ബോളിവുഡിലെ പ്രിയപ്പെട്ട ഗ്ലാമറസ് നായികയായിരുന്ന മല്ലിക ഷെരാവത്ത് ഒരിടവേളയ്ക്ക് ശേഷം തിരിച്ചു വരാനൊരുങ്ങുകയാണ്. ആർ കെ എന്ന ചിത്രത്തിലൂടെയാണ് മല്ലിക ബിഗ് സ്ക്രീനിലേക്ക് തിരിച്ചെത്തുന്നത്.
2004 ൽ പുറത്തിറങ്ങിയ മർഡർ എന്ന സിനിമയിലൂടെയാണ് നടി ബോളിവുഡിൽ ചർച്ചാ വിഷയമായത്. സിനിമയിൽ ഇമ്രാൻ ഹാഷ്മിയും മല്ലികയും ഒരുമിച്ചുള്ള ഇന്റിമേറ്റ് സീനുകളും മല്ലികയുടെ ബിക്കിനി സീനുകളും ബി ടൗണിൽ വലിയ കോളിളക്കം സൃഷ്ടിച്ചു.
ഇപ്പോൾ സിനിമയിലേക്ക് തിരിച്ചു വരുന്ന പശ്ചാത്തലത്തിൽ താൻ മുമ്പ് ചെയ്ത ഗ്ലമറസ് വേഷങ്ങളെക്കുറിച്ചും തനിക്ക് സിനിമാ മേഖലയിൽ നിന്നുമുണ്ടായ അനുഭവങ്ങളും പങ്കുവെക്കുകയാണ് മല്ലിക ഷെരാവത്ത്. താൻ അതീവ ഗ്ലാമറസ് ആയി അഭിനയിക്കുന്നത് മൂലം ഇന്ത്യയിലെ സ്ത്രീകൾക്ക് തന്നോട് ചില അനിഷ്ടമുണ്ടായിരുന്നെന്നാണ് മല്ലിക പറയുന്നത്. പക്ഷെ പുരുഷൻമാർക്ക് തന്നോട് വലിയ സ്നേഹമായിരുന്നെന്നും മല്ലിക ഷെരാവത്ത് പറയുന്നു.
എനിക്ക് തോന്നുന്നത് എന്റെ ഗ്ലാമർ അവരെ സംബന്ധിച്ച് വളരെയധികമായിരുന്നു. എനിക്ക് അതിൽ ഒരു ഖേദവും ഉണ്ടായിരുന്നില്ല. മർഡറിൽ ഞാൻ ബിക്കിനി ധരിച്ചു. എനിക്ക് മുമ്പും നടിമാർ ബിക്കിനി ധരിച്ചിട്ടുണ്ടായിരുന്നു. എനിക്ക് നല്ല ശരീരമാണ്. ബീച്ചിൽ ഒരു സാരി ധരിച്ച് നിൽക്കണമെന്നാണോ നിങ്ങൾക്ക്. ഞാൻ ബിക്കിനി ധരിക്കുകയും എന്റെ ശരീരം ആഘോഷിക്കുകയും ചെയ്യും.
കാരണം എന്നെ സംബന്ധിച്ച് അത് വളരെ സ്വാതന്ത്ര്യം നൽകുന്നതായിരുന്നു. പക്ഷെ അത് അഭിമുഖീകരിക്കാൻ ആളുകൾക്ക് പറ്റുന്നുണ്ടായിരുന്നില്ല. പ്രത്യേകിച്ചും സ്ത്രീകൾക്ക്. പുരുഷൻമാർക്ക് എന്നോട് ഒരു പ്രശ്നവും ഉണ്ടായിരുന്നില്ല. ഇന്ത്യയിലെ പുരുഷൻമാർ എന്നെ സ്നേഹിക്കുന്നു. ഞാൻ തിരിച്ച് അവരെയും സ്നേഹിക്കുന്നു. ചില സ്ത്രീകൾക്ക് മാത്രമാണ് എന്നോട് നീരസം. എന്തു കൊണ്ടാണെന്ന് എനിക്കറിയില്ല. എനിക്ക് സാഹോദര്യം ഇഷ്ടമാണ്, മല്ലിക ഷെരാവത്ത് പറഞ്ഞു.
നേരത്തെ സിനിമയിൽ സ്ത്രീകളോടുള്ള മനോഭാവത്തിന് മാറ്റം വന്നു തുടങ്ങിയെന്ന് മല്ലിക ഷെരാവത്ത് പറഞ്ഞിരുന്നു. മുമ്പ് നായികമാർക്ക് സിനിമകളിൽ പ്രാധാന്യം ഉണ്ടായിരുന്നില്ല. വ്യക്തിത്വം ഇല്ലാത്ത ശൂന്യമായ കഥാപാത്രങ്ങളായിരുന്നു നടിമാർക്ക് ലഭിച്ചിരുന്നത്. ഇന്ന് അതിൽ മാറ്റമുണ്ട്. ഗെഹരിയാനിൽ ദീപിക ചെയ്തത് തന്നെയാണ് 15 വർഷങ്ങൾക്ക് മുമ്പ് മർഡറിൽ ഞാൻ ചെയ്തത്.
പക്ഷെ അന്ന് ആളുകളുടെ മനോഭാവം വേറെയായിരുന്നെന്നും മല്ലിക ഷെരാവത്ത് ചൂണ്ടിക്കാട്ടി. ദീപിക പദുകോൺ നായികയായെത്തിയ ഗെഹരിയാൻ എന്ന ചിത്രമാണ് മല്ലിക ഷെരാവത്ത് സൂചിപ്പിച്ചത്. ചിത്രത്തിലെ ദീപികയുടെ ഇന്റിമേറ്റ് സീനുകൾ ഏറെ ചർച്ചയായിരുന്നു.സിനിമയിലെ ആദ്യ കാലത്ത് മാധ്യമങ്ങളിലെയും സിനിമാ മേഖലയിലെയും ഒരു വിഭാഗം തന്നെ ശല്യപ്പെടുത്തിയിരുന്നെന്നും മല്ലിക ഷെരാവത്ത് പറഞ്ഞിരുന്നു.
Content Highlight: Men of India love me, Mallika Sherawat
