---
title: "കലാഭവൻ നവാസിന്റെ വേർപാടിന് ഒരു വർഷം; 'എനിക്ക് നഷ്ടപ്പെട്ടത് വലംകൈ ആണ്' , ഓർമ്മക്കുറിപ്പുമായി നിയാസ്"
english_title: "Kalabhavan Navas First Death Anniversary Niyas Bakker Emotional Note"
publisher: "moviemax.in"
canonical_url: "https://moviemax.in/news/375943/kalabhavan-navas-first-death-anniversary-niyas-bakker-note"
published_at: "2026-08-01T12:53:00+05:30"
category: "Malayalam"
language: "ml"
image: "https://cf.zdn.im/img/truevisionnews.com/0/image-uploads/6a6da2d19b302_kalabhavan-navas-first-death-anniversary-niyas-bakker-note.jpg"
keywords: ["Kalabhavan Navas", "Niyas Bakker", "Death Anniversary", "Malayalam Actor", "Mimicry"]
---

# കലാഭവൻ നവാസിന്റെ വേർപാടിന് ഒരു വർഷം; 'എനിക്ക് നഷ്ടപ്പെട്ടത് വലംകൈ ആണ്' , ഓർമ്മക്കുറിപ്പുമായി നിയാസ്

> **Lead Summary:** **[** നടനും മിമിക്രി കലാകാരനുമായ കലാഭവൻ നവാസ് വിടപറഞ്ഞിട്ട് ഇന്ന് ഒരു വർഷം. നവാസിന്റെ ഒന്നാം ചരമവാർഷികത്തിൽ സഹോദരനും നടനുമായ നിയാസ് ബക്കർ പങ്കുവെച്ച ഓർമ്മക്കുറിപ്പ് ശ്രദ്ധേയമാകുന്നു.

## Article Content

**[** നടനും മിമിക്രി കലാകാരനുമായ കലാഭവൻ നവാസ് വിടപറഞ്ഞിട്ട് ഇന്ന് ഒരു വർഷം. നവാസിന്റെ ഒന്നാം ചരമവാർഷികത്തിൽ സഹോദരനും നടനുമായ നിയാസ് ബക്കർ പങ്കുവെച്ച ഓർമ്മക്കുറിപ്പ് ശ്രദ്ധേയമാകുന്നു.

തനിക്ക് നഷ്ടപ്പെട്ടത് ഒരു അനുജനെ മാത്രമല്ല, ഉറ്റ കളിക്കൂട്ടുകാരനെയും കൂടിയാണെന്ന് നിയാസ് കുറിച്ചു. കുടുംബ കാര്യങ്ങളിൽ തീരുമാനമെടുക്കാൻ തന്റെ ബലമായി നിന്ന വലംകൈ ആണ് പോയതെന്നും, മായ്ക്കാൻ കഴിയാത്ത അടയാളമായി അവൻ എന്നും ഹൃദയത്തിലുണ്ടാകുമെന്നും നിയാസ് ഓർത്തെടുത്തു. നവാസിനായി എല്ലാവരുടെയും പ്രാർത്ഥനയും അദ്ദേഹം അഭ്യർത്ഥിച്ചു. ഹൃദയാഘാതത്തെ തുടർന്നായിരുന്നു നവാസിന്റെ മരണം.

'ഞങ്ങളുടെ നവാസ് വിട വാങ്ങിയിട്ട് ഇന്നേയ്ക്ക് ഒരു വർഷം തികയുകയാണ്. എനിക്ക് നഷ്ടപ്പെട്ടു പോയത് ഒരു അനുജൻ മാത്രമല്ല. എന്നേക്കാൾ രണ്ട് വയസിനു മാത്രം വ്യത്യാസമുള്ള അവൻ എനിക്കൊരു കളിക്കൂട്ടുകാരൻ കൂടിയായിരുന്നു. അല്പം കൂടി മുതിർന്നപ്പോൾ തൊഴിൽ രംഗത്തും ഒരു സഹപ്രവർത്തകനായി കൂടെത്തന്നെയുണ്ടായിരുന്നു.

കുടുംബവുമായി ബന്ധപ്പെട്ട ഏത് കാര്യങ്ങൾക്കും തീരുമാനമെടുക്കുമ്പോൾ എന്റെ ബലം നവാസും നിസാമുമായിരുന്നു. എന്റെ വലം കൈ ആണ് പോയത്. മരണം സർവ്വേശ്വരന്റെ സുനിശ്ചിതമായ തീരുമാനമാണല്ലോ അതുമായി പൊരുത്തപ്പെടലല്ലാതെ നിസാരരായ നമുക്ക് മറ്റു വഴികളില്ല.

ഉമ്മച്ചിയുടെ ശരീരത്തിൽ നിന്നും ഞങ്ങളെ വേർപ്പെടുത്തിയതിന്റെ അടയാളങ്ങൾ എന്റേയും നവാസിന്റെയും നിസാമിന്റെയും അടിവയറിനു മുകളിൽ ഒരു പൊക്കിൾകുഴിയായി സർവ്വശക്തൻ അടയാളപ്പെടുത്തിയിട്ടുണ്ട്. എത്ര മായ്ച്ചാലും മായ്ക്കാൻ കഴിയാത്ത അടയാളങ്ങൾ.മണ്ണോടു ചേരും വരെയും ആ അടയാളത്തിന്റെ അടിവേരുകൾ ഹൃദയത്തിലേയ്ക്ക് ആഴ്ന്നിറങ്ങി നിൽക്കും.

അത് തിരിച്ചറിയിക്കാൻ കൂടെപ്പിറന്നവർക്ക് പ്രകടനപരമായി ഒന്നും ചെയ്യേണ്ടതില്ല. ചെയ്യുകയുമില്ല. തിരഞ്ഞു വരുന്നവർക്ക് ബന്ധത്തിന്റെ തീവ്രത സൂചിപ്പിക്കാൻ അതിലും വലിയ അടയാളങ്ങൾ ഉണ്ടെന്ന് ഞാൻ വിശ്വസിക്കുന്നില്ല. തിരിച്ചറിവ് മാത്രം മതി.മക്കൾ നഷ്ടപ്പെട്ട അമ്മമാർക്കും.

കൂടപ്പിറപ്പുകൾ നഷ്ടപ്പെട്ട സഹോദരങ്ങൾക്കും. നഷ്ടപ്പെട്ടവർ നമുക്കൊപ്പമുണ്ടെന്ന ബോധ്യപ്പെടുത്തലിന്റെ ഈ ആശ്വാസക്കുറിപ്പല്ലാതെ മറ്റൊന്നും എനിക്കിന്ന് നൽകാനില്ല. പ്രിപ്പെട്ടവരുടെ പ്രാർത്ഥനയിൽ അവനെപ്പോഴും ഉണ്ടാകാറുണ്ട്. എങ്കിലും ഓർമ്മപ്പെടുത്തുകയാണ് ഇന്നാണ് നമ്മുടെ നവാസ് മരണപ്പെട്ടിട്ട് ഒരു വർഷം തികയുന്നത്. ഇന്നത്തെ പ്രാർത്ഥനയിൽ അവനെ പ്രത്യേകം ഓർക്കുമല്ലോ…' നിയാസ് കുറിച്ചു.

### Related Links & Sources
- [Original Story Source](https://moviemax.in/news/375943/kalabhavan-navas-first-death-anniversary-niyas-bakker-note)