#LATEST NEWS #CM Vijay #Tiruchirappalli #Trisha
ചെന്നൈ: (https://moviemax.in/ ) കന്നിയങ്കത്തിൽ മികച്ച വിജയം നേടി തമിഴ്നാട് മുഖ്യമന്ത്രിയായി ചുമതലയേറ്റ ശേഷം വോട്ടർമാർക്ക് നന്ദി അറിയിക്കാൻ നടൻ വിജയ് ഇന്ന് തിരുച്ചിറപ്പള്ളിയിൽ (ട്രിച്ചി) എത്തും. വൈകീട്ട് നാലിന് തിരുച്ചിറപ്പള്ളി സെന്റ് ജോസഫ്സ് കോളേജിൽ നടക്കുന്ന വൻ പൊതുയോഗത്തിൽ അദ്ദേഹം സംസാരിക്കും. ക്യൂആർ കോഡ് പതിപ്പിച്ച ടിക്കറ്റുകളുള്ള 5,000 പേർക്കാണ് യോഗത്തിലേക്ക് പ്രവേശനമുള്ളത്. കഴിഞ്ഞ മാസം 20നാണ് വിജയ് ഇതിന് മുൻപ് ട്രിച്ചിയിൽ എത്തിയത്.
പെരമ്പൂർ, തിരുച്ചിറപ്പള്ളി ഈസ്റ്റ് എന്നീ രണ്ട് സീറ്റുകളിലാണ് വിജയ് മത്സരിച്ച് ജയിച്ചത്. മുഖ്യമന്ത്രിയായതിനെ തുടർന്ന് അദ്ദേഹം ട്രിച്ചി ഈസ്റ്റ് സീറ്റ് രാജിവെച്ചിരുന്നു. എന്നാൽ വിജയിച്ച ശേഷം വോട്ടർമാർക്ക് നന്ദി പോലും പറയാതെ വിജയ് മണ്ഡലം ഒഴിഞ്ഞുവെന്ന രീതിയിൽ ഡിഎംകെ - അണ്ണാഡിഎംകെ മുന്നണികൾ കടുത്ത വിമർശനം ഉയർത്തിയിരുന്നു. ഇതിന് ഇന്നത്തെ പൊതുയോഗത്തിലൂടെ വിജയ് മറുപടി നൽകുമെന്നാണ് കരുതുന്നത്. കൂടാതെ പ്രതിപക്ഷ കക്ഷികൾക്കെതിരെ കടുത്ത രാഷ്ട്രീയ ആക്രമണവും വിജയ്യുടെ ഭാഗത്തുനിന്നുണ്ടായേക്കാം.
ട്രിച്ചി ഈസ്റ്റിൽ തൃഷ കൃഷ്ണ മത്സരിക്കുമോ?
വിജയ് രാജിവെച്ചതോടെ ട്രിച്ചി ഈസ്റ്റിൽ ഉപതെരഞ്ഞെടുപ്പിന് വഴിയൊരുങ്ങിയിരിക്കുകയാണ്. ഇവിടെ തമിഴക വെട്രി കഴകം (TVK) സ്ഥാനാർഥിയായി പ്രശസ്ത നടി തൃഷ കൃഷ്ണ മത്സരിച്ചേക്കുമെന്ന അഭ്യൂഹങ്ങൾ രാഷ്ട്രീയ വൃത്തങ്ങളിൽ ശക്തമാണ്. വിജയ്യുമായി ചേർത്ത് തൃഷയുടെ പേര് ചർച്ചകളിൽ സജീവമാണെങ്കിലും ഇതുവരെ ഔദ്യോഗിക സ്ഥിരീകരണമൊന്നും ഉണ്ടായിട്ടില്ല. ഇന്നത്തെ യോഗത്തിൽ സ്ഥാനാർഥിയെ സംബന്ധിച്ച സൂചനകൾ മുഖ്യമന്ത്രി നൽകുമോ എന്ന ആകാംക്ഷയിലാണ് അണികൾ.
കൃത്യമായ രാഷ്ട്രീയ കണക്കുകൂട്ടലുകളോടെയാണ് വിജയ് ട്രിച്ചി ഈസ്റ്റ് തിരഞ്ഞെടുത്തത്. നഗരപ്രദേശങ്ങളും ന്യൂനപക്ഷ ജനസംഖ്യയും, പ്രത്യേകിച്ച് വെള്ളാളർ സമുദായത്തിൽ നിന്നുള്ള ക്രിസ്ത്യൻ വോട്ടുകളും നിർണായകമായ മണ്ഡലമാണിത്. കടുത്ത മത്സരത്തിനൊടുവിൽ 2,700-ലധികം വോട്ടുകളുടെ ഭൂരിപക്ഷത്തിലാണ് വിജയ് ഇവിടെ നിന്നും നിയമസഭയിലെത്തിയത്. അതുകൊണ്ടുതന്നെ പാർട്ടിക്ക് വലിയ സ്വാധീനമുള്ള ഈ സീറ്റിൽ തൃഷയെ ഇറക്കി വിജയം നിലനിർത്താനാണോ ടിവികെ ശ്രമിക്കുന്നത് എന്നാണ് തമിഴകം ഉറ്റുനോക്കുന്നത്.
Content Highlight: Pass with QR code, entry for only 5000 people; CM Vijay will arrive in Tiruchirappalli, will Trisha be declared as his successor?
