---
title: "'എഡിറ്റ് ചെയ്യാമായിരുന്നു, ഒഴിഞ്ഞുമാറാനാകില്ല'; വീരപ്പൻ അഭിമുഖക്കേസിൽ സൺ ടിവിക്ക് വൻ തിരിച്ചടി, നടി സുകന്യക്ക് 10 ലക്ഷം രൂപ നൽകണം"
english_title: "Sun TV to pay Rs 10 lakh to actress Sukanya in Veerappan interview case"
publisher: "moviemax.in"
canonical_url: "https://moviemax.in/news/364707/sun-tv-to-pay-rs-10-lakh-to-actress-sukanya-in-veerappan-interview-case"
published_at: "2026-06-08T15:24:00+05:30"
category: "Malayalam"
language: "ml"
image: "https://cf.zdn.im/img/truevisionnews.com/0/image-uploads/6a2691981b285_zadgbn.jpg"
keywords: ["latest news", "Veerappan i", "Sukanya", "Sun TV"]
---

# 'എഡിറ്റ് ചെയ്യാമായിരുന്നു, ഒഴിഞ്ഞുമാറാനാകില്ല'; വീരപ്പൻ അഭിമുഖക്കേസിൽ സൺ ടിവിക്ക് വൻ തിരിച്ചടി, നടി സുകന്യക്ക് 10 ലക്ഷം രൂപ നൽകണം

> **Lead Summary:** **[** വർഷങ്ങൾക്ക് മുൻപ് സംപ്രേഷണം ചെയ്ത കൊള്ളക്കാരൻ വീരപ്പന്റെ അഭിമുഖവുമായി ബന്ധപ്പെട്ട മാനനഷ്ടക്കേസിൽ തെന്നിന്ത്യൻ താരം സുകന്യക്ക് 10 ലക്ഷം രൂപ നഷ്ടപരിഹാരം നൽകാൻ സൺ ടിവിയോട് മദ്രാസ് ഹൈക്കോടതി ഉത്തരവിട്ടു. വിചാരണ കോടതി വിധിക്കെതിരെ സൺ ടിവി നെറ്റ്‌വർക്ക് നൽകിയ അപ്പീൽ തള്ളിക്കൊണ്ട് ജസ്റ്റിസ് കെ. കുമരേഷ് ബാബുവാണ് വിധി പ്രഖ്യാപിച്ചത്.

## Article Content

**[** വർഷങ്ങൾക്ക് മുൻപ് സംപ്രേഷണം ചെയ്ത കൊള്ളക്കാരൻ വീരപ്പന്റെ അഭിമുഖവുമായി ബന്ധപ്പെട്ട മാനനഷ്ടക്കേസിൽ തെന്നിന്ത്യൻ താരം സുകന്യക്ക് 10 ലക്ഷം രൂപ നഷ്ടപരിഹാരം നൽകാൻ സൺ ടിവിയോട് മദ്രാസ് ഹൈക്കോടതി ഉത്തരവിട്ടു. വിചാരണ കോടതി വിധിക്കെതിരെ സൺ ടിവി നെറ്റ്‌വർക്ക് നൽകിയ അപ്പീൽ തള്ളിക്കൊണ്ട് ജസ്റ്റിസ് കെ. കുമരേഷ് ബാബുവാണ് വിധി പ്രഖ്യാപിച്ചത്.

 'നക്കീരൻ' മാഗസിൻ എഡിറ്റർ ആർ.ആർ. ഗോപാൽ വീരപ്പനുമായി നടത്തിയ അഭിമുഖം 1996 ഏപ്രിൽ 17-ന് സൺ ടിവി 'നേരുക്കുനേർ' എന്ന പരിപാടിയിലൂടെ സംപ്രേഷണം ചെയ്തിരുന്നു.

ഈ അഭിമുഖത്തിൽ മുൻ പ്രധാനമന്ത്രി പി.വി. നരസിംഹറാവുവിന്റെ മകനുമായി സുകന്യക്ക് അവിഹിത ബന്ധമുണ്ടെന്ന രീതിയിൽ വീരപ്പൻ ചില ആരോപണങ്ങൾ ഉന്നയിച്ചു. ഈ ബന്ധത്തിന്റെ വീഡിയോ പകർത്തി 1996-ലെ പൊതുതിരഞ്ഞെടുപ്പിന് മുൻപ് രാഷ്ട്രീയ വിലപേശലിനായി ഉപയോഗിച്ചുവെന്നും വീരപ്പൻ പറഞ്ഞിരുന്നു.

ഈ ആരോപണങ്ങൾ തികച്ചും വ്യാജവും അടിസ്ഥാനരഹിതവുമാണെന്നും, ഇത് തന്റെ സൽപ്പേരിനെയും വ്യക്തിജീവിതത്തെയും കരിയറിനെയും കടുത്ത രീതിയിൽ ബാധിച്ചുവെന്നും ചൂണ്ടിക്കാണിച്ചാണ് സുകന്യ കോടതിയെ സമീപിച്ചത്.

നക്കീരൻ നൽകിയ അഭിമുഖം തങ്ങൾ സംപ്രേഷണം ചെയ്യുക മാത്രമാണ് ചെയ്തതെന്നും, ഉള്ളടക്കത്തിൽ തങ്ങൾക്ക് പങ്കില്ലെന്നുമായിരുന്നു സൺ ടിവിയുടെ വാദം. എന്നാൽ പരിപാടി സംപ്രേഷണം ചെയ്യുന്നതിന് മുൻപ് അത് പരിശോധിക്കാനും എഡിറ്റ് ചെയ്യാനുമുള്ള അധികാരം സൺ ടിവിക്ക് ഉണ്ടായിരുന്നുവെന്ന് കോടതി ചൂണ്ടിക്കാട്ടി. എഡിറ്റോറിയൽ നിയന്ത്രണമുള്ളതിനാൽ ചാനലിന് ഇതിന്റെ ഉത്തരവാദിത്തത്തിൽ നിന്ന് ഒഴിഞ്ഞുമാറാനാകില്ലെന്ന് കോടതി വ്യക്തമാക്കി.

2015-ൽ വിചാരണ കോടതി സുകന്യക്ക് 10,00,500 രൂപ നഷ്ടപരിഹാരം നൽകാൻ ഉത്തരവിട്ടിരുന്നു. ഈ വിധിയാണ് ഇപ്പോൾ ഹൈക്കോടതി ശരിവെച്ചത്. കൂടാതെ, ഈ അഭിമുഖത്തിലെ സുകന്യക്കെതിരെയുള്ള അപകീർത്തികരമായ ഭാഗങ്ങൾ ഭാവിയിൽ വീണ്ടും പ്രസിദ്ധീകരിക്കുന്നതിനോ സംപ്രേഷണം ചെയ്യുന്നതിനോ കോടതി സ്ഥിരം വിലക്കേർപ്പെടുത്തുകയും ചെയ്തു.

### Related Links & Sources
- [Original Story Source](https://moviemax.in/news/364707/sun-tv-to-pay-rs-10-lakh-to-actress-sukanya-in-veerappan-interview-case)