'ദൃശ്യം രണ്ടി'ന് ശേഷം മോഹൻലാലും(Mohanlal) ജീത്തു ജോസഫും വീണ്ടും ഒന്നിക്കുന്നുവെന്ന നിലയിൽ ശ്രദ്ധനേടിയ ചിത്രമാണ് ട്വല്ത്ത് മാൻ(12th Man). കെ ആര് കൃഷ്ണകുമാറിന്റെ തിരക്കഥയിലെത്തുന്ന ചിത്രം ത്രില്ലര് ഗണത്തിൽപ്പെട്ട ചിത്രമാണ്.
ഇപ്പോഴിതാ ചിത്രത്തിന്റെ ട്രെയിലർ അപ്ഡേറ്റ് പങ്കുവെച്ചിരിക്കുകയാണ് അണിയറ പ്രവർത്തകർ. ട്വൽത്ത് മാന്റെ ട്രെയിലർ ഇന്ന് വൈകുന്നേരം എത്തുമെന്ന് മോഹൻലാൽ അടക്കമുള്ളവർ അറിയിച്ചു. ഇന്ന് 6 മണിക്കാകും ട്രെയിലർ റിലീസ് ചെയ്യുക. അതേസമയം, ചിത്രം ഉടൻ റിലീസ് ചെയ്യുമെന്ന് വിവരവും പുറത്തുവരുന്നുണ്ട്.
ഒടിടിയായി ഡിസ്നി പ്ലസ് ഹോട്സ്റ്റാറിലായിരിക്കും ചിത്രം റിലീസ് ചെയ്യുക. ഏതാനും ദിവസങ്ങൾക്ക് മുമ്പ് പുറത്തിറങ്ങിയ ചിത്രത്തിന്റെ ടീസർ ഏറെ ശ്രദ്ധനേടിയിരുന്നു. ആശിര്വാദ് സിനിമാസിന്റെ ബാനറില് ആന്റണി പെരുമ്പാവൂര് ആണ് ചിത്രം നിര്മിക്കുന്നത്.
മോഹൻലാലും ജീത്തു ജോസഫും വീണ്ടും ഒന്നിക്കുമ്പോള് പ്രേക്ഷകരുടെ പ്രതീക്ഷയും ഏറുകയാണ്. എന്തു ദുരൂഹതയാകും മോഹൻലാല് ചിത്രത്തില് മറനീക്കി പുറത്തുവരികയെന്ന ആകാംക്ഷയിലാണ് പ്രേക്ഷകര്. ശ്വാസമടക്കി കാണേണ്ട ത്രില്ലര് ചിത്രമായിട്ടു തന്നെയാണ് ട്വല്ത്ത് മാനെയും പ്രേക്ഷകര് ആകാംക്ഷയോടെ കാത്തിരിക്കുന്നത്.
അനുശ്രീ, അദിതി രവി, ഷൈൻ ടോം ചാക്കോ, സൈജു കുറുപ്പ്, വീണ നന്ദകുമാര്, ശിവദ നായര് തുടങ്ങി ഒട്ടേറെ താരങ്ങള് ട്വല്ത്ത് മാനില് അഭിനയിക്കുന്നുണ്ട്.
സതീഷ് കുറുപ്പ് ആണ് ചിത്രത്തിന്റെ ഛായാഗ്രാഹണം നിര്വഹിക്കുന്നത്. രാജീവ് കോവിലകമാണ് ചിത്രത്തിന്റെ കലാസംവിധായകൻ. ലിന്റ ജീത്തുവാണ് ചിത്രത്തിന്റെ കോസ്റ്റ്യൂം ഡിസൈൻ.
Content Highlight: 'Twelfth Man' ready for release, trailer arrives today
