---
title: "'അൽപം പോലും മുഷിഞ്ഞില്ല, ചെറുപ്പകാലത്തെ നാട്ടിൻപുറങ്ങളും പ്രണയവും വീണ്ടും ഓർമയിലെത്തി; 'ബെത്‌ലഹേം കുടുംബ യൂണിറ്റ്' കണ്ട് വി.ഡി. സതീശൻ"
english_title: "V.D. Satheesan Praises ‘Bethlehem Kudumba Unit’; Says It Brought Back His Youth"
publisher: "moviemax.in"
canonical_url: "https://moviemax.in/news/387951/vd-satheesan-praises-bethlehem-kudumba-unit"
published_at: "2026-10-20T20:05:00+05:30"
category: "Malayalam"
language: "ml"
image: "https://cf.zdn.im/img/truevisionnews.com/0/image-uploads/6ad77d917bde6_vd-satheesan-praises-bethlehem-kudumba-unit.jpg"
keywords: ["VDSatheesan", "NivinPauly", "MalayalamCinema", "GirishAD", "FilmReview"]
---

# 'അൽപം പോലും മുഷിഞ്ഞില്ല, ചെറുപ്പകാലത്തെ നാട്ടിൻപുറങ്ങളും പ്രണയവും വീണ്ടും ഓർമയിലെത്തി; 'ബെത്‌ലഹേം കുടുംബ യൂണിറ്റ്' കണ്ട് വി.ഡി. സതീശൻ

> **Lead Summary:** **നി**വിൻ പോളിയെ നായകനാക്കി ഗിരീഷ് എ. ഡി. സംവിധാനം ചെയ്ത 'ബെത്‌ലഹേം കുടുംബ യൂണിറ്റ്'നെ പ്രശംസിച്ച് വി. ഡി. സതീശൻ. ട്രീറ്റ്മെന്റിലാണ് സിനിമ വ്യത്യസ്തമാകുന്നതെന്നും പടം അൽപം പോലും മുഷിപ്പിച്ചില്ലെന്നും പറഞ്ഞ അദ്ദേഹം, തന്റെ ചെറുപ്പകാലവുമായി പെട്ടെന്ന് കണക്ട് ചെയ്യാൻ പറ്റിയെന്നും കുറിച്ചു.

## Article Content

**നി**വിൻ പോളിയെ നായകനാക്കി ഗിരീഷ് എ. ഡി. സംവിധാനം ചെയ്ത 'ബെത്‌ലഹേം കുടുംബ യൂണിറ്റ്'നെ പ്രശംസിച്ച് വി. ഡി. സതീശൻ. ട്രീറ്റ്മെന്റിലാണ് സിനിമ വ്യത്യസ്തമാകുന്നതെന്നും പടം അൽപം പോലും മുഷിപ്പിച്ചില്ലെന്നും പറഞ്ഞ അദ്ദേഹം, തന്റെ ചെറുപ്പകാലവുമായി പെട്ടെന്ന് കണക്ട് ചെയ്യാൻ പറ്റിയെന്നും കുറിച്ചു.

നിവിൻ, ഗിരീഷ്, സംഗീത് റോഷൻ ഷാനവാസ്, ഭാവന സ്റ്റുഡിയോസ് തുടങ്ങി നിരവധി പേർ വി. ഡി. സതീശന് നന്ദി അറിയിച്ച് രംഗത്തെത്തുകയും ചെയ്തു.

**വി. ഡി. സതീശന്റെ വാക്കുകൾ ഇങ്ങനെ**

മാസത്തിൽ ഒരു സിനിമയെങ്കിലും കാണാറുണ്ടായിരുന്നത് തിരക്കുകൾ കാരണം മുടങ്ങിപ്പോയിരുന്നു. ഒരു ഇടവേളയ്ക്ക് ശേഷം ഇന്നലെയാണ് ഒരു സിനിമ ഒറ്റയിരുപ്പിൽ കണ്ടത്. മകൾക്കും അവളുടെ സുഹൃത്തിനുമൊപ്പം അത്രമേൽ ആസ്വദിച്ചാണ് ബത്‌ലഹേം കുടുംബ യൂണിറ്റ് കണ്ടു തീർത്തത്.

ട്രീറ്റ്മെന്റിലാണ് സിനിമ വ്യത്യസ്തമാകുന്നത്. അൽപം പോലും മുഷിഞ്ഞില്ല. എന്റെ ചെറുപ്പകാലവുമായി പെട്ടെന്ന് കണക്ട് ചെയ്യാൻ പറ്റി. അന്ന് ഞങ്ങൾ കണ്ട നാട്ടിൻപുറങ്ങൾ, അവിടുത്തെ മനുഷ്യർ, അവിടെ കണ്ട സാധാരണ ജീവിതങ്ങൾ, അവർ തമ്മിലുള്ള സ്‌നേഹം, ഊഷ്മളമായ പ്രണയങ്ങൾ എന്നിവയെല്ലാം കൊണ്ടും പിടിച്ചിരുത്തിയ സിനിമ. കണ്ട് കഴിഞ്ഞപ്പോൾ എന്തേ കാണാൻ വൈകിപ്പോയെന്നാണ് ചിന്തിച്ചത്.

നായകനെന്നും നായികയെന്നും പറയാവുന്ന കഥാപാത്രങ്ങൾ മാത്രമല്ല, ഒന്നോ രണ്ടോ സീനുകളിൽ വരുന്നവർ പോലും അവരുടെ സാന്നിധ്യം അറിയിച്ചു. നന്നായി ചിരിപ്പിച്ചു. ഇടയ്ക്ക് ചിലപ്പോൾ വിഷമിപ്പിച്ചു. ആദ്യാവസാനം നന്നായി ആസ്വദിച്ചു. ഒരു കംപ്ലീറ്റ് ടീം വർക്കാണ് ഈ സിനിമ.

ഒരു സിനിമ കണ്ടിട്ട് ആസ്വാദന കുറിപ്പ് എഴുതുന്നത് പതിവില്ലാത്തതാണ്. പക്ഷേ അത്രമേൽ ആസ്വദിച്ചതുകൊണ്ടും റിഫ്രഷ് ആയതുകൊണ്ടുമാണ് എഴുതാമെന്ന് വച്ചത്. സംവിധായകൻ എ. ഡി. ഗിരീഷിനെയും നടൻ സംഗീത് പ്രതാപിനെയും ഫോണിൽ വിളിച്ച് അഭിനന്ദനങ്ങൾ അറിയിച്ചു.

നിവിൻ പോളിയെയും മമിത ബൈജുവിനെയും ഫോണിൽ കിട്ടിയില്ല. ഇവർക്കൊപ്പം എന്റെ മനസ്സിൽ കയറിയ ഒരാൾ ഗ്ലിക്സനാണ്. പാവം ഗ്ലിക്സൻ. സിനിമയ്ക്ക് വേണ്ടി പ്രവർത്തിച്ച എല്ലാവർക്കും അഭിനന്ദനങ്ങൾ.

V.D. Satheesan praised Nivin Pauly’s ‘Bethlehem Kudumba Unit,’ saying its treatment kept him engaged throughout and reminded him of his younger days. He said the film’s rural setting, warmth, humor, and performances made it a complete team effort.

### Related Links & Sources
- [Original Story Source](https://moviemax.in/news/387951/vd-satheesan-praises-bethlehem-kudumba-unit)