#Latest News #KT Jaleel #Mala Parvathi #Child Rights
(moviemax.in) കെ.ടി. ജലീൽ എം.എൽ.എ ഒരു അനുമോദന ചടങ്ങിനിടെ കുട്ടിയെക്കൊണ്ട് വാക്ക് തെറ്റിച്ചു പറയിപ്പിച്ച സംഭവത്തിൽ ബാലാവകാശ ലംഘനം നടന്നെന്ന ആരോപണങ്ങളെ തള്ളി നടി മാലാ പാർവതി. ഒരു അധ്യാപകന്റെ വാത്സല്യത്തോടെ കുട്ടികളെ അക്ഷരം തെറ്റുമ്പോൾ തിരുത്തിക്കൊടുക്കുന്നതും ശരിയായി ഉച്ചരിക്കാൻ പഠിപ്പിക്കുന്നതും എങ്ങനെയാണ് ബാലാവകാശ ലംഘനമാകുന്നതെന്ന് അവർ ചോദിച്ചു.
സ്നേഹത്തോടെയുള്ള തിരുത്തലുകളെ അപമാനമായും പീഡനമായും തെറ്റിദ്ധരിക്കുന്നതിനെതിരേ വിമർശനം ഉന്നയിച്ച മാലാ പാർവതി, "ദൈവമേ.. ഇതെന്ത് നാട്! ഇത് ഏത് നാട്?" എന്ന് തന്റെ സോഷ്യൽ മീഡിയ കുറിപ്പിലൂടെ പ്രതികരിച്ചു.
കുട്ടികളുടെ അവകാശങ്ങൾ സംരക്ഷിക്കപ്പെടണം എന്നതിൽ തർക്കമില്ലെന്നും എന്നാൽ അധ്യാപനവും അപമാനവും തമ്മിലുള്ള വ്യത്യാസം തിരിച്ചറിയാനുള്ള വിവേകം വേണമെന്നും അവർ കൂട്ടിച്ചേർത്തു.
അതേസമയം, തന്റെ പോസ്റ്റിന് താഴെ വന്ന വിമർശനങ്ങൾക്കുള്ള മറുപടിയായി ജലീലിനെതിരായ പ്രതിഷേധങ്ങളിൽ ഇരട്ടത്താപ്പുണ്ടെന്ന് മാലാ പാർവതി ആരോപിച്ചു. അൻസിബയെ മതം പറഞ്ഞ് അധിക്ഷേപിച്ച സംഭവത്തിൽ മൗനം പാലിച്ചവർ ജലീലിന്റെ കാര്യത്തിൽ കാണിക്കുന്ന ഈ "ശൗര്യം" എവിടെനിന്നു വന്നുവെന്ന് ചോദിച്ച അവർ, ഇത്തരം വിഷയങ്ങളിൽ കണ്ണുയർത്തി നോക്കാൻ പോലും ആരും തയ്യാറായില്ലെന്നും രൂക്ഷമായി വിമർശിച്ചു. കഴിഞ്ഞ ദിവസം പാലക്കാട് മണ്ണാർക്കാടാണ് വിവാദത്തിന് ആസ്പദമായ സംഭവം നടന്നത്.
Content Highlight: Mala Parvathi Defends KT Jaleel, Says Correcting Child Was Not Child Rights Violation
