പുലിമുരുകന് ശേഷം മോഹന്ലാലിനെ നായകനാക്കി വൈശാഖ് സംവിധാനം ചെയ്യുന്ന പുതിയ സിനിമയുടെ ഫസ്റ്റ്ലുക്ക് പോസ്റ്റർ പുറത്തിറങ്ങി. ‘മോൺസ്റ്റർ’ എന്നാണ് സിനിമയ്ക്ക് പേര് നൽകിയിരിക്കുന്നത്. ലക്കി സിങ് എന്ന കഥാപാത്രമായാണ് മോഹൻലാൽ എത്തുന്നത്. ചിത്രം നിർമിക്കുന്നത് ആശീര്വാദ് സിനിമാസിന്റെ ബാനറിൽ ആന്റണി പെരുമ്പാവൂരാണ്.
ഇതുവരെ കാണാത്ത ഗെറ്റപ്പിൽ ഒരു സിക്ക് വേഷധാരിയായി തോക്കും കൈയ്യിലേന്തിയാണ് മോഹൻലാൽ പോസ്റ്ററിലുള്ളത്. പുലിമുരുകൻ തിരക്കഥാകൃത്ത് ഉദയ് കൃഷ്ണയാണ് മോൺസ്റ്ററിനായി കഥയൊരുക്കിയിരിക്കുന്നത്. പുലിമുരുകൻ ടീം ഒന്നിക്കുന്ന ചിത്രത്തെക്കുറിച്ച് കൊവിഡിന് മുൻപ് പ്രഖ്യാപിച്ചിരുന്നു. ഇന്ന് സിനിമയുടെ ചിത്രീകരണം ആരംഭിക്കുകയുമാണ്.
സതീഷ് കുറുപ്പാണ് ഛായാഗ്രഹണം നിര്വ്വഹിക്കുന്നത്. എഡിറ്റിങ് ഷമീർ മുഹമ്മദ്. സംഗീതം ദീപക് ദേവ്. ആർട് ഷാജി നടുവിൽ. ആക്ഷൻ സ്റ്റണ്ട് സിൽവ. ഷാജി കൈലാസ് സംവിധാനം ചെയ്ത 'എലോണി'നു ശേഷം മോഹന്ലാല് അഭിനയിക്കുന്ന ചിത്രവുമാണിത്. ഈ ചിത്രവും ഒടിടി റിലീസായിരിക്കുമെന്ന് അടുത്തിടെ ആന്റണി പെരുമ്പാവൂര് പ്രഖ്യാപിച്ചിരുന്നു.
മരക്കാര് അറബിക്കടലിന്റെ സിംഹം, ആറാട്ട്, ബ്രോ ഡാഡി, 12ത്ത് മാന്, റാം, എലോണ്, ബറോസ്, എമ്പുരാൻ തുടങ്ങി ഒട്ടനവധി സിനിമകളാണ് മോഹൻലാലിന്റേതായി വരും നാളുകളിൽ പുറത്തിറങ്ങാനായിരിക്കുന്നത്.
മരക്കാർ ഒടിടി റിലീസ് സംബന്ധിച്ച വിവാദങ്ങൾ അടുത്തിടെ ഏറെ വാർത്താപ്രാധാന്യം നേടിയിരുന്നു. അതിന് പിന്നാലെയാണ് ആശീർവാദ് സിനിമാസ് ഒരുക്കുന്ന 5 സിനിമകളുടെ ഒടിടി റിലീസിനെ കുറിച്ച് ആന്റണി പെരുമ്പാവൂർ പ്രഖ്യാപിച്ചിരുന്നത്.
Content Highlight: Mohanlal's new movie 'Monster' first look poster out
