---
title: "അക്ഷയ് കുമാറിന് ഉയിർത്തെഴുന്നേൽപ്പ്; പ്രിയദർശൻ ചിത്രത്തിലൂടെ ബോക്സ് ഓഫീസിൽ പടയോട്ടം"
english_title: "Akshay Kumar's Priyadarshan film is a box office hit"
publisher: "moviemax.in"
canonical_url: "https://moviemax.in/news/357723/akshay-kumars-priyadarshan-film-is-a-box-office-hit"
published_at: "2026-05-06T16:21:00+05:30"
category: "Bollywood"
language: "ml"
image: "https://cf.zdn.im/img/truevisionnews.com/0/image-uploads/69fb1db5b58fb_Untitled-18.jpg"
keywords: []
---

# അക്ഷയ് കുമാറിന് ഉയിർത്തെഴുന്നേൽപ്പ്; പ്രിയദർശൻ ചിത്രത്തിലൂടെ ബോക്സ് ഓഫീസിൽ പടയോട്ടം

> **Lead Summary:** **[**ബോളിവുഡ് ബോക്സ് ഓഫീസിൽ തന്റെ നഷ്ടപ്രതാപം വീണ്ടെടുത്ത് സൂപ്പർതാരം അക്ഷയ് കുമാർ വീണ്ടും കരുത്ത് തെളിയിക്കുന്നു.

## Article Content

**[**ബോളിവുഡ് ബോക്സ് ഓഫീസിൽ തന്റെ നഷ്ടപ്രതാപം വീണ്ടെടുത്ത് സൂപ്പർതാരം അക്ഷയ് കുമാർ വീണ്ടും കരുത്ത് തെളിയിക്കുന്നു.

കോവിഡ് കാലത്തിന് മുൻപ് ബോളിവുഡിന്റെ മിനിമം ഗ്യാരന്റി നായകനായിരുന്ന അക്ഷയ് കുമാറിന് ഇടക്കാലത്ത് വലിയ തിരിച്ചടികൾ നേരിടേണ്ടി വന്നിരുന്നു.

എന്നാൽ പ്രിയദർശൻ സംവിധാനം ചെയ്ത പുതിയ ചിത്രം 'ഭൂത് ബംഗ്ല' തിയറ്ററുകളിൽ വൻ വിജയമായതോടെ താരം ശക്തമായ തിരിച്ചുവരവ് നടത്തിയിരിക്കുകയാണ്.

കോവിഡ് കാലഘട്ടത്തിന് ശേഷം അക്ഷയ് കുമാറിന് ലഭിക്കുന്ന ഏറ്റവും മികച്ച രണ്ടാമത്തെ വിജയമായി ഈ ചിത്രം മാറിയിരിക്കുന്നു.

ഏപ്രിൽ 17-ന് തിയറ്ററുകളിലെത്തിയ ഈ ഹൊറർ കോമഡി ചിത്രം ആഗോളതലത്തിൽ 231 കോടി രൂപയാണ് ഇതുവരെ സമാഹരിച്ചത്.

120 കോടി രൂപയുടെ ബജറ്റിൽ ഒരുങ്ങിയ ചിത്രം ഇന്ത്യയിൽ നിന്ന് മാത്രം 146.50 കോടി നെറ്റ് കളക്ഷൻ നേടി. ഇന്ത്യയിലെ ആകെ ഗ്രോസ് 173.88 കോടിയും വിദേശ വിപണിയിലെ കളക്ഷൻ 57.15 കോടിയുമാണെന്ന് പ്രമുഖ ട്രക്കർമാരായ സാക്നിൽക് വ്യക്തമാക്കുന്നു.

കോവിഡിന് ശേഷം ബോക്സ് ഓഫീസിൽ വിജയിക്കുന്ന മൂന്നാമത്തെ അക്ഷയ് കുമാർ ചിത്രമാണിത്. നേരത്തെ ചെറിയ ബജറ്റിൽ പുറത്തിറങ്ങി 150 കോടി നേടിയ 'ഒഎംജി 2' ആണ് ലാഭത്തിന്റെ കാര്യത്തിൽ മുന്നിലുള്ളത്.

180 കോടി ബജറ്റിൽ വന്ന 'സൂര്യവൻശി'യാണ് നേട്ടമുണ്ടാക്കിയ മറ്റൊരു ചിത്രം. അക്ഷയ് കുമാറിന് മാത്രമല്ല, സംവിധായകൻ പ്രിയദർശന്റെ കരിയറിലും ഈ സിനിമ വലിയൊരു നാഴികക്കല്ലായി മാറി.

പതിറ്റാണ്ടുകൾ നീണ്ട തന്റെ സിനിമാ ജീവിതത്തിൽ പ്രിയദർശൻ സ്വന്തമാക്കുന്ന ആദ്യ 100 കോടി, 200 കോടി ചിത്രം കൂടിയാണ് ഭൂത് ബംഗ്ല.

ഇതോടെ ബോളിവുഡ് വിപണിയിൽ പ്രിയദർശന്റെ സ്ഥാനവും വീണ്ടും ഉറപ്പിക്കപ്പെട്ടിരിക്കുകയാണ്. അക്ഷയ് കുമാറും പ്രിയദർശനും ഒന്നിക്കുമ്പോൾ പിറക്കുന്ന വിജയക്കൂട്ടുകെട്ട് വർഷങ്ങൾക്കിപ്പുറവും ബോക്സ് ഓഫീസിൽ വിസ്മയങ്ങൾ സൃഷ്ടിക്കുമെന്ന് ചിത്രം തെളിയിച്ചു കഴിഞ്ഞു.

### Related Links & Sources
- [Original Story Source](https://moviemax.in/news/357723/akshay-kumars-priyadarshan-film-is-a-box-office-hit)