---
title: "കാവേരി തർക്കത്തിൽ വിജയ് ചിത്രം ‘ജന നായകൻ’  പ്രതിസന്ധിയിൽ; കർണാടകയിലെ  നിരവധി തിയറ്ററുകളിൽ പ്രദർശനം നിർത്തിവെച്ചു"
english_title: "Vijay Jananayagan Movie Banned Karnataka Cauvery Protest"
publisher: "moviemax.in"
canonical_url: "https://moviemax.in/news/375793/vijay-jananayagan-movie-karnataka-cauvery-protest-ban"
published_at: "2026-07-31T16:42:00+05:30"
category: "Kollywood"
language: "ml"
image: "https://cf.zdn.im/img/truevisionnews.com/0/image-uploads/6a6c842bd7bbf_vijay-jananayagan-movie-karnataka-cauvery-protest-ban.jpg"
keywords: ["Vijay", "Cinema", "Karnataka", "Cauvery", "Protest"]
---

# കാവേരി തർക്കത്തിൽ വിജയ് ചിത്രം ‘ജന നായകൻ’  പ്രതിസന്ധിയിൽ; കർണാടകയിലെ  നിരവധി തിയറ്ററുകളിൽ പ്രദർശനം നിർത്തിവെച്ചു

> **Lead Summary:** **ബംഗളൂരു**:**[**തമിഴ്നാടും കർണാടകയും തമ്മിലുള്ള കാവേരി നദീജല തർക്കം വീണ്ടും പുകയുന്നതിനിടെ, തമിഴ്നാട് മുഖ്യമന്ത്രി വിജയ് നായകനായ ‘ജന നായകൻ’ സിനിമയ്ക്കെതിരെ കർണാടകയിൽ പ്രതിഷേധം ശക്തമാകുന്നു. ക്രമസമാധാന പ്രശ്നങ്ങൾ ഒഴിവാക്കുന്നതിന്റെ ഭാഗമായി സംസ്ഥാനത്തെ നിരവധി തിയറ്ററുകളിൽ ചിത്രത്തിന്റെ പ്രദർശനം തിയറ്റർ ഉടമകൾ സ്വമേധയാ നിർത്തിവെച്ചു.

## Article Content

**ബംഗളൂരു**:**[**തമിഴ്നാടും കർണാടകയും തമ്മിലുള്ള കാവേരി നദീജല തർക്കം വീണ്ടും പുകയുന്നതിനിടെ, തമിഴ്നാട് മുഖ്യമന്ത്രി വിജയ് നായകനായ ‘ജന നായകൻ’ സിനിമയ്ക്കെതിരെ കർണാടകയിൽ പ്രതിഷേധം ശക്തമാകുന്നു. ക്രമസമാധാന പ്രശ്നങ്ങൾ ഒഴിവാക്കുന്നതിന്റെ ഭാഗമായി സംസ്ഥാനത്തെ നിരവധി തിയറ്ററുകളിൽ ചിത്രത്തിന്റെ പ്രദർശനം തിയറ്റർ ഉടമകൾ സ്വമേധയാ നിർത്തിവെച്ചു.

തമിഴ്നാടിന് പ്രതിദിനം 3,500 ഘനയടി ജലം വിട്ടുകൊടുക്കണമെന്ന കാവേരി ജല നിയന്ത്രണ സമിതിയുടെ ഉത്തരവാണ് പുതിയ പ്രതിഷേധങ്ങൾക്ക് കാരണം. ഉത്തരവിനെതിരെ കന്നഡ സംഘടനകളും കർഷക സംഘടനകളും സംസ്ഥാന വ്യാപകമായി രംഗത്തുവന്നതോടെയാണ് തമിഴ്നാട് മുഖ്യമന്ത്രിയായ വിജയിയുടെ ചിത്രവും വിവാദത്തിലായത്.

കഴിഞ്ഞ ജൂലൈ 23-ന് റിലീസ് ചെയ്ത ‘ജന നായകൻ’ കർണാടകയിൽ 150ഓളം തിയറ്ററുകളിലാണ് പ്രദർശിപ്പിച്ചിരുന്നത്. ഇതിൽ 75ലധികം സിംഗിൾ സ്ക്രീനുകളും 50ഓളം മൾട്ടിപ്ലക്സ് സ്ക്രീനുകളും ഉൾപ്പെടുന്നു. എന്നാൽ പ്രതിഷേധം ശക്തമായതോടെ പല തിയറ്റർ ഉടമകളും പ്രദർശനം താൽക്കാലികമായി റദ്ദാക്കാൻ തീരുമാനിക്കുകയായിരുന്നു.

ബംഗളൂരുവിലെ ഉർവശി തിയറ്ററിൽ പോലീസ് നിർദ്ദേശത്തെ തുടർന്നാണ് പ്രദർശനം നിർത്തിയത്. തുടർന്ന് ജീവനക്കാർ സിനിമയുടെ പോസ്റ്ററുകളും കട്ടൗട്ടുകളും നീക്കം ചെയ്യുകയും, ഷെഡ്യൂൾ ചെയ്ത ഷോകൾക്ക് പകരം കന്നഡ ചിത്രമായ ‘കരാവലി’ പ്രദർശിപ്പിക്കുകയും ചെയ്തു.

പ്രതിഷേധം ഏറ്റവും ശക്തമായി തുടരുന്ന മാണ്ഡ്യ ജില്ലയിൽ ചിലയിടങ്ങളിൽ സിനിമയുടെ പോസ്റ്ററുകൾ പ്രതിഷേധക്കാർ കീറിമാറ്റി. തിയറ്ററുകൾക്ക് നേരെ ആക്രമണമുണ്ടാകാതിരിക്കാൻ പലയിടത്തും ജീവനക്കാർ തന്നെ വിജയിയുടെ ബാനറുകൾ നീക്കം ചെയ്യുകയായിരുന്നു.

അടിയന്തര സാഹചര്യത്തിൽ ക്രമസമാധാനം മുൻനിർത്തി പലയിടത്തും പോലീസ് സുരക്ഷ ശക്തമാക്കിയിട്ടുണ്ട്. വിഷയത്തിൽ തുടർനടപടികൾ ചർച്ച ചെയ്യുന്നതിനായി കർണാടക ഫിലിം ചേംബർ അടിയന്തര യോഗം വിളിച്ചു ചേർത്തിട്ടുണ്ട്. അടുത്ത 15 ദിവസത്തേക്ക് കർണാടക തമിഴ്നാടിന് ജലം വിട്ടുനൽകണമെന്ന കാവേരി വാട്ടർ മാനേജ്മെന്റ് അതോറിറ്റിയുടെ ഉത്തരവാണ് നിലവിലെ സംഘർഷങ്ങൾക്ക് കാരണം.

### Related Links & Sources
- [Original Story Source](https://moviemax.in/news/375793/vijay-jananayagan-movie-karnataka-cauvery-protest-ban)