'അമ്മയെ ഇങ്ങനെ പറയുന്നത് കണ്ടിരിക്കാൻ എനിക്ക് പറ്റില്ല'; കസിന്റെ യൂട്യൂബ് വ്ലോഗിന് പിന്നാലെയുള്ള സൈബർ ആക്രമണങ്ങളിൽ പ്രതികരിച്ച് അഹാന

( https://moviemax.in/ ) അമ്മൂമ്മയുമായുള്ള പ്രശ്നങ്ങൾ തുറന്നുപറഞ്ഞ് നടിയും ഇൻഫ്ലുവൻസറുമായ അഹാന കൃഷ്ണ. തന്റെ കസിൻ തൻവി തെറ്റിദ്ധരിപ്പിക്കുന്ന തരത്തിലുള്ള വീഡിയോയാണ് പങ്കുവെച്ചതെന്ന് അഹാന പറയുന്നു. തൻവിയുടെ വീഡിയോ പുറത്തുവന്നതിന് പിന്നാലെ അഹാനയുടെ അമ്മ സിന്ധു കൃഷ്ണയ്ക്കെതിരെ സോഷ്യൽ മീഡിയയിൽ വൻതോതിൽ വിമർശനങ്ങൾ ഉയർന്നിരുന്നു. ഇതോടെയാണ് തങ്ങളുടെ ഭാഗം വെളിപ്പെടുത്തി അഹാന രംഗത്തെത്തിയത്.

"ഇന്നലെ എന്റെ കസിൻ ഒരു വീഡിയോ പങ്കുവെച്ചിരുന്നു. അത് മനപൂർവ്വമാണോ അല്ലയോ എന്ന് എനിക്കറിയില്ല. എന്നാൽ അത് ഞങ്ങളെക്കുറിച്ച് വലിയ രീതിയിൽ ഒരു നെഗറ്റീവ് ഇംപാക്ട് ഉണ്ടാക്കി," എന്ന് അഹാന വീഡിയോയിലൂടെ വ്യക്തമാക്കി.

നിശബ്ദമായിരിക്കാൻ അച്ഛൻ എപ്പോഴും ഞങ്ങളോട് പറയാറുണ്ട്. ഇതാദ്യമായല്ല ഞങ്ങളുടെ കുടുംബത്തെക്കുറിച്ച് പലരും കള്ളം പറയുന്നത്. ഇവിടെ പ്രധാനമായും ടാർ​ഗെറ്റ് ചെയ്യപ്പെടുന്നത് എന്റെ അമ്മയാണ്. പറയാനാണെങ്കിൽ ഒരുപാട് കാര്യങ്ങളുണ്ട്. കുടുംബത്തിൽ നടക്കുന്ന ഡ്രാമ സോഷ്യൽ മീഡിയയിൽ വന്ന് ചർച്ച ചെയ്യുന്നത് ചീപ്പാണ്.

പുതിയ വ്ലോ​ഗിനുള്ള കണ്ടന്റ് ആയല്ലോ എന്ന് നിങ്ങൾ ചിലപ്പോൾ ചിന്തിക്കും. ഞങ്ങൾ അങ്ങനെയുള്ള ആൾക്കാരല്ല. തൻവിയെ കുഞ്ഞായപ്പോൾ മുതൽ കാണുന്നതാണ്. കൊച്ചുകുട്ടി പിച്ചും പേയും വന്ന് പറയുന്നെന്ന രീതിയിലാണ് അമ്മ കണ്ടത്. നാട്ടുകാരെന്തായാലും രണ്ട് മാസം കൂടുമ്പോൾ അമ്മയെ വില്ലനായി ചിത്രീകരിച്ച് തെറി വിളിക്കുന്നത് പതിവാണ്.

Also read: ഇനി കളി മാറും, ഒപ്പം ജോണറും! ഭരതനാട്യം 3 'രാസലീല' പ്രഖ്യാപിച്ചു; ഇത്തവണ പേടിപ്പിക്കാനും ചിരിപ്പിക്കാനും സൈജു കുറുപ്പ്

എന്നാൽ അമ്മയെ ഇങ്ങനെ പറയുന്നത് കണ്ടിരിക്കാൻ എനിക്ക് പറ്റില്ല. ഒരു കുടുംബവും പെർഫെക്ട് അല്ല. എല്ലാ കുടുംബത്തിലും എന്തെങ്കിലും പ്രശ്നമുണ്ടാകും. ഞങ്ങളും അമ്മൂമ്മയും തമ്മിൽ കോൺടാക്ടില്ലാത്തതും അപ്പൂപ്പൻ മരിക്കുന്നതും തമ്മിൽ ഒരു ബന്ധവും ഇല്ല. 2025 ഒക്ടോബർ 31 നാണ്. ഇഷാനിയുടെ ബർത്ത‍്ഡേയ്ക്ക് ഒരു ദിവസം മുൻപ്.

അമ്മൂമ്മയുമായി വലിയ പ്രശ്നം ഉണ്ടായത് കൊണ്ടാണ് ബർത്ത്ഡേയ്ക്ക് അമ്മൂമ്മയും അപ്പൂപ്പനും വരാതിരുന്നത്. പിന്നെ ഞങ്ങളെല്ലാവരും അമ്മൂമ്മയെ കാണുന്നത് അപ്പൂപ്പൻ മരിക്കുന്ന ദിവസമാണ്. അമ്മൂമ്മ വളരെ പ്രോബ്ലമാറ്റിക്കാണ്. അഡ്ജസ്റ്റ് ചെയ്യാൻ വളരെ ബുദ്ധിമുട്ടാണ്. എന്റെ അമ്മ വളരെ നല്ല അമ്മയാണ്. അമ്മയ്ക്ക് ആ സ്നേഹം ജീവിതത്തിൽ കിട്ടിയിട്ടില്ല.

ചെറുപ്പം തൊട്ട് അമ്മൂമ്മയുണ്ടാക്കുന്ന പ്രശ്നങ്ങൾ ഞങ്ങൾക്കറിയാം. പോട്ടെ, അമ്മൂമ്മയല്ലേ എന്ന് ഞങ്ങൾ വിചാരിക്കും. കുട്ടിക്കാലത്ത് ​ഗൾഫിൽ നിന്ന് കൊണ്ട് വന്ന സാധനങ്ങളല്ലാതെ മുതിർന്നപ്പോൾ ഞങ്ങൾക്കൊന്നും ​ഗ്രാന്റ് പാരന്റ്സ് തന്നിട്ടില്ല. ഞങ്ങൾ പ്രതീക്ഷിക്കുന്നുമില്ല. അപ്പൂപ്പൻ നല്ലയാളായിരുന്നു. അമ്മൂമ്മ എപ്പോഴും പ്രശ്നക്കാരി. അടി നടക്കും. പിന്നെ വീണ്ടും ശരിയാകും.

അപ്പൂപ്പന് വയ്യാതായപ്പോൾ അമ്മൂമ്മയുടെ സ്വഭാവം വല്ലാതെ മോശമായി. അപ്പൂപ്പന് ഹോം നഴ്സില്ലാതെ പറ്റില്ലായിരുന്നു. ഹോം നഴ്സിനെ ഏർപ്പാടാക്കിയത് ഞങ്ങളാണ്. വൃത്തിഭ്രാന്താണ് അമ്മൂമ്മയ്ക്ക്. പ്രശ്നങ്ങൾ കാരണം ഹോം നഴ്സുകൾ മാറിക്കൊണ്ടിരുന്നു. അപ്പൂപ്പന്റെ ഹെൽത്തിന്റെ കാര്യം പറഞ്ഞാണ് ഞങ്ങളും അമ്മൂമ്മയും തമ്മിൽ തെറ്റുന്നത്. അമ്മൂമ്മയുടെ എന്നല്ല, ഒരു മനുഷ്യന്റെയും വായിൽ നിന്ന് വരാൻ പാടില്ലാത്ത കാര്യങ്ങൾ ഞങ്ങളെക്കുറിച്ച് പറഞ്ഞു.

അന്ന് ഞങ്ങളെല്ലാം അമ്മൂമ്മയുമായുള്ള ബന്ധം അവസാനിപ്പിച്ചു. അമ്മയുടെ സഹോ​ദരിയും അമ്മൂമ്മയുമായുള്ള ബന്ധം അവസാനിപ്പിച്ചെന്നും" അഹാന വിഡിയോയിൽ പറയുന്നു. സിന്ധുവിന്റെ സഹോദരിയുടെ മകൾ തൻവി സുധീർ ഘോഷ് മുത്തശ്ശിയെ നോക്കാൻ കാനഡയിൽ നിന്ന് എത്തിയതിന് പിന്നാലെ യൂട്യൂബിൽ ഒരു വ്ലോ​ഗ് പങ്കുവച്ചിരുന്നു. ഇതിന് പിന്നാലെയാണ് അഹാനയ്ക്കും കുടുംബത്തിനുമെതിരെ വിമർശനങ്ങളുയർന്നത്.

Content Highlight: Ahaana Krishna, Tanvi, Sindhu Krishna controversy,Ahaana Krishna YouTube video, Krishna Sisters family dispute

#Ahaana Krishna #Sindhu Krishna #Tanvi Sudheer Ghosh #Ahaana Krishna Statement