പ്രചോദിപ്പിക്കുന്ന ഒട്ടേറെ വീഡിയോകളാണ് ദിവസവും നാം സോഷ്യല് മീഡിയയിലൂടെ കാണുന്നത്. ഒരു കുരങ്ങനും അതിന് അന്നം നല്കിയിരുന്നയാളും തമ്മിലുള്ള ആത്മ ബന്ധം സൂചിപ്പിക്കുന്ന വീഡിയോ ആണ് സോഷ്യല് മീഡിയയില് വൈറലായിരിക്കുന്നത്. തനിക്ക് ഭക്ഷണം നല്കിയിരുന്ന ആള് മരിച്ചതോടെ അദ്ദേഹത്തിന്റെ മൃതദേഹത്തിനരികില് വിഷമിച്ചിരിക്കുന്ന ഒരു കുരങ്ങനെയാണ് വീഡിയോയില് കാണുന്നത്.
മരിച്ചയാള്ക്ക് കുരങ്ങന് ഉമ്മ കൊടുന്നതും പൂമാലയില് പിടിച്ച് വലിക്കുന്നതും ഉണര്ത്താന് ശ്രമിക്കുന്നതുമൊക്കെ വീഡിയോയില് വ്യക്തമാണ്. ശ്രീലങ്കയിലാണ് ഈ സംഭവം നടന്നത്. 56- കാരനായ പീതാംബരം രാജന് അസുഖത്തെത്തുടര്ന്ന് ഒക്ടടോബര് 17-നാണ് മരിച്ചത്.
ബന്ധുക്കള്ക്കും അന്ത്യോപചാരം അര്പ്പിക്കുന്നതിനായി അദ്ദേഹത്തിന്റെ മൃതശരീരം പൊതുദര്ശനത്തിന് വെച്ചപ്പോഴാണ് ഒരു കുരങ്ങന് അവിടേയ്ക്ക് വന്നത്. കുരങ്ങനെ കണ്ട് ആദ്യം എല്ലാവരും ഒന്ന് അമ്പരന്നു. എന്നാല് പിന്നീടാണ് പീതാംബരം കുറച്ചുനാളായി ഭക്ഷണം കൊടുത്തുകൊണ്ടിരുന്ന കുരങ്ങനാണിതെന്ന് എല്ലാവര്ക്കും മനസിലായത്.
https://twitter.com/i/status/1582616495557070848
ട്വിറ്ററിലൂടെ ആണ് വീഡിയോ പ്രചരിക്കുന്നത്. വീഡിയോ വൈറലായതോടെ കമന്റുകളുമായി നിരവധി ആളുകളും രംഗത്തെത്തി. നൊമ്പരം ഉണ്ടാക്കുന്ന വീഡിയോ എന്നും മനോഹരം ഈ സൗഹൃദം എന്നുമൊക്കെ പലരും കമന്റ് ചെയ്തു. മൃഗങ്ങള്ക്ക് മനുഷ്യരെക്കാള് സ്നേഹമുണ്ടെന്നും ചിലര് കമന്റ് ചെയ്തു.
Content Highlight: The man who fed him died, and the monkey tried to wake him up; The video goes viral
