മൃഗങ്ങള്ക്കെതിരേയുള്ള ക്രൂരത അവസാനിപ്പിക്കണമെന്ന് നിരന്തരം ആഹ്വാനം ചെയ്യുമ്പോഴും ഒരു ഭാഗത്ത് മൃഗങ്ങള് വേട്ടയാടപ്പെടുകയാണ്. അത്തരത്തില് കണ്ണില്ലാത്ത ക്രൂരതയുടെ ഒരു ദൃശ്യമാണ് ഇപ്പോള് സമൂഹ മാധ്യമങ്ങളില് ചര്ച്ചയാകുന്നത്.
പുള്ളിപ്പുലിയെ ക്രൂരമായി ഉപദ്രവിക്കുന്ന ഒരു യുവാവിന്റെ വീഡിയോ ആണ് ഇപ്പോള് സോഷ്യല് മീഡിയയില് വൈറലാകുന്നത്. നടുറോഡില് വെച്ച് പുള്ളിപ്പുലിയുടെ വാലിൽ പിടിച്ചുവലിക്കുകയാണ് ഇവിടെ ഈ യുവാവ്. യുവാവിന്റെ ചെയ്തികളെ പ്രോത്സാഹിപ്പിക്കുന്ന ഒരുകൂട്ടം ആളുകളെയും വീഡിയോയില് കാണാം.
ചുറ്റുമുണ്ടായിരുന്നവര് യുവാവിന്റെ ചെയ്തികൾ മൊബൈലിൽ പകർത്തുകയായിരുന്നു. ട്വിറ്ററിലൂടെയാണ് വീഡിയോ പ്രചരിക്കുന്നത്. കാടിറങ്ങിയ പുള്ളിപ്പുലിയുടെ വാലിലും പിൻകാലിലുമായി പിടിച്ചുവലിക്കുന്ന യുവാവിനെ ആണ് വീഡിയോയില് കാണുന്നത്.
https://twitter.com/i/status/1559898072775561217
അതേസമയം ഒന്ന് പ്രതികരിക്കാന് പോലും പറ്റാത്ത അവസ്ഥയിലായിരുന്നു പുള്ളിപ്പുലി. 20 സെക്കൻഡ് മാത്രം ദൈർഘ്യമുള്ള വീഡിയോ ഐഎഫ്എസ് ഉദ്യോഗസ്ഥനായ പർവീൺ കസ്വാനാണ് ട്വിറ്ററിലൂടെ പങ്കുവെച്ചത്. 'ഈ ദൃശ്യത്തിലുള്ള മൃഗത്തെ തിരിച്ചറിയൂ' എന്ന അടിക്കുറിപ്പോടെയാണ് പർവീൺ കസ്വാൻ വീഡിയോ പങ്കുവെച്ചത്.
വീഡിയോ വൈറലായതോടെ നിരവധിയാളുകളാണ് രൂക്ഷ വിമർശനവുമായി രംഗത്തെത്തിയത്. സംഭവം നടന്നത് എവിടെയാണെന്നോ എന്നാണെന്നോ വ്യക്തമല്ല. അതേസമയം വീഡിയോയില് കാണുന്ന ഈ കുറ്റവാളികളെ കണ്ടെത്തണമെന്നാണ് കമന്റുകളിലൂടെ ആളുകള് ആവശ്യപ്പെടുന്നത്.
Content Highlight: Eyeless cruelty; A young man grabs a leopard's tail; The video went viral
