---
title: "'കണ്ണീരും കൂപ്പുകയ്യുമായുള്ള അഭിനയമൊന്നും വിലപ്പോവില്ല, മൺമറഞ്ഞുപോയ ആ മൂന്ന് ചെറുപ്പക്കാർക്കും ഉണ്ടായിരുന്നു ജീവിതം'; സുഹൈലിന്റെ മാതാവിനെതിരെ സിദ്ധു പനയ്ക്കൽ"
english_title: "Tears and folded hands won’t do: Sidhu Panakkal criticizes Suhail’s mother"
publisher: "moviemax.in"
canonical_url: "https://moviemax.in/news/387759/sidhu-panakkal-criticizes-suhail-mother"
published_at: "2026-10-19T14:56:00+05:30"
category: "Malayalam"
language: "ml"
image: "https://cf.zdn.im/img/truevisionnews.com/0/image-uploads/6ad5e343b9584_sidhu-panakkal-criticizes-suhail-mother.jpg"
keywords: ["SidhuPanakkal", "SuhailSajeev", "NedumbasseryAccident", "MalayalamCinema", "SocialMedia"]
---

# 'കണ്ണീരും കൂപ്പുകയ്യുമായുള്ള അഭിനയമൊന്നും വിലപ്പോവില്ല, മൺമറഞ്ഞുപോയ ആ മൂന്ന് ചെറുപ്പക്കാർക്കും ഉണ്ടായിരുന്നു ജീവിതം'; സുഹൈലിന്റെ മാതാവിനെതിരെ സിദ്ധു പനയ്ക്കൽ

> **Lead Summary:** ** നെടു**മ്പാശേരിയിൽ മൂന്നുപേരുടെ മരണത്തിനിടയാക്കിയ സുഹൈൽ സജീവിന്റെ മാതാവ് നൂഹ സജീവിന്റെ വിശദീകരണ വിഡിയോയെ വിമർശിച്ച് പ്രൊഡക്‌ഷൻ കൺട്രോളർ സിദ്ധു പനയ്ക്കൽ. ഏതു കാര്യത്തിനും പ്രതികരണം ഉണ്ടാകേണ്ടത് സംഭവം നടന്ന ഉടനെയാണെന്നും എല്ലാ വഴികളും അടയുമ്പോൾ കണ്ണീരും കൂപ്പുകയ്യുമായി വന്നുള്ള ഈ അഭിനയം സമൂഹത്തിൽ വിലപ്പോവില്ലെന്നും സിദ്ധു പനയ്ക്കൽ പറയുന്നു.

## Article Content

** നെടു**മ്പാശേരിയിൽ മൂന്നുപേരുടെ മരണത്തിനിടയാക്കിയ സുഹൈൽ സജീവിന്റെ മാതാവ് നൂഹ സജീവിന്റെ വിശദീകരണ വിഡിയോയെ വിമർശിച്ച് പ്രൊഡക്‌ഷൻ കൺട്രോളർ സിദ്ധു പനയ്ക്കൽ. ഏതു കാര്യത്തിനും പ്രതികരണം ഉണ്ടാകേണ്ടത് സംഭവം നടന്ന ഉടനെയാണെന്നും എല്ലാ വഴികളും അടയുമ്പോൾ കണ്ണീരും കൂപ്പുകയ്യുമായി വന്നുള്ള ഈ അഭിനയം സമൂഹത്തിൽ വിലപ്പോവില്ലെന്നും സിദ്ധു പനയ്ക്കൽ പറയുന്നു.

‘‘ഇന്നലെ സോഷ്യൽ മീഡിയയിൽ ഒരു വിഡിയോ കണ്ടു. ‘‘ഞങ്ങൾക്ക് നാല് പേർക്കും ഇനിയൊരു ജീവിതമുണ്ട്. ഞങ്ങളെ ഇതിൽ നിന്നും ഒഴിവാക്കി തരണം എന്ന് ഞാൻ അഭ്യർഥിക്കുകയാണ്.’’ മൺമറഞ്ഞുപോയ ആ മൂന്ന് ചെറുപ്പക്കാർക്കും ഉണ്ടായിരുന്നു ജീവിതം. ഏതു കാര്യത്തിനും പ്രതികരണം ഉണ്ടാകേണ്ടത് സംഭവം നടന്ന ഉടനെയാണ്. അല്ലാതെ എല്ലാ വഴികളും അടയുമ്പോൾ കണ്ണീരും കൂപ്പുകയ്യുമായി വന്നുള്ള ഈ അഭിനയമൊന്നും സമൂഹത്തിൽ വിലപ്പോവില്ല.

മദ്യലഹരിയിൽ വരുത്തിവച്ച വലിയൊരു അപകടം നടന്ന് മൂന്ന് ജീവനുകൾ പൊലിഞ്ഞ ഉടനെ ദൃക്സാക്ഷികൾ കേൾക്കുന്നത് ഒരു അശരീരിയാണ്. എല്ലാം എന്റെ വാപ്പ നോക്കിക്കോളും. എവിടുന്നാണ് ശബ്ദം എന്ന് നോക്കുമ്പോൾ കാറിൽ നിന്നിറങ്ങുന്നത് കാൽ നിലത്തുറയ്ക്കാത്ത ഒരു ചെറുപ്പക്കാരൻ. മൂന്നു കുടുംബങ്ങൾ തകർന്ന ഹൃദയത്തോടെ, നഷ്ടപ്പെടലിന്റെ വിങ്ങലോടെ, നെഞ്ചിൽ ഒതുക്കാനാവാത്ത സങ്കടത്തോടെ അലറി കരയുമ്പോൾ മറുവശത്ത് പിറന്നാൾ സമ്മാനമായി വാങ്ങിക്കൊടുത്ത കാറിന്റെ വിശദാംശങ്ങളെപ്പറ്റി സന്തോഷത്തോടെയുള്ള മാതാവിന്റെ വിവരണങ്ങൾ സോഷ്യൽ മീഡിയയിലൂടെ അപകടം വരുത്തിവെച്ച കാറിനേക്കാൾ വേഗത്തിൽ ഓടുകയായിരുന്നു.

ഇതുരണ്ടും ഒരുമിച്ചു കാണാനിടയായ സാധാരണക്കാരായ ജനങ്ങളുടെ പ്രതികരണങ്ങൾ ആ കുടുംബത്തോടുള്ള വെറുപ്പും വിദ്വേഷവുമായി രൂപം പ്രാപിച്ചു. ജനങ്ങളുടെ പ്രതികരണങ്ങൾ വളരെ വേഗത്തിൽ സോഷ്യൽ മീഡിയയിൽ ആളിപ്പടരുകയും ചെയ്തു. കൊടുങ്കാറ്റ് പോലെ ആഞ്ഞടിച്ച ജനവികാരം തങ്ങളുടെ ബിസിനസിനെയും സൽ പേരിനെയും വല്ലാതെ ബാധിച്ചു തുടങ്ങുകയും, നിയമത്തിന്റെ പഴുതിലൂടെ മകനു ജാമ്യം കിട്ടുമെന്ന ഉറച്ച വിശ്വാസം തകരുകയും, പണത്തിനും പവറിനും മേലെ പറക്കാൻ നിയമത്തിന് കഴിയും എന്ന് ബോധ്യപ്പെടുകയും ചെയ്തപ്പോൾ സമസ്താപരാധവും പറഞ്ഞു വന്ന ഈ വിഡിയോ ജനങ്ങൾക്ക് ഈ കുടുംബത്തോടുള്ള വെറുപ്പും വിദ്വേഷവും വർദ്ധിപ്പിക്കുകയെ ഉള്ളൂ എന്നാണ് ആ വിഡിയോയ്ക്ക്‌ താഴെ വന്ന നൂറുകണക്കിന് കമന്റുകൾ വായിച്ചാൽ മനസ്സിലാവുക.

ഈ വിഡിയോ വരേണ്ടിയിരുന്നത് ഒക്ടോബർ 12നായിരുന്നു. വൈകി വന്ന വിവേകം കൊണ്ട് പ്രത്യേകിച്ചു ഗുണമൊന്നും ഉണ്ടാവാൻ സാധ്യതയില്ല. പേരന്റിങ് എന്ന് കേട്ടിട്ടുണ്ടാകുമല്ലോ. കുട്ടികളുടെ ശാരീരികവും വൈകാരികവും സാമൂഹികവുമായ വളർച്ചയെ സഹായിക്കുന്ന പ്രക്രിയയാണ് പേരന്റിങ്. നാലുതരം പേരന്റിങ് ഉണ്ട് എന്നാണ് പറയുന്നത്. അതോറിറ്റേറിയൻ പേരന്റിങ്, അതോറിറ്റേറ്റിവ് പേരന്റിങ്, പെർമിസീവ് പേരന്റിങ്, അൺ ഇൻവോൾവ്ഡ് പേരന്റിങ്.

ഇതിൽ, കുട്ടികൾക്ക് അനുവദനീയമായ എല്ലാ സ്വാതന്ത്ര്യവും കാര്യമായ നിയന്ത്രണം ഇല്ലാതെ നൽകുന്ന പാരന്റിങ് രീതിയാണ് പെർമിസീവ് പേരന്റിങ്. ഒരു രക്ഷിതാവ് എന്നതിനപ്പുറം ഒരു സുഹൃത്തിനെപ്പോലെ കുട്ടികളോട് പെരുമാറുന്ന പേരന്റിങ് രീതിയാണിത്. തങ്ങളുടെ കുട്ടി തെറ്റൊന്നും ചെയ്യില്ല എന്ന അമിത ആത്മവിശ്വാസമുള്ള രക്ഷിതാക്കൾ ഈ പാരന്റിങ് ഇനത്തിൽ പെടും. കുട്ടികൾ തെറ്റ് ചെയ്താൽ തിരുത്തുക പോലും ഈ രക്ഷിതാക്കൾ ചെയ്യാറില്ല. ഇത് കുട്ടികൾ മുതലാക്കുകയും കൂടുതൽ തെറ്റുകളിലേക്ക് കടക്കാൻ അവർക്ക് പ്രേരണയാവുകയും ചെയ്യും . ഇങ്ങനെ വളരുന്ന കുട്ടികൾ പലപ്പോഴും ലഹരി ഉപയോഗത്തിലേക്കും മറ്റു അസാന്മാർഗിക പ്രവർത്തികളിലേക്കും വഴിമാറി സഞ്ചരിക്കും എന്ന് വിദഗ്ധർ ചൂണ്ടിക്കാട്ടുന്നു. ഏത് പേരന്റിങ് രീതിയിലാണ് ഈ യുവാവ് വളർന്നിട്ടുണ്ടാവുക എന്ന് നമുക്ക് ഊഹി ക്കാവുന്നതേയുള്ളൂ

നഷ്ടപരിഹാരങ്ങൾക്കൊന്നും ആ മൂന്നു കുടുംബങ്ങളുടെ നഷ്ടം നികത്താൻ ആവില്ലെങ്കിലും ആ മൂന്ന് കുടുംബങ്ങൾക്കും ആശ്രയമാകേണ്ടിയിരുന്നവരുടെ വിയോഗത്തിന് തക്കതായ പരിഹാരം ആ കുടുംബങ്ങൾക്ക് ലഭിക്കേണ്ടതുണ്ട്. ഒപ്പം നിയമാനുസൃതമായ ശിക്ഷ ആ വിയോഗങ്ങൾക്ക് കാരണമായവർക്കും ലഭിക്കണം.’’–സിദ്ധു പനയ്ക്കലിന്റെ വാക്കുകൾ.

ഞങ്ങൾ ഉള്ളിടത്തോളം കാലം മരിച്ചവരുടെ കുടുംബത്തിന് ഒപ്പമുണ്ടാകുമെന്നും മകന്റെ ഭാവിയിൽ ആശങ്കയുണ്ടെന്നുമാണ് സമൂഹ മാധ്യമത്തിൽ പങ്കുവച്ച വിഡിയോയിലൂടെ സുഹൈലിന്റെ മാതാവ് നൂഹ പറഞ്ഞത്.

‘‘പല കാര്യങ്ങളും ചർച്ച ചെയ്യപ്പെടുമ്പോഴും അടിസ്ഥാനരഹിതമായ വാർത്തകൾ പ്രചരിക്കുമ്പോഴും ഞങ്ങൾ മനുഷ്യരാണ്, ഞാൻ അമ്മയാണ് എന്ന കാര്യം പരിഗണിക്കണം. എന്റെ കുഞ്ഞിനെ ഓർത്തുള്ള ആശങ്ക ഒരു വശത്തുണ്ട്. അതേപോലെത്തന്നെ മൂന്ന് കുഞ്ഞുങ്ങൾ നഷ്ടപ്പെട്ട വിഷമവും എനിക്കുണ്ട്. ഇതിന് രണ്ടിനും ഇടയിലൂടെയാണ് ഞാൻ പോകുന്നത്. എന്റെ കുഞ്ഞ് നാളെ എന്താകും എന്നാലോചിച്ചുള്ള വിഷമം. അതിനോടൊപ്പം തന്നെ മൂന്ന് ജീവൻ പോയ വിഷമം. ഇതിനിടയ്ക്ക് എന്താണ് പറയേണ്ടത്, എന്താണ് ചെയ്യേണ്ടത് എന്നറിയില്ല. ഇത്രയും ദിവസം എഴുന്നേറ്റിരിക്കാൻ പോലും പറ്റാത്ത അവസ്ഥയായിരുന്നു. അത്രയും ബുദ്ധിമുട്ടുള്ള അവസ്ഥയിലൂടെയാണ് കടന്നുപോകുന്നത്.

ഒരു അമ്മ എന്ന നിലയിലും സംരംഭക എന്ന നിലയിലും ആ കുടുംബത്തോടുള്ള പിന്തുണ അറിയിക്കുന്നു. ഞങ്ങൾ ഉള്ളിടത്തോളം കാലം ആ കുടുംബത്തെ പിന്തുണയ്ക്കും. ആരുടെയും വേദന കുറച്ചുകാണിക്കാനോ കൂട്ടിക്കാണിക്കാനോ അല്ല. എന്റെ നിസ്സഹായാവസ്ഥയാണ്. ഞങ്ങൾക്ക് നാലുപേർക്കും ഇനിയൊരു ജീവിതമുണ്ട്. ഞങ്ങളെല്ലാവരെയും പറ്റി പറയുന്ന വാർത്ത പ്രചരിക്കുമ്പോൾ ഓരോരുത്തരും ഓർക്കുക, നിങ്ങളെപ്പോലെത്തന്നെ സാധാരണ ഒരു മനുഷ്യനാണ്, സാധാരണ അമ്മയാണ്. എല്ലാവരെയും പോലെയുള്ള കുടുംബമാണ്. പ്രചരിപ്പിക്കുന്ന ഓരോ കാര്യങ്ങളിൽ നിന്നും ഞങ്ങളെ ഒഴിവാക്കിത്തരണമെന്ന് അഭ്യർഥിക്കുന്നു.’’–നൂഹയുടെ വാക്കുകൾ.

Production controller Sidhu Panakkal has criticized the clarification video posted by Suhail Sajeev’s mother, Nuhas Sajeev, in connection with the Nedumbassery accident that claimed three lives. He said the response came too late and cannot erase the pain of the victims’ families, while Nuhas said she is also grieving and asked to be kept out of further controversy.

### Related Links & Sources
- [Original Story Source](https://moviemax.in/news/387759/sidhu-panakkal-criticizes-suhail-mother)