---
title: "അശ്ലീല ഉള്ളടക്കങ്ങൾ നീക്കം ചെയ്യാൻ ഡൽഹി ഹൈക്കോടതി ഉത്തരവ്; ജാൻവി കപൂറിന് ആശ്വാസം"
english_title: "Delhi High Court Orders Removal of Obscene Content Related to Janhvi Kapoor"
publisher: "moviemax.in"
canonical_url: "https://moviemax.in/news/378184/delhi-high-court-orders-removal-obscene-content-janhvi-kapoor"
published_at: "2026-08-12T15:53:00+05:30"
category: "Bollywood"
language: "ml"
image: "https://cf.zdn.im/img/truevisionnews.com/0/image-uploads/6a7c49e1d41ec_delhi-high-court-orders-removal-obscene-content-janhvi-kapoor.jpg"
keywords: ["Janhvi Kapoor", "Delhi High Court", "personality rights"]
---

# അശ്ലീല ഉള്ളടക്കങ്ങൾ നീക്കം ചെയ്യാൻ ഡൽഹി ഹൈക്കോടതി ഉത്തരവ്; ജാൻവി കപൂറിന് ആശ്വാസം

> **Lead Summary:** **[** ബോളിവുഡ് നടി ജാൻവി കപൂറുമായി ബന്ധപ്പെട്ട് ഇന്റർനെറ്റിൽ പ്രചരിക്കുന്ന അശ്ലീല ഉള്ളടക്കങ്ങൾ നീക്കം ചെയ്യാൻ ഡൽഹി ഹൈക്കോടതി ഉത്തരവിട്ടു. എന്നാൽ നടിയുടെ പേരിലുള്ള എല്ലാ ഫാൻ പേജുകൾക്കും പൂർണ്ണ വിലക്കേർപ്പെടുത്തണമെന്ന ആവശ്യം കോടതി നിരസിച്ചു.

## Article Content

**[** ബോളിവുഡ് നടി ജാൻവി കപൂറുമായി ബന്ധപ്പെട്ട് ഇന്റർനെറ്റിൽ പ്രചരിക്കുന്ന അശ്ലീല ഉള്ളടക്കങ്ങൾ നീക്കം ചെയ്യാൻ ഡൽഹി ഹൈക്കോടതി ഉത്തരവിട്ടു. എന്നാൽ നടിയുടെ പേരിലുള്ള എല്ലാ ഫാൻ പേജുകൾക്കും പൂർണ്ണ വിലക്കേർപ്പെടുത്തണമെന്ന ആവശ്യം കോടതി നിരസിച്ചു.

വ്യക്തിഗത അവകാശങ്ങൾ അഭിപ്രായ സ്വാതന്ത്ര്യത്തെ തടയുന്ന രീതിയിൽ വ്യാഖ്യാനിക്കാൻ കഴിയില്ലെന്ന് ജസ്റ്റിസ് അനൂപ് ജയറാം ഭംഭാനി അധ്യക്ഷനായ ബെഞ്ച് വ്യക്തമാക്കി. തന്റെ പേരും ചിത്രങ്ങളും വാണിജ്യ ആവശ്യങ്ങൾക്കായി അനധികൃതമായി ഉപയോഗിക്കുന്നത് തടയണമെന്നും വ്യക്തിത്വ അവകാശങ്ങൾ സംരക്ഷിക്കണമെന്നും ആവശ്യപ്പെട്ട് ജാൻവി കപൂർ നൽകിയ ഹർജിയിലാണ് ഈ ഉത്തരവ്.

അപകീർത്തികരമായ ഉള്ളടക്കങ്ങളിൽനിന്ന് നിയമപരമായ സംരക്ഷണം ലഭിക്കാൻ ജാൻവിക്ക് അർഹതയുണ്ടെന്ന് നിരീക്ഷിച്ച കോടതി, അശ്ലീലമോ അപകീർത്തികരമോ ആയ ഉള്ളടക്കങ്ങളുള്ള ലിങ്കുകൾ കൃത്യമായ പട്ടികയായി തയാറാക്കി നൽകാൻ ആവശ്യപ്പെട്ടു.

അതേസമയം, ഫാൻ പേജുകൾ പൂർണ്ണമായി നീക്കം ചെയ്യണമെന്ന ആവശ്യം കോടതി തള്ളിക്കളഞ്ഞു. ഫാൻ പേജുകളിൽ പ്രശംസയും വിമർശനവും ഒരുപോലെ ഉണ്ടാകാമെന്നും അത് അഭിപ്രായ സ്വാതന്ത്ര്യത്തിന്റെ പരിധിയിൽ വരുന്നതാണെന്നും കോടതി ചൂണ്ടിക്കാണിച്ചു.

പരിഹാരം ചിലപ്പോൾ പ്രശ്‌നത്തേക്കാൾ വഷളായേക്കാമെന്നും അത് അഭിപ്രായ സ്വാതന്ത്ര്യത്തിന്റെ അടിത്തറയെ ബാധിക്കുമെന്നും ജസ്റ്റിസ് ഭംഭാനി നിരീക്ഷിച്ചു. പൊതുമണ്ഡലത്തിലുള്ള എല്ലാവരും വിവിധ രീതിയിൽ വിമർശിക്കപ്പെടുന്നുണ്ടെന്നും ഇത്തരം പേജുകളെല്ലാം അടച്ചുപൂട്ടാൻ സാധിക്കില്ലെന്നും കോടതി വ്യക്തമാക്കി.

ആയിരക്കണക്കിന് വരുന്ന ലിങ്കുകൾ പരിശോധിക്കുന്നത് പ്രായോഗികമല്ലെന്ന് മെറ്റയ്ക്ക് വേണ്ടി ഹാജരായ അഭിഭാഷകൻ കോടതിയെ അറിയിച്ചതിനെ തുടർന്ന് കേസ് ഓഗസ്റ്റ് 17-ലേക്ക് മാറ്റി.

**English Summary: **The Delhi High Court ordered the removal of obscene content related to Bollywood actress Janhvi Kapoor from the internet, while rejecting her plea to completely ban all fan pages. Justice Anup Jairam Bhambhani emphasized that personality rights cannot be interpreted to curtail freedom of speech.

The court directed the submission of a precise list of offensive links and noted that fan pages often contain a mix of praise and criticism protected under free speech. The matter was adjourned to August 17 after Meta's counsel stated that checking thousands of links is impractical.

### Related Links & Sources
- [Original Story Source](https://moviemax.in/news/378184/delhi-high-court-orders-removal-obscene-content-janhvi-kapoor)