുണ്ട്. എന്നാല്‍ ആദില്‍ ജയിലില്‍ കിടന്നാലും താന്‍ ഡിവോഴ്‌സ് നല്‍കില്ല എന്നാണ് രാഖി പറയുന്നത്. അയാള്‍ അനുഭവിക്കണം എന്നും രാഖി മാധ്യമങ്ങളോട് പറഞ്ഞിരുന്നു.

### Related Links & Sources
- [Original Story Source](https://moviemax.in/news/99294/which-part-of-the-script-is-currently-running-troll-pooram-for-rakhi-sawant-who-prayed-in-burqa)