---
title: "അമ്മയില്‍ വീണ്ടും രാജി, നടി ആശ അരവിന്ദ് എക്സിക്യൂട്ടീവ് സ്ഥാനമൊഴിഞ്ഞു"
english_title: "Actress Asha Aravind Resigns From AMMA Executive Committee Citing Personal Reasons"
publisher: "moviemax.in"
canonical_url: "https://moviemax.in/news/374436/asha-aravind-resigns-amma-executive-committee"
published_at: "2026-07-24T22:40:00+05:30"
category: "Malayalam"
language: "ml"
image: "https://moviemax.in/image-uploads/6a639cb9c7b8a_asha-aravind-resigns-amma-executive-committee.jpg"
keywords: ["Latest News", "Asha Aravind", "AMMA", "Malayalam Cinema", "Executive Committee"]
---

# അമ്മയില്‍ വീണ്ടും രാജി, നടി ആശ അരവിന്ദ് എക്സിക്യൂട്ടീവ് സ്ഥാനമൊഴിഞ്ഞു

> **Lead Summary:** മലയാള സിനിമാ താരസംഘടനയായ അസോസിയേഷൻ ഓഫ് മലയാളം മൂവി ആർട്ടിസ്റ്റ്സ് 'അമ്മ'യുടെ എക്സിക്യൂട്ടീവ് കമ്മിറ്റി അംഗത്വത്തിൽ നിന്ന് നടി ആശ അരവിന്ദ് രാജിവച്ചു.

## Article Content

മലയാള സിനിമാ താരസംഘടനയായ അസോസിയേഷൻ ഓഫ് മലയാളം മൂവി ആർട്ടിസ്റ്റ്സ് 'അമ്മ'യുടെ എക്സിക്യൂട്ടീവ് കമ്മിറ്റി അംഗത്വത്തിൽ നിന്ന് നടി ആശ അരവിന്ദ് രാജിവച്ചു.

> വ്യക്തിപരമായ കാരണങ്ങളാണ് രാജിക്ക് പിന്നിലെന്ന് ആശ അരവിന്ദ് സമർപ്പിച്ച രാജിക്കത്തിൽ വ്യക്തമാക്കുന്നു. "സംഘടനയുടെ ജനാധിപത്യപരമായ തീരുമാനങ്ങളെ ഞാൻ പൂർണമായും മാനിക്കുന്നു.

> അമ്മയുടെ അന്തസ്സും ഐക്യവും കാത്തുസൂക്ഷിക്കേണ്ടത് ഓരോ അംഗത്തിന്റെയും പ്രധാന കടമയാണ്. ആ ബോധ്യത്തിന്റെ അടിസ്ഥാനത്തിലാണ് ഈ തീരുമാനം" എന്ന് കത്തിൽ പറയുന്നു.അമ്മയിൽ നിലവിൽ ഉടലെടുത്തിരിക്കുന്ന ആഭ്യന്തര ചർച്ചകൾക്കിടയിലാണ് ആശയുടെ രാജി എന്നതും ശ്രദ്ധേയമാണ്.

നടിയും സംഘടനയുടെ നിലവിലെ ഭരണസമിതി അംഗവുമായ ശ്വേതാ മേനോനെതിരെ ഒരു വിഭാഗം വനിതാ അംഗങ്ങൾ അസംതൃപ്തി പ്രകടിപ്പിച്ച് രംഗത്ത് വന്നിരുന്നു. ഈ വിഷയത്തിൽ സംഘടനയ്ക്കകത്ത് ചർച്ചകളും പടയൊരുക്കവും നടക്കുന്നതിനിടെയാണ് ആശ അരവിന്ദിന്റെ പെട്ടെന്നുള്ള രാജി.

2002-ൽ പുറത്തിറങ്ങിയ 'നന്ദനം' എന്ന ചിത്രത്തിലൂടെ ശ്രദ്ധേയായ ആശ അരവിന്ദ് മലയാളത്തിലും തമിഴിലും നിരവധി സിനിമകളിൽ അഭിനയിച്ചിട്ടുണ്ട്. കഴിഞ്ഞ കുറച്ച് വർഷങ്ങളായി അമ്മയുടെ സജീവ പ്രവർത്തക കൂടിയായിരുന്നു അവർ.

സംഘടനയുടെ വിവിധ ചാരിറ്റി പ്രവർത്തനങ്ങളിലും വനിതാ ക്ഷേമ പരിപാടികളിലും ആശയുടെ സാന്നിധ്യം ഉണ്ടായിരുന്നു.അമ്മയുടെ ഭരണസമിതിയിൽ സ്ത്രീ പ്രാതിനിധ്യം ശക്തമാക്കുന്നതിന്റെ ഭാഗമായി കഴിഞ്ഞ തെരഞ്ഞെടുപ്പിൽ എക്സിക്യൂട്ടീവ് അംഗമായി തിരഞ്ഞെടുക്കപ്പെട്ടതായിരുന്നു ആശ.

സംഘടനയുടെ ആഭ്യന്തര പ്രശ്നങ്ങളിൽ നിലപാട് വ്യക്തമാക്കാതെയാണ് അവർ രാജിവച്ചിരിക്കുന്നത്.രാജിക്കത്ത് അമ്മയുടെ ജനറൽ സെക്രട്ടറിക്ക് കൈമാറിയതായി അടുത്ത വൃത്തങ്ങൾ അറിയിച്ചു. സംഘടനയുടെ ഐക്യത്തിന് വേണ്ടിയാണ് താൻ മാറിനിൽക്കുന്നതെന്ന സൂചനയും കത്തിൽ നൽകുന്നുണ്ട്.

ആശയുടെ രാജി അമ്മയ്ക്കകത്ത് പുതിയ ചർച്ചകൾക്ക് വഴിവെച്ചിട്ടുണ്ട്. ശ്വേതാ മേനോനെതിരായ വിഷയത്തിൽ സംഘടന എന്ത് തീരുമാനം എടുക്കുമെന്നാണ് ഇനി എല്ലാവരും ഉറ്റുനോക്കുന്നത്.

### Related Links & Sources
- [Original Story Source](https://moviemax.in/news/374436/asha-aravind-resigns-amma-executive-committee)