---
title: "'ഞാന്‍ ഒന്ന് വര്‍ക് ഷോപ്പില്‍ കയറി'; പത്ത് ദിവസത്തോളം ആശുപത്രിയില്‍! സുബി ലക്ഷ്മി"
english_title: "'I went into the workshop'; Ten days in the hospital! Subi Lakshmi"
publisher: "moviemax.in"
canonical_url: "https://moviemax.in/news/57843/i-went-into-the-workshop-ten-days-in-the-hospital-subi-lakshmi"
published_at: "2022-07-28T15:25:00+05:30"
category: "Malayalam"
language: "ml"
image: "https://cf.zdn.im/img/truevisionnews.com/0/image-uploads/62e25d89d6fa8_subi_lakshmi.jpg"
keywords: []
---

# 'ഞാന്‍ ഒന്ന് വര്‍ക് ഷോപ്പില്‍ കയറി'; പത്ത് ദിവസത്തോളം ആശുപത്രിയില്‍! സുബി ലക്ഷ്മി

> **Lead Summary:** മലയാളികള്‍ക്ക് എന്നും പ്രിയപ്പെട്ട താരമാണ് സുബി ലക്ഷ്മി. ഇപ്പോഴിതാ തന്റെ ജീവിതത്തിലെ ചില വെല്ലുവിളികളേയും അതേ രീതിയില്‍ കൈകാര്യം ചെയ്യുകയാണ് സുബി. ദിവസങ്ങളോളം ആശുപത്രിയില്‍ കിടക്കേണ്ടി വന്നതിനെക്കുറിച്ചാണ് സുബി തമാശ ചുവയോടെ സംസാരിക്കുന്നത്. സോഷ്യല്‍ മീഡിയയില്‍ പങ്കുവെച്ച വീഡിയോയിലൂടെയാണ് തന്റെ ആരോഗ്യപ്രശ്‌നത്തെക്കുറിച്ച് താരം മനസ് തുറന്നത്. 

## Article Content

മലയാളികള്‍ക്ക് എന്നും പ്രിയപ്പെട്ട താരമാണ് സുബി ലക്ഷ്മി. ഇപ്പോഴിതാ തന്റെ ജീവിതത്തിലെ ചില വെല്ലുവിളികളേയും അതേ രീതിയില്‍ കൈകാര്യം ചെയ്യുകയാണ് സുബി. ദിവസങ്ങളോളം ആശുപത്രിയില്‍ കിടക്കേണ്ടി വന്നതിനെക്കുറിച്ചാണ് സുബി തമാശ ചുവയോടെ സംസാരിക്കുന്നത്. സോഷ്യല്‍ മീഡിയയില്‍ പങ്കുവെച്ച വീഡിയോയിലൂടെയാണ് തന്റെ ആരോഗ്യപ്രശ്‌നത്തെക്കുറിച്ച് താരം മനസ് തുറന്നത്. 

'ഞാന്‍ ഒന്ന് വര്‍ക് ഷോപ്പില്‍ കയറി' എന്ന് പറഞ്ഞുകൊണ്ട് ആണ് ഇന്‍സ്റ്റഗ്രാമില്‍ ഫോട്ടോ പങ്കുവച്ചത്. പിന്നാലെ ഫേസ്ബുക്കിലൂടെ പുറത്ത് വിട്ട വീഡിയോയില്‍ തന്റെ അസുഖത്തെ കുറിച്ച് സുബി മനസ് തുറക്കുന്നുണ്ട്. എന്റെ കൈയ്യിലിരിപ്പ് നല്ലത് അല്ലാത്തത് കൊണ്ട് ആണ് 'വര്‍ക് ഷോപ്പില്‍' ഒന്ന് കയറേണ്ടി വന്നത്. വേറെ ഒന്നുമല്ലെന്നാണ് താരം പറയുന്നത്.

തനിക്ക് സമയത്ത് ഭക്ഷണം കഴിക്കുക, മരുന്നുകള്‍ കൃത്യമായി കഴിയ്ക്കുക എന്നിങ്ങനെയുള്ള യാതൊരു നല്ല ശീലവും ഇല്ലെന്നാണ് സുബി പറയുന്നത്. അതുകൊണ്ടാണ് എല്ലാം കൂടെ ഒരുമിച്ച് വന്ന് പത്ത് ദിവസത്തോളം ആശുപത്രിയില്‍ കിടക്കേണ്ടി വന്നതെന്നും സുബി പറയുന്നു. പിന്നാലെ തനിക്ക് സംഭവിച്ച കാര്യങ്ങളും താരം വ്യക്തമാക്കുന്നു.

ഷൂട്ടിന് പോകേണ്ടിയിരുന്നതിന്റെ തലേദിവസമാണ് വയ്യാതാകുന്നത്. നെഞ്ചുവേദനയും ശരീരവേദനുമായിരുന്നു. ഭക്ഷണം കഴിക്കാന്‍ പറ്റുന്നില്ല. ഇളനീര്‍ വെള്ളം കുടിച്ചപ്പോഴേക്കും ഛര്‍ദ്ദിച്ചു. നെഞ്ചു വേദന അധികമായപ്പോള്‍ ക്ലിനിക്കില്‍ പോയി ഇസിജി എടുത്തിരുന്നുവെങ്കില്‍ അതിലൊന്നും പ്രശ്‌നമുണ്ടായിരുന്നില്ല. എന്നാല്‍ പൊട്ടാസ്യം കുറവാണെന്നും അതിന് കഴിക്കാന്‍ മരുന്ന് തരികയും ചെയ്തിരുന്നു.

പക്ഷെ താന്‍ ആ മരുന്ന് കഴിച്ചിരുന്നില്ലെന്നാണ് സുബി പറയുന്നത്. വര്‍ക്ക് ഒഴിവാക്കുക എന്നത് തന്നെ സംബന്ധിച്ച് ഏറെ ബുദ്ധിമുട്ടുള്ള കാര്യമാണെന്ന് സുബി പറയുന്നു. പൈസയ്ക്ക് വേണ്ടിയല്ലെന്നും വെറുതെ ഇരിക്കാന്‍ പറ്റാത്തത് കൊണ്ടാണെന്നും താരം പറയുന്നുണ്ട്. കൊറോണക്കാലത്ത് കുറേക്കാലം വീട്ടില്‍ ഇരുന്ന് മടുത്തിരുന്നുവെന്നും താരം ഓര്‍ക്കുന്നുണ്ട്. ആ സമയത്ത് മരുന്നോ ഭക്ഷണമോ താന്‍ ശ്രദ്ധിക്കില്ലെന്നും താരം പറയുന്നുണ്ട്.

ഭക്ഷണം കഴിക്കാന്‍ എല്ലാവരും നിര്‍ബന്ധിച്ചാല്‍ പോലും താന്‍ കഴിക്കാറില്ലെന്നും തോന്നുമ്പോള്‍ മാത്രമാണ് കഴിക്കുന്നതെന്നും സുബി പറയുന്നു. എന്നാല്‍ ആ ദുശ്ശീലമാണ് എന്നെ വീഴ്ത്തിയത്. ആഹാരം കഴിക്കാതെ ഗാസ്ട്രിക് പ്രോബ്ലം ഭയങ്കരമായിട്ടുണ്ടായി.

കൂടാതെ മഗ്‌നീഷ്യവും പൊട്ടാസ്യവും സോഡിയവും എല്ലാം ശരീരത്തില്‍ കുറഞ്ഞുവെന്നാണ് താരം പറയുന്നത്. അതുകാരണം സുബി പത്ത് ദിവസത്തോളം ആശുപത്രിയില്‍ അഡ്മിറ്റ് ആവുകയായിരുന്നു. മഗ്‌നീഷ്യം ശരീരത്തില്‍ കയറ്റുന്നത് വലിയ പ്രശ്നമല്ലെങ്കിലും പൊട്ടാസ്യം കയറ്റുമ്പോള്‍ ഭയങ്കര വേദനയാണെന്നാണ് താരം പറയുന്നത്.

ഇതിന് പുറമെ പാന്‍ക്രിയാസില്‍ കല്ല് ഉണ്ടെന്നും പക്ഷെ നിലവിലെ സാഹചര്യത്തില്‍ അത്ര പ്രശ്നമല്ലെന്നും സുബി പറയുന്നു. എന്നാല്‍ ഇതേ രീതിയില്‍ മുന്നോട്ട് പോയാല്‍ ചിലപ്പോള്‍ പ്രശ്നമായേക്കാം എന്നും താരം പറയുന്നുണ്ട്. മരുന്ന് കഴിച്ചിട്ട് മാറിയില്ല എന്നുണ്ടെങ്കില്‍ കീ ഹോള്‍ ചെയ്ത് നീക്കേണ്ടി വരും. പിന്നെ തൈറോയിഡിന്റെ പ്രശ്നമുണ്ട്. ആ മെഡിസിനും ഞാന്‍ കൃത്യമായി എടുക്കാറുണ്ടായിരുന്നില്ലെന്നും ഇനി മുതല്‍ അതും ശ്രദ്ധിക്കണമെന്നും സുബി പറയുന്നു.

എന്തായാലും താന്‍ ഇപ്പോള്‍ കൃത്യമായി ഭക്ഷണം കഴിക്കാന്‍ തുടങ്ങിയെന്നാണ് സുബി പറയുന്നത്. തന്റെ ഉഴപ്പായിരുന്നു എല്ലാത്തിനും കാരണമെന്നും സുബി പറയുന്നു. വിശന്നാലും മടിച്ചിട്ട് ഭക്ഷണം കഴിക്കാത്ത അവസ്ഥ ഉണ്ടായിട്ടുണ്ട്. പച്ചവെള്ളം കുടിച്ച് വയറ് നിറയ്ക്കും, ഒരു നേരം ഒക്കെയാണ് കഴിച്ചിരുന്നതെന്നും സുബി പറയുന്നു. എന്നാല്‍ ഇനി അങ്ങനെയുള്ള ശീലങ്ങള്‍ എല്ലാം മാറ്റി എടുക്കണമെന്നാണ് സുബിയുടെ തീരുമാനം.

തന്റെ അനുഭവത്തില്‍ നിന്നും പഠിച്ചതാണ് ഇതെല്ലാം. ഇപ്പോള്‍ വലിയ കുഴപ്പങ്ങളൊന്നും ഇല്ല. ജീവിതത്തില്‍ തന്നെ പോലെ അടുക്കും ചിട്ടയും ഇല്ലാതെ നടക്കുന്നവര്‍ ആരെങ്കിലും ഉണ്ടെങ്കില്‍ അവര്‍ക്ക് അറിവ് പകരാന്‍ വേണ്ടിയാണ് താന്‍ ഈ വീഡിയോ പങ്കുവച്ചതെന്നും സുബി വ്യക്തമാക്കുന്നുണ്ട്.

### Related Links & Sources
- [Original Story Source](https://moviemax.in/news/57843/i-went-into-the-workshop-ten-days-in-the-hospital-subi-lakshmi)